૬. પણ્ડિતવગ્ગો

૭૬. નિધીનંવ પવત્તારં, યં પસ્સે વજ્જદસ્સિનં;

નિગ્ગય્હવાદિં મેધાવિં, તાદિસં પણ્ડિતં ભજે;

તાદિસં ભજમાનસ્સ, સેય્યો હોતિ ન પાપિયો.

૭૭. ઓવદેય્યાનુસાસેય્ય, અસબ્ભા ચ નિવારયે;

સતઞ્હિ સો પિયો હોતિ, અસતં હોતિ અપ્પિયો.

૭૮. ન ભજે પાપકે મિત્તે, ન ભજે પુરિસાધમે;

ભજેથ મિત્તે કલ્યાણે, ભજેથ પુરિસુત્તમે.

૭૯. ધમ્મપીતિ સુખં સેતિ, વિપ્પસન્નેન ચેતસા;

અરિયપ્પવેદિતે ધમ્મે, સદા રમતિ પણ્ડિતો.

૮૦. ઉદકઞ્હિ નયન્તિ નેત્તિકા, ઉસુકારા નમયન્તિ [દમયન્તિ (ક.)] તેજનં;

દારું નમયન્તિ તચ્છકા, અત્તાનં દમયન્તિ પણ્ડિતા.

૮૧. સેલો યથા એકઘનો [એકગ્ઘનો (ક.)], વાતેન ન સમીરતિ;

એવં નિન્દાપસંસાસુ, ન સમિઞ્જન્તિ પણ્ડિતા.

૮૨. યથાપિ રહદો ગમ્ભીરો, વિપ્પસન્નો અનાવિલો;

એવં ધમ્માનિ સુત્વાન, વિપ્પસીદન્તિ પણ્ડિતા.

૮૩. સબ્બત્થ વે સપ્પુરિસા ચજન્તિ, ન કામકામા લપયન્તિ સન્તો;

સુખેન ફુટ્ઠા અથ વા દુખેન, ન ઉચ્ચાવચં [નોચ્ચાવચં (સી. અટ્ઠ.)] પણ્ડિતા દસ્સયન્તિ.

૮૪. ન અત્તહેતુ ન પરસ્સ હેતુ, ન પુત્તમિચ્છે ન ધનં ન રટ્ઠં;

ન ઇચ્છેય્ય [નયિચ્છે (પી.), નિચ્છે (?)] અધમ્મેન સમિદ્ધિમત્તનો, સ સીલવા પઞ્ઞવા ધમ્મિકો સિયા.

૮૫. અપ્પકા તે મનુસ્સેસુ, યે જના પારગામિનો;

અથાયં ઇતરા પજા, તીરમેવાનુધાવતિ.

૮૬. યે ચ ખો સમ્મદક્ખાતે, ધમ્મે ધમ્માનુવત્તિનો;

તે જના પારમેસ્સન્તિ, મચ્ચુધેય્યં સુદુત્તરં.

૮૭. કણ્હં ધમ્મં વિપ્પહાય, સુક્કં ભાવેથ પણ્ડિતો;

ઓકા અનોકમાગમ્મ, વિવેકે યત્થ દૂરમં.

૮૮. તત્રાભિરતિમિચ્છેય્ય, હિત્વા કામે અકિઞ્ચનો;

પરિયોદપેય્ય [પરિયોદાપેય્ય (?)] અત્તાનં, ચિત્તક્લેસેહિ પણ્ડિતો.

૮૯. યેસં સમ્બોધિયઙ્ગેસુ, સમ્મા ચિત્તં સુભાવિતં;

આદાનપટિનિસ્સગ્ગે, અનુપાદાય યે રતા;

ખીણાસવા જુતિમન્તો, તે લોકે પરિનિબ્બુતા.

પણ્ડિતવગ્ગો છટ્ઠો નિટ્ઠિતો.