૧૧. જરાવગ્ગો

૧૪૬. કો નુ હાસો [કિન્નુ હાસો (ક.)] કિમાનન્દો, નિચ્ચં પજ્જલિતે સતિ;

અન્ધકારેન ઓનદ્ધા, પદીપં ન ગવેસથ.

૧૪૭. પસ્સ ચિત્તકતં બિમ્બં, અરુકાયં સમુસ્સિતં;

આતુરં બહુસઙ્કપ્પં, યસ્સ નત્થિ ધુવં ઠિતિ.

૧૪૮. પરિજિણ્ણમિદં રૂપં, રોગનીળં [રોગનિડ્ઢં (સી. પી.), રોગનિદ્ધં (સ્યા.)] પભઙ્ગુરં;

ભિજ્જતિ પૂતિસન્દેહો, મરણન્તઞ્હિ જીવિતં.

૧૪૯. યાનિમાનિ અપત્થાનિ [યાનિમાનિ અપત્થાનિ (સી. સ્યા. પી.), યાનિમાનિ’પવિદ્ધાનિ (?)], અલાબૂનેવ [અલાપૂનેવ (સી. સ્યા. પી.)] સારદે;

કાપોતકાનિ અટ્ઠીનિ, તાનિ દિસ્વાન કા રતિ.

૧૫૦. અટ્ઠીનં નગરં કતં, મંસલોહિતલેપનં;

યત્થ જરા ચ મચ્ચુ ચ, માનો મક્ખો ચ ઓહિતો.

૧૫૧. જીરન્તિ વે રાજરથા સુચિત્તા, અથો સરીરમ્પિ જરં ઉપેતિ;

સતઞ્ચ ધમ્મો ન જરં ઉપેતિ, સન્તો હવે સબ્ભિ પવેદયન્તિ.

૧૫૨. અપ્પસ્સુતાયં પુરિસો, બલિબદ્ધોવ [બલિવદ્દોવ (સી. સ્યા. પી.)] જીરતિ;

મંસાનિ તસ્સ વડ્ઢન્તિ, પઞ્ઞા તસ્સ ન વડ્ઢતિ.

૧૫૩. અનેકજાતિસંસારં, સન્ધાવિસ્સં અનિબ્બિસં;

ગહકારં [ગહકારકં (સી. સ્યા. પી.)] ગવેસન્તો, દુક્ખા જાતિ પુનપ્પુનં.

૧૫૪. ગહકારક દિટ્ઠોસિ, પુન ગેહં ન કાહસિ;

સબ્બા તે ફાસુકા ભગ્ગા, ગહકૂટં વિસઙ્ખતં;

વિસઙ્ખારગતં ચિત્તં, તણ્હાનં ખયમજ્ઝગા.

૧૫૫. અચરિત્વા બ્રહ્મચરિયં, અલદ્ધા યોબ્બને ધનં;

જિણ્ણકોઞ્ચાવ ઝાયન્તિ, ખીણમચ્છેવ પલ્લલે.

૧૫૬. અચરિત્વા બ્રહ્મચરિયં, અલદ્ધા યોબ્બને ધનં;

સેન્તિ ચાપાતિખીણાવ, પુરાણાનિ અનુત્થુનં.

જરાવગ્ગો એકાદસમો નિટ્ઠિતો.