૧૯. ધમ્મટ્ઠવગ્ગો

૨૫૬. ન તેન હોતિ ધમ્મટ્ઠો, યેનત્થં સાહસા [સહસા (સી. સ્યા. ક.)] નયે;

યો ચ અત્થં અનત્થઞ્ચ, ઉભો નિચ્છેય્ય પણ્ડિતો.

૨૫૭. અસાહસેન ધમ્મેન, સમેન નયતી પરે;

ધમ્મસ્સ ગુત્તો મેધાવી, ‘‘ધમ્મટ્ઠો’’તિ પવુચ્ચતિ.

૨૫૮. ન તેન પણ્ડિતો હોતિ, યાવતા બહુ ભાસતિ;

ખેમી અવેરી અભયો, ‘‘પણ્ડિતો’’તિ પવુચ્ચતિ.

૨૫૯. ન તાવતા ધમ્મધરો, યાવતા બહુ ભાસતિ;

યો ચ અપ્પમ્પિ સુત્વાન, ધમ્મં કાયેન પસ્સતિ;

સ વે ધમ્મધરો હોતિ, યો ધમ્મં નપ્પમજ્જતિ.

૨૬૦. ન તેન થેરો સો હોતિ [થેરો હોતિ (સી. સ્યા.)], યેનસ્સ પલિતં સિરો;

પરિપક્કો વયો તસ્સ, ‘‘મોઘજિણ્ણો’’તિ વુચ્ચતિ.

૨૬૧. યમ્હિ સચ્ચઞ્ચ ધમ્મો ચ, અહિંસા સંયમો દમો;

સ વે વન્તમલો ધીરો, ‘‘થેરો’’ ઇતિ [સો થેરોતિ (સ્યા. ક.)] પવુચ્ચતિ.

૨૬૨. ન વાક્કરણમત્તેન, વણ્ણપોક્ખરતાય વા;

સાધુરૂપો નરો હોતિ, ઇસ્સુકી મચ્છરી સઠો.

૨૬૩. યસ્સ ચેતં સમુચ્છિન્નં, મૂલઘચ્ચં સમૂહતં;

સ વન્તદોસો મેધાવી, ‘‘સાધુરૂપો’’તિ વુચ્ચતિ.

૨૬૪. ન મુણ્ડકેન સમણો, અબ્બતો અલિકં ભણં;

ઇચ્છાલોભસમાપન્નો, સમણો કિં ભવિસ્સતિ.

૨૬૫. યો ચ સમેતિ પાપાનિ, અણું થૂલાનિ સબ્બસો;

સમિતત્તા હિ પાપાનં, ‘‘સમણો’’તિ પવુચ્ચતિ.

૨૬૬. ન તેન ભિક્ખુ સો હોતિ, યાવતા ભિક્ખતે પરે;

વિસ્સં ધમ્મં સમાદાય, ભિક્ખુ હોતિ ન તાવતા.

૨૬૭. યોધ પુઞ્ઞઞ્ચ પાપઞ્ચ, બાહેત્વા બ્રહ્મચરિયવા [બ્રહ્મચરિયં (ક.)];

સઙ્ખાય લોકે ચરતિ, સ વે ‘‘ભિક્ખૂ’’તિ વુચ્ચતિ.

૨૬૮. ન મોનેન મુની હોતિ, મૂળ્હરૂપો અવિદ્દસુ;

યો ચ તુલંવ પગ્ગય્હ, વરમાદાય પણ્ડિતો.

૨૬૯. પાપાનિ પરિવજ્જેતિ, સ મુની તેન સો મુનિ;

યો મુનાતિ ઉભો લોકે, ‘‘મુનિ’’ તેન પવુચ્ચતિ.

૨૭૦. ન તેન અરિયો હોતિ, યેન પાણાનિ હિંસતિ;

અહિંસા સબ્બપાણાનં, ‘‘અરિયો’’તિ પવુચ્ચતિ.

૨૭૧. ન સીલબ્બતમત્તેન, બાહુસચ્ચેન વા પન;

અથ વા સમાધિલાભેન, વિવિત્તસયનેન વા.

૨૭૨. ફુસામિ નેક્ખમ્મસુખં, અપુથુજ્જનસેવિતં;

ભિક્ખુ વિસ્સાસમાપાદિ, અપ્પત્તો આસવક્ખયં.

ધમ્મટ્ઠવગ્ગો એકૂનવીસતિમો નિટ્ઠિતો.