૧૮. મલવગ્ગો

૨૩૫. પણ્ડુપલાસોવ દાનિસિ, યમપુરિસાપિ ચ તે [તં (સી. સ્યા. કં. પી.)] ઉપટ્ઠિતા;

ઉય્યોગમુખે ચ તિટ્ઠસિ, પાથેય્યમ્પિ ચ તે ન વિજ્જતિ.

૨૩૬. સો કરોહિ દીપમત્તનો, ખિપ્પં વાયમ પણ્ડિતો ભવ;

નિદ્ધન્તમલો અનઙ્ગણો, દિબ્બં અરિયભૂમિં ઉપેહિસિ [દિબ્બં અરિયભૂમિમેહિસિ (સી. સ્યા. પી.), દિબ્બમરિયભૂમિં ઉપેહિસિ (?)].

૨૩૭. ઉપનીતવયો ચ દાનિસિ, સમ્પયાતોસિ યમસ્સ સન્તિકે;

વાસો [વાસોપિ ચ (બહૂસુ)] તે નત્થિ અન્તરા, પાથેય્યમ્પિ ચ તે ન વિજ્જતિ.

૨૩૮. સો કરોહિ દીપમત્તનો, ખિપ્પં વાયમ પણ્ડિતો ભવ;

નિદ્ધન્તમલો અનઙ્ગણો, ન પુનં જાતિજરં [ન પુન જાતિજરં (સી. સ્યા.), ન પુન જાતિજ્જરં (ક.)] ઉપેહિસિ.

૨૩૯. અનુપુબ્બેન મેધાવી, થોકં થોકં ખણે ખણે;

કમ્મારો રજતસ્સેવ, નિદ્ધમે મલમત્તનો.

૨૪૦. અયસાવ મલં સમુટ્ઠિતં [સમુટ્ઠાય (ક.)], તતુટ્ઠાય [તદુટ્ઠાય (સી. સ્યા. પી.)] તમેવ ખાદતિ;

એવં અતિધોનચારિનં, સાનિ કમ્માનિ [સકકમ્માનિ (સી. પી.)] નયન્તિ દુગ્ગતિં.

૨૪૧. અસજ્ઝાયમલા મન્તા, અનુટ્ઠાનમલા ઘરા;

મલં વણ્ણસ્સ કોસજ્જં, પમાદો રક્ખતો મલં.

૨૪૨. મલિત્થિયા દુચ્ચરિતં, મચ્છેરં દદતો મલં;

મલા વે પાપકા ધમ્મા, અસ્મિં લોકે પરમ્હિ ચ.

૨૪૩. તતો મલા મલતરં, અવિજ્જા પરમં મલં;

એતં મલં પહન્ત્વાન, નિમ્મલા હોથ ભિક્ખવો.

૨૪૪. સુજીવં અહિરિકેન, કાકસૂરેન ધંસિના;

પક્ખન્દિના પગબ્ભેન, સંકિલિટ્ઠેન જીવિતં.

૨૪૫. હિરીમતા ચ દુજ્જીવં, નિચ્ચં સુચિગવેસિના;

અલીનેનાપ્પગબ્ભેન, સુદ્ધાજીવેન પસ્સતા.

૨૪૬. યો પાણમતિપાતેતિ, મુસાવાદઞ્ચ ભાસતિ;

લોકે અદિન્નમાદિયતિ, પરદારઞ્ચ ગચ્છતિ.

૨૪૭. સુરામેરયપાનઞ્ચ, યો નરો અનુયુઞ્જતિ;

ઇધેવમેસો લોકસ્મિં, મૂલં ખણતિ અત્તનો.

૨૪૮. એવં ભો પુરિસ જાનાહિ, પાપધમ્મા અસઞ્ઞતા;

મા તં લોભો અધમ્મો ચ, ચિરં દુક્ખાય રન્ધયું.

૨૪૯. દદાતિ વે યથાસદ્ધં, યથાપસાદનં [યત્થ પસાદનં (કત્થચિ)] જનો;

તત્થ યો મઙ્કુ ભવતિ [તત્થ ચે મંકુ યો હોતિ (સી.), તત્થ યો મઙ્કુતો હોતિ (સ્યા.)], પરેસં પાનભોજને;

ન સો દિવા વા રત્તિં વા, સમાધિમધિગચ્છતિ.

૨૫૦. યસ્સ ચેતં સમુચ્છિન્નં, મૂલઘચ્ચં [મૂલઘચ્છં (ક.)] સમૂહતં;

સ વે દિવા વા રત્તિં વા, સમાધિમધિગચ્છતિ.

૨૫૧. નત્થિ રાગસમો અગ્ગિ, નત્થિ દોસસમો ગહો;

નત્થિ મોહસમં જાલં, નત્થિ તણ્હાસમા નદી.

૨૫૨. સુદસ્સં વજ્જમઞ્ઞેસં, અત્તનો પન દુદ્દસં;

પરેસં હિ સો વજ્જાનિ, ઓપુનાતિ [ઓફુનાતિ (ક.)] યથા ભુસં;

અત્તનો પન છાદેતિ, કલિંવ કિતવા સઠો.

૨૫૩. પરવજ્જાનુપસ્સિસ્સ, નિચ્ચં ઉજ્ઝાનસઞ્ઞિનો;

આસવા તસ્સ વડ્ઢન્તિ, આરા સો આસવક્ખયા.

૨૫૪. આકાસેવ પદં નત્થિ, સમણો નત્થિ બાહિરે;

પપઞ્ચાભિરતા પજા, નિપ્પપઞ્ચા તથાગતા.

૨૫૫. આકાસેવ પદં નત્થિ, સમણો નત્થિ બાહિરે;

સઙ્ખારા સસ્સતા નત્થિ, નત્થિ બુદ્ધાનમિઞ્જિતં.

મલવગ્ગો અટ્ઠારસમો નિટ્ઠિતો.