૨૪. તણ્હાવગ્ગો

૩૩૪. મનુજસ્સ પમત્તચારિનો, તણ્હા વડ્ઢતિ માલુવા વિય;

સો પ્લવતી [પ્લવતિ (સી. પી.), પલવેતી (ક.), ઉપ્લવતિ (?)] હુરા હુરં, ફલમિચ્છંવ વનસ્મિ વાનરો.

૩૩૫. યં એસા સહતે જમ્મી, તણ્હા લોકે વિસત્તિકા;

સોકા તસ્સ પવડ્ઢન્તિ, અભિવટ્ઠંવ [અભિવડ્ઢંવ (સ્યા.), અભિવટ્ટંવ (પી.), અભિવુડ્ઢંવ (ક.)] બીરણં.

૩૩૬. યો ચેતં સહતે જમ્મિં, તણ્હં લોકે દુરચ્ચયં;

સોકા તમ્હા પપતન્તિ, ઉદબિન્દુવ પોક્ખરા.

૩૩૭. તં વો વદામિ ભદ્દં વો, યાવન્તેત્થ સમાગતા;

તણ્હાય મૂલં ખણથ, ઉસીરત્થોવ બીરણં;

મા વો નળંવ સોતોવ, મારો ભઞ્જિ પુનપ્પુનં.

૩૩૮. યથાપિ મૂલે અનુપદ્દવે દળ્હે, છિન્નોપિ રુક્ખો પુનરેવ રૂહતિ;

એવમ્પિ તણ્હાનુસયે અનૂહતે, નિબ્બત્તતી દુક્ખમિદં પુનપ્પુનં.

૩૩૯. યસ્સ છત્તિંસતિ સોતા, મનાપસવના ભુસા;

માહા [વાહા (સી. સ્યા. પી.)] વહન્તિ દુદ્દિટ્ઠિં, સઙ્કપ્પા રાગનિસ્સિતા.

૩૪૦. સવન્તિ સબ્બધિ સોતા, લતા ઉપ્પજ્જ [ઉબ્ભિજ્જ (સી. સ્યા. કં. પી.)] તિટ્ઠતિ;

તઞ્ચ દિસ્વા લતં જાતં, મૂલં પઞ્ઞાય છિન્દથ.

૩૪૧. સરિતાનિ સિનેહિતાનિ ચ, સોમનસ્સાનિ ભવન્તિ જન્તુનો;

તે સાતસિતા સુખેસિનો, તે વે જાતિજરૂપગા નરા.

૩૪૨. તસિણાય પુરક્ખતા પજા, પરિસપ્પન્તિ સસોવ બન્ધિતો [બાધિતો (બહૂસુ)];

સંયોજનસઙ્ગસત્તકા, દુક્ખમુપેન્તિ પુનપ્પુનં ચિરાય.

૩૪૩. તસિણાય પુરક્ખતા પજા, પરિસપ્પન્તિ સસોવ બન્ધિતો;

તસ્મા તસિણં વિનોદયે, આકઙ્ખન્ત [ભિક્ખૂ આકઙ્ખી (સી.), ભિક્ખુ આકઙ્ખં (સ્યા.)] વિરાગમત્તનો.

૩૪૪. યો નિબ્બનથો વનાધિમુત્તો, વનમુત્તો વનમેવ ધાવતિ;

તં પુગ્ગલમેથ પસ્સથ, મુત્તો બન્ધનમેવ ધાવતિ.

૩૪૫. ન તં દળ્હં બન્ધનમાહુ ધીરા, યદાયસં દારુજપબ્બજઞ્ચ [દારૂજં બબ્બજઞ્ચ (સી. પી.)];

સારત્તરત્તા મણિકુણ્ડલેસુ, પુત્તેસુ દારેસુ ચ યા અપેક્ખા.

૩૪૬. એતં દળ્હં બન્ધનમાહુ ધીરા, ઓહારિનં સિથિલં દુપ્પમુઞ્ચં;

એતમ્પિ છેત્વાન પરિબ્બજન્તિ, અનપેક્ખિનો કામસુખં પહાય.

૩૪૭. યે રાગરત્તાનુપતન્તિ સોતં, સયંકતં મક્કટકોવ જાલં;

એતમ્પિ છેત્વાન વજન્તિ ધીરા, અનપેક્ખિનો સબ્બદુક્ખં પહાય.

૩૪૮. મુઞ્ચ પુરે મુઞ્ચ પચ્છતો, મજ્ઝે મુઞ્ચ ભવસ્સ પારગૂ;

સબ્બત્થ વિમુત્તમાનસો, ન પુનં જાતિજરં ઉપેહિસિ.

૩૪૯. વિતક્કમથિતસ્સ જન્તુનો, તિબ્બરાગસ્સ સુભાનુપસ્સિનો;

ભિય્યો તણ્હા પવડ્ઢતિ, એસ ખો દળ્હં [એસ ગાળ્હં (ક.)] કરોતિ બન્ધનં.

૩૫૦. વિતક્કૂપસમે ચ [વિતક્કૂપસમેવ (ક.)] યો રતો, અસુભં ભાવયતે સદા સતો;

એસ [એસો (?)] ખો બ્યન્તિ કાહિતિ, એસ [એસો (?)] છેચ્છતિ મારબન્ધનં.

૩૫૧. નિટ્ઠઙ્ગતો અસન્તાસી, વીતતણ્હો અનઙ્ગણો;

અચ્છિન્દિ ભવસલ્લાનિ, અન્તિમોયં સમુસ્સયો.

૩૫૨. વીતતણ્હો અનાદાનો, નિરુત્તિપદકોવિદો;

અક્ખરાનં સન્નિપાતં, જઞ્ઞા પુબ્બાપરાનિ ચ;

સ વે ‘‘અન્તિમસારીરો, મહાપઞ્ઞો મહાપુરિસો’’તિ વુચ્ચતિ.

૩૫૩. સબ્બાભિભૂ સબ્બવિદૂહમસ્મિ, સબ્બેસુ ધમ્મેસુ અનૂપલિત્તો;

સબ્બઞ્જહો તણ્હક્ખયે વિમુત્તો, સયં અભિઞ્ઞાય કમુદ્દિસેય્યં.

૩૫૪. સબ્બદાનં ધમ્મદાનં જિનાતિ, સબ્બરસં ધમ્મરસો જિનાતિ;

સબ્બરતિં ધમ્મરતિ જિનાતિ, તણ્હક્ખયો સબ્બદુક્ખં જિનાતિ.

૩૫૫. હનન્તિ ભોગા દુમ્મેધં, નો ચ પારગવેસિનો;

ભોગતણ્હાય દુમ્મેધો, હન્તિ અઞ્ઞેવ અત્તનં.

૩૫૬. તિણદોસાનિ ખેત્તાનિ, રાગદોસા અયં પજા;

તસ્મા હિ વીતરાગેસુ, દિન્નં હોતિ મહપ્ફલં.

૩૫૭. તિણદોસાનિ ખેત્તાનિ, દોસદોસા અયં પજા;

તસ્મા હિ વીતદોસેસુ, દિન્નં હોતિ મહપ્ફલં.

૩૫૮. તિણદોસાનિ ખેત્તાનિ, મોહદોસા અયં પજા;

તસ્મા હિ વીતમોહેસુ, દિન્નં હોતિ મહપ્ફલં.

૩૫૯. (તિણદોસાનિ ખેત્તાનિ, ઇચ્છાદોસા અયં પજા;

તસ્મા હિ વિગતિચ્છેસુ, દિન્નં હોતિ મહપ્ફલં.) [( ) વિદેસપોત્થકેસુ નત્થિ, અટ્ઠકથાયમ્પિ ન દિસ્સતિ]

તિણદોસાનિ ખેત્તાનિ, તણ્હાદોસા અયં પજા;

તસ્મા હિ વીતતણ્હેસુ, દિન્નં હોતિ મહપ્ફલં.

તણ્હાવગ્ગો ચતુવીસતિમો નિટ્ઠિતો.