૮. સહસ્સવગ્ગો

૧૦૦. સહસ્સમપિ ચે વાચા, અનત્થપદસંહિતા;

એકં અત્થપદં સેય્યો, યં સુત્વા ઉપસમ્મતિ.

૧૦૧. સહસ્સમપિ ચે ગાથા, અનત્થપદસંહિતા;

એકં ગાથાપદં સેય્યો, યં સુત્વા ઉપસમ્મતિ.

૧૦૨. યો ચ ગાથા સતં ભાસે, અનત્થપદસંહિતા [અનત્થપદસઞ્હિતં (ક.) વિસેસનં હેતં ગાથાતિપદસ્સ];

એકં ધમ્મપદં સેય્યો, યં સુત્વા ઉપસમ્મતિ.

૧૦૩. યો સહસ્સં સહસ્સેન, સઙ્ગામે માનુસે જિને;

એકઞ્ચ જેય્યમત્તાનં [અત્તાનં (સી. પી.)], સ વે સઙ્ગામજુત્તમો.

૧૦૪. અત્તા હવે જિતં સેય્યો, યા ચાયં ઇતરા પજા;

અત્તદન્તસ્સ પોસસ્સ, નિચ્ચં સઞ્ઞતચારિનો.

૧૦૫. નેવ દેવો ન ગન્ધબ્બો, ન મારો સહ બ્રહ્મુના;

જિતં અપજિતં કયિરા, તથારૂપસ્સ જન્તુનો.

૧૦૬. માસે માસે સહસ્સેન, યો યજેથ સતં સમં;

એકઞ્ચ ભાવિતત્તાનં, મુહુત્તમપિ પૂજયે;

સાયેવ પૂજના સેય્યો, યઞ્ચે વસ્સસતં હુતં.

૧૦૭. યો ચ વસ્સસતં જન્તુ, અગ્ગિં પરિચરે વને;

એકઞ્ચ ભાવિતત્તાનં, મુહુત્તમપિ પૂજયે;

સાયેવ પૂજના સેય્યો, યઞ્ચે વસ્સસતં હુતં.

૧૦૮. યં કિઞ્ચિ યિટ્ઠં વ હુતં વ [યિટ્ઠઞ્ચ હુતઞ્ચ (ક.)] લોકે, સંવચ્છરં યજેથ પુઞ્ઞપેક્ખો;

સબ્બમ્પિ તં ન ચતુભાગમેતિ, અભિવાદના ઉજ્જુગતેસુ સેય્યો.

૧૦૯. અભિવાદનસીલિસ્સ, નિચ્ચં વુડ્ઢાપચાયિનો [વદ્ધાપચાયિનો (સી. પી.)];

ચત્તારો ધમ્મા વડ્ઢન્તિ, આયુ વણ્ણો સુખં બલં.

૧૧૦. યો ચ વસ્સસતં જીવે, દુસ્સીલો અસમાહિતો;

એકાહં જીવિતં સેય્યો, સીલવન્તસ્સ ઝાયિનો.

૧૧૧. યો ચ વસ્સસતં જીવે, દુપ્પઞ્ઞો અસમાહિતો;

એકાહં જીવિતં સેય્યો, પઞ્ઞવન્તસ્સ ઝાયિનો.

૧૧૨. યો ચ વસ્સસતં જીવે, કુસીતો હીનવીરિયો;

એકાહં જીવિતં સેય્યો, વીરિયમારભતો દળ્હં.

૧૧૩. યો ચ વસ્સસતં જીવે, અપસ્સં ઉદયબ્બયં;

એકાહં જીવિતં સેય્યો, પસ્સતો ઉદયબ્બયં.

૧૧૪. યો ચ વસ્સસતં જીવે, અપસ્સં અમતં પદં;

એકાહં જીવિતં સેય્યો, પસ્સતો અમતં પદં.

૧૧૫. યો ચ વસ્સસતં જીવે, અપસ્સં ધમ્મમુત્તમં;

એકાહં જીવિતં સેય્યો, પસ્સતો ધમ્મમુત્તમં.

સહસ્સવગ્ગો અટ્ઠમો નિટ્ઠિતો.