૫. બાલવગ્ગો

૬૦. દીઘા જાગરતો રત્તિ, દીઘં સન્તસ્સ યોજનં;

દીઘો બાલાનં સંસારો, સદ્ધમ્મં અવિજાનતં.

૬૧. ચરઞ્ચે નાધિગચ્છેય્ય, સેય્યં સદિસમત્તનો;

એકચરિયં [એકચરિયં (ક.)] દળ્હં કયિરા, નત્થિ બાલે સહાયતા.

૬૨. પુત્તા મત્થિ ધનમ્મત્થિ [પુત્તમત્થિ ધનમત્થિ (ક.)], ઇતિ બાલો વિહઞ્ઞતિ;

અત્તા હિ [અત્તાપિ (?)] અત્તનો નત્થિ, કુતો પુત્તા કુતો ધનં.

૬૩. યો બાલો મઞ્ઞતિ બાલ્યં, પણ્ડિતો વાપિ તેન સો;

બાલો ચ પણ્ડિતમાની, સ વે ‘‘બાલો’’તિ વુચ્ચતિ.

૬૪. યાવજીવમ્પિ ચે બાલો, પણ્ડિતં પયિરુપાસતિ;

ન સો ધમ્મં વિજાનાતિ, દબ્બી સૂપરસં યથા.

૬૫. મુહુત્તમપિ ચે વિઞ્ઞૂ, પણ્ડિતં પયિરુપાસતિ;

ખિપ્પં ધમ્મં વિજાનાતિ, જિવ્હા સૂપરસં યથા.

૬૬. ચરન્તિ બાલા દુમ્મેધા, અમિત્તેનેવ અત્તના;

કરોન્તા પાપકં કમ્મં, યં હોતિ કટુકપ્ફલં.

૬૭. ન તં કમ્મં કતં સાધુ, યં કત્વા અનુતપ્પતિ;

યસ્સ અસ્સુમુખો રોદં, વિપાકં પટિસેવતિ.

૬૮. તઞ્ચ કમ્મં કતં સાધુ, યં કત્વા નાનુતપ્પતિ;

યસ્સ પતીતો સુમનો, વિપાકં પટિસેવતિ.

૬૯. મધુવા [મધું વા (દી. નિ. ટીકા ૧)] મઞ્ઞતિ બાલો, યાવ પાપં ન પચ્ચતિ;

યદા ચ પચ્ચતિ પાપં, બાલો [અથ બાલો (સી. સ્યા.) અથ (?)] દુક્ખં નિગચ્છતિ.

૭૦. માસે માસે કુસગ્ગેન, બાલો ભુઞ્જેય્ય ભોજનં;

ન સો સઙ્ખાતધમ્માનં [સઙ્ખતધમ્માનં (સી. પી. ક.)], કલં અગ્ઘતિ સોળસિં.

૭૧. ન હિ પાપં કતં કમ્મં, સજ્જુ ખીરંવ મુચ્ચતિ;

ડહન્તં બાલમન્વેતિ, ભસ્મચ્છન્નોવ [ભસ્માછન્નોવ (સી. પી. ક.)] પાવકો.

૭૨. યાવદેવ અનત્થાય, ઞત્તં [ઞાતં (?)] બાલસ્સ જાયતિ;

હન્તિ બાલસ્સ સુક્કંસં, મુદ્ધમસ્સ વિપાતયં.

૭૩. અસન્તં ભાવનમિચ્છેય્ય [અસન્તં ભાવમિચ્છેય્ય (સ્યા.), અસન્તભાવનમિચ્છેય્ય (ક.)], પુરેક્ખારઞ્ચ ભિક્ખુસુ;

આવાસેસુ ચ ઇસ્સરિયં, પૂજા પરકુલેસુ ચ.

૭૪. મમેવ કત મઞ્ઞન્તુ, ગિહીપબ્બજિતા ઉભો;

મમેવાતિવસા અસ્સુ, કિચ્ચાકિચ્ચેસુ કિસ્મિચિ;

ઇતિ બાલસ્સ સઙ્કપ્પો, ઇચ્છા માનો ચ વડ્ઢતિ.

૭૫. અઞ્ઞા હિ લાભૂપનિસા, અઞ્ઞા નિબ્બાનગામિની;

એવમેતં અભિઞ્ઞાય, ભિક્ખુ બુદ્ધસ્સ સાવકો;

સક્કારં નાભિનન્દેય્ય, વિવેકમનુબ્રૂહયે.

બાલવગ્ગો પઞ્ચમો નિટ્ઠિતો.