૧૦. દણ્ડવગ્ગો

૧૨૯. સબ્બે તસન્તિ દણ્ડસ્સ, સબ્બે ભાયન્તિ મચ્ચુનો;

અત્તાનં ઉપમં કત્વા, ન હનેય્ય ન ઘાતયે.

૧૩૦. સબ્બે તસન્તિ દણ્ડસ્સ, સબ્બેસં જીવિતં પિયં;

અત્તાનં ઉપમં કત્વા, ન હનેય્ય ન ઘાતયે.

૧૩૧. સુખકામાનિ ભૂતાનિ, યો દણ્ડેન વિહિંસતિ;

અત્તનો સુખમેસાનો, પેચ્ચ સો ન લભતે સુખં.

૧૩૨. સુખકામાનિ ભૂતાનિ, યો દણ્ડેન ન હિંસતિ;

અત્તનો સુખમેસાનો, પેચ્ચ સો લભતે સુખં.

૧૩૩. માવોચ ફરુસં કઞ્ચિ, વુત્તા પટિવદેય્યુ તં [પટિવદેય્યું તં (ક.)];

દુક્ખા હિ સારમ્ભકથા, પટિદણ્ડા ફુસેય્યુ તં [ફુસેય્યું તં (ક.)].

૧૩૪. સચે નેરેસિ અત્તાનં, કંસો ઉપહતો યથા;

એસ પત્તોસિ નિબ્બાનં, સારમ્ભો તે ન વિજ્જતિ.

૧૩૫. યથા દણ્ડેન ગોપાલો, ગાવો પાજેતિ ગોચરં;

એવં જરા ચ મચ્ચુ ચ, આયું પાજેન્તિ પાણિનં.

૧૩૬. અથ પાપાનિ કમ્માનિ, કરં બાલો ન બુજ્ઝતિ;

સેહિ કમ્મેહિ દુમ્મેધો, અગ્ગિદડ્ઢોવ તપ્પતિ.

૧૩૭. યો દણ્ડેન અદણ્ડેસુ, અપ્પદુટ્ઠેસુ દુસ્સતિ;

દસન્નમઞ્ઞતરં ઠાનં, ખિપ્પમેવ નિગચ્છતિ.

૧૩૮. વેદનં ફરુસં જાનિં, સરીરસ્સ ચ ભેદનં [સરીરસ્સ પભેદનં (સ્યા.)];

ગરુકં વાપિ આબાધં, ચિત્તક્ખેપઞ્ચ [ચિત્તક્ખેપં વ (સી. સ્યા. પી.)] પાપુણે.

૧૩૯. રાજતો વા ઉપસગ્ગં [ઉપસ્સગ્ગં (સી. પી.)], અબ્ભક્ખાનઞ્ચ [અબ્ભક્ખાનં વ (સી. પી.)] દારુણં;

પરિક્ખયઞ્ચ [પરિક્ખયં વ (સી. સ્યા. પી.)] ઞાતીનં, ભોગાનઞ્ચ [ભોગાનં વ (સી. સ્યા. પી.)] પભઙ્ગુરં [પભઙ્ગુનં (ક.)].

૧૪૦. અથ વાસ્સ અગારાનિ, અગ્ગિ ડહતિ [ડય્હતિ (ક.)] પાવકો;

કાયસ્સ ભેદા દુપ્પઞ્ઞો, નિરયં સોપપજ્જતિ [સો ઉપપજ્જતિ (સી. સ્યા.)].

૧૪૧. ન નગ્ગચરિયા ન જટા ન પઙ્કા, નાનાસકા થણ્ડિલસાયિકા વા;

રજોજલ્લં ઉક્કુટિકપ્પધાનં, સોધેન્તિ મચ્ચં અવિતિણ્ણકઙ્ખં.

૧૪૨. અલઙ્કતો ચેપિ સમં ચરેય્ય, સન્તો દન્તો નિયતો બ્રહ્મચારી;

સબ્બેસુ ભૂતેસુ નિધાય દણ્ડં, સો બ્રાહ્મણો સો સમણો સ ભિક્ખુ.

૧૪૩. હિરીનિસેધો પુરિસો, કોચિ લોકસ્મિ વિજ્જતિ;

યો નિદ્દં [નિન્દં (સી. પી.) સં. નિ. ૧.૧૮] અપબોધેતિ [અપબોધતિ (સી. સ્યા. પી.)], અસ્સો ભદ્રો કસામિવ.

૧૪૪. અસ્સો યથા ભદ્રો કસાનિવિટ્ઠો, આતાપિનો સંવેગિનો ભવાથ;

સદ્ધાય સીલેન ચ વીરિયેન ચ, સમાધિના ધમ્મવિનિચ્છયેન ચ;

સમ્પન્નવિજ્જાચરણા પતિસ્સતા, જહિસ્સથ [પહસ્સથ (સી. સ્યા. પી.)] દુક્ખમિદં અનપ્પકં.

૧૪૫. ઉદકઞ્હિ નયન્તિ નેત્તિકા, ઉસુકારા નમયન્તિ તેજનં;

દારું નમયન્તિ તચ્છકા, અત્તાનં દમયન્તિ સુબ્બતા.

દણ્ડવગ્ગો દસમો નિટ્ઠિતો.