૨૩. નાગવગ્ગો

૩૨૦. અહં નાગોવ સઙ્ગામે, ચાપતો પતિતં સરં;

અતિવાક્યં તિતિક્ખિસ્સં, દુસ્સીલો હિ બહુજ્જનો.

૩૨૧. દન્તં નયન્તિ સમિતિં, દન્તં રાજાભિરૂહતિ;

દન્તો સેટ્ઠો મનુસ્સેસુ, યોતિવાક્યં તિતિક્ખતિ.

૩૨૨. વરમસ્સતરા દન્તા, આજાનીયા ચ [આજાનીયાવ (સ્યા.)] સિન્ધવા;

કુઞ્જરા ચ [કુઞ્જરાવ (સ્યા.)] મહાનાગા, અત્તદન્તો તતો વરં.

૩૨૩. ન હિ એતેહિ યાનેહિ, ગચ્છેય્ય અગતં દિસં;

યથાત્તના સુદન્તેન, દન્તો દન્તેન ગચ્છતિ.

૩૨૪. ધનપાલો [ધનપાલકો (સી. સ્યા. કં. પી.)] નામ કુઞ્જરો, કટુકભેદનો [કટુકપ્પભેદનો (સી. સ્યા. પી.)] દુન્નિવારયો;

બદ્ધો કબળં ન ભુઞ્જતિ, સુમરતિ [સુસરતિ (ક.)] નાગવનસ્સ કુઞ્જરો.

૩૨૫. મિદ્ધી યદા હોતિ મહગ્ઘસો ચ, નિદ્દાયિતા સમ્પરિવત્તસાયી;

મહાવરાહોવ નિવાપપુટ્ઠો, પુનપ્પુનં ગબ્ભમુપેતિ મન્દો.

૩૨૬. ઇદં પુરે ચિત્તમચારિ ચારિકં, યેનિચ્છકં યત્થકામં યથાસુખં;

તદજ્જહં નિગ્ગહેસ્સામિ યોનિસો, હત્થિપ્પભિન્નં વિય અઙ્કુસગ્ગહો.

૩૨૭. અપ્પમાદરતા હોથ, સચિત્તમનુરક્ખથ;

દુગ્ગા ઉદ્ધરથત્તાનં, પઙ્કે સન્નોવ [સત્તોવ (સી. પી.)] કુઞ્જરો.

૩૨૮. સચે લભેથ નિપકં સહાયં, સદ્ધિં ચરં સાધુવિહારિધીરં;

અભિભુય્ય સબ્બાનિ પરિસ્સયાનિ, ચરેય્ય તેનત્તમનો સતીમા.

૩૨૯. નો ચે લભેથ નિપકં સહાયં, સદ્ધિં ચરં સાધુવિહારિધીરં;

રાજાવ રટ્ઠં વિજિતં પહાય, એકો ચરે માતઙ્ગરઞ્ઞેવ નાગો.

૩૩૦. એકસ્સ ચરિતં સેય્યો, નત્થિ બાલે સહાયતા;

એકો ચરે ન ચ પાપાનિ કયિરા, અપ્પોસ્સુક્કો માતઙ્ગરઞ્ઞેવ નાગો.

૩૩૧. અત્થમ્હિ જાતમ્હિ સુખા સહાયા, તુટ્ઠી સુખા યા ઇતરીતરેન;

પુઞ્ઞં સુખં જીવિતસઙ્ખયમ્હિ, સબ્બસ્સ દુક્ખસ્સ સુખં પહાનં.

૩૩૨. સુખા મત્તેય્યતા લોકે, અથો પેત્તેય્યતા સુખા;

સુખા સામઞ્ઞતા લોકે, અથો બ્રહ્મઞ્ઞતા સુખા.

૩૩૩. સુખં યાવ જરા સીલં, સુખા સદ્ધા પતિટ્ઠિતા;

સુખો પઞ્ઞાય પટિલાભો, પાપાનં અકરણં સુખં.

નાગવગ્ગો તેવીસતિમો નિટ્ઠિતો.