૨૦. મગ્ગવગ્ગો

૨૭૩. મગ્ગાનટ્ઠઙ્ગિકો સેટ્ઠો, સચ્ચાનં ચતુરો પદા;

વિરાગો સેટ્ઠો ધમ્માનં, દ્વિપદાનઞ્ચ ચક્ખુમા.

૨૭૪. એસેવ [એસોવ (સી. પી.)] મગ્ગો નત્થઞ્ઞો, દસ્સનસ્સ વિસુદ્ધિયા;

એતઞ્હિ તુમ્હે પટિપજ્જથ, મારસ્સેતં પમોહનં.

૨૭૫. એતઞ્હિ તુમ્હે પટિપન્ના, દુક્ખસ્સન્તં કરિસ્સથ;

અક્ખાતો વો [અક્ખાતો વે (સી. પી.)] મયા મગ્ગો, અઞ્ઞાય સલ્લકન્તનં [સલ્લસન્થનં (સી. પી.), સલ્લસત્થનં (સ્યા.)].

૨૭૬. તુમ્હેહિ કિચ્ચમાતપ્પં, અક્ખાતારો તથાગતા;

પટિપન્ના પમોક્ખન્તિ, ઝાયિનો મારબન્ધના.

૨૭૭. ‘‘સબ્બે સઙ્ખારા અનિચ્ચા’’તિ, યદા પઞ્ઞાય પસ્સતિ;

અથ નિબ્બિન્દતિ દુક્ખે, એસ મગ્ગો વિસુદ્ધિયા.

૨૭૮. ‘‘સબ્બે સઙ્ખારા દુક્ખા’’તિ, યદા પઞ્ઞાય પસ્સતિ;

અથ નિબ્બિન્દતિ દુક્ખે, એસ મગ્ગો વિસુદ્ધિયા.

૨૭૯. ‘‘સબ્બે ધમ્મા અનત્તા’’તિ, યદા પઞ્ઞાય પસ્સતિ;

અથ નિબ્બિન્દતિ દુક્ખે, એસ મગ્ગો વિસુદ્ધિયા.

૨૮૦. ઉટ્ઠાનકાલમ્હિ અનુટ્ઠહાનો, યુવા બલી આલસિયં ઉપેતો;

સંસન્નસઙ્કપ્પમનો [અસમ્પન્નસઙ્કપ્પમનો (ક.)] કુસીતો, પઞ્ઞાય મગ્ગં અલસો ન વિન્દતિ.

૨૮૧. વાચાનુરક્ખી મનસા સુસંવુતો, કાયેન ચ નાકુસલં કયિરા [અકુસલં ન કયિરા (સી. સ્યા. કં. પી.)];

એતે તયો કમ્મપથે વિસોધયે, આરાધયે મગ્ગમિસિપ્પવેદિતં.

૨૮૨. યોગા વે જાયતી [જાયતે (કત્થચિ)] ભૂરિ, અયોગા ભૂરિસઙ્ખયો;

એતં દ્વેધાપથં ઞત્વા, ભવાય વિભવાય ચ;

તથાત્તાનં નિવેસેય્ય, યથા ભૂરિ પવડ્ઢતિ.

૨૮૩. વનં છિન્દથ મા રુક્ખં, વનતો જાયતે ભયં;

છેત્વા વનઞ્ચ વનથઞ્ચ, નિબ્બના હોથ ભિક્ખવો.

૨૮૪. યાવ હિ વનથો ન છિજ્જતિ, અણુમત્તોપિ નરસ્સ નારિસુ;

પટિબદ્ધમનોવ [પટિબન્ધમનોવ (ક.)] તાવ સો, વચ્છો ખીરપકોવ [ખીરપાનોવ (પી.)] માતરિ.

૨૮૫. ઉચ્છિન્દ સિનેહમત્તનો કુમુદં સારદિકંવ [પાણિના];

સન્તિમગ્ગમેવ બ્રૂહય, નિબ્બાનં સુગતેન દેસિતં.

૨૮૬. ઇધ વસ્સં વસિસ્સામિ, ઇધ હેમન્તગિમ્હિસુ;

ઇતિ બાલો વિચિન્તેતિ, અન્તરાયં ન બુજ્ઝતિ.

૨૮૭. તં પુત્તપસુસમ્મત્તં, બ્યાસત્તમનસં નરં;

સુત્તં ગામં મહોઘોવ, મચ્ચુ આદાય ગચ્છતિ.

૨૮૮. ન સન્તિ પુત્તા તાણાય, ન પિતા નાપિ બન્ધવા;

અન્તકેનાધિપન્નસ્સ, નત્થિ ઞાતીસુ તાણતા.

૨૮૯. એતમત્થવસં ઞત્વા, પણ્ડિતો સીલસંવુતો;

નિબ્બાનગમનં મગ્ગં, ખિપ્પમેવ વિસોધયે.

મગ્ગવગ્ગો વીસતિમો નિટ્ઠિતો.