૧૭. કોધવગ્ગો

૨૨૧. કોધં જહે વિપ્પજહેય્ય માનં, સંયોજનં સબ્બમતિક્કમેય્ય;

તં નામરૂપસ્મિમસજ્જમાનં, અકિઞ્ચનં નાનુપતન્તિ દુક્ખા.

૨૨૨. યો વે ઉપ્પતિતં કોધં, રથં ભન્તંવ વારયે [ધારયે (સી. સ્યા. પી.)];

તમહં સારથિં બ્રૂમિ, રસ્મિગ્ગાહો ઇતરો જનો.

૨૨૩. અક્કોધેન જિને કોધં, અસાધું સાધુના જિને;

જિને કદરિયં દાનેન, સચ્ચેનાલિકવાદિનં.

૨૨૪. સચ્ચં ભણે ન કુજ્ઝેય્ય, દજ્જા અપ્પમ્પિ [દજ્જા’પ્પસ્મિમ્પિ (સી. પી.), દજ્જા અપ્પસ્મિ (સ્યા. ક.)] યાચિતો;

એતેહિ તીહિ ઠાનેહિ, ગચ્છે દેવાન સન્તિકે.

૨૨૫. અહિંસકા યે મુનયો [અહિંસકાયા મુનયો (ક.)], નિચ્ચં કાયેન સંવુતા;

તે યન્તિ અચ્ચુતં ઠાનં, યત્થ ગન્ત્વા ન સોચરે.

૨૨૬. સદા જાગરમાનાનં, અહોરત્તાનુસિક્ખિનં;

નિબ્બાનં અધિમુત્તાનં, અત્થં ગચ્છન્તિ આસવા.

૨૨૭. પોરાણમેતં અતુલ, નેતં અજ્જતનામિવ;

નિન્દન્તિ તુણ્હિમાસીનં, નિન્દન્તિ બહુભાણિનં;

મિતભાણિમ્પિ નિન્દન્તિ, નત્થિ લોકે અનિન્દિતો.

૨૨૮. ન ચાહુ ન ચ ભવિસ્સતિ, ન ચેતરહિ વિજ્જતિ;

એકન્તં નિન્દિતો પોસો, એકન્તં વા પસંસિતો.

૨૨૯. યં ચે વિઞ્ઞૂ પસંસન્તિ, અનુવિચ્ચ સુવે સુવે;

અચ્છિદ્દવુત્તિં [અચ્છિન્નવુત્તિં (ક.)] મેધાવિં, પઞ્ઞાસીલસમાહિતં.

૨૩૦. નિક્ખં [નેક્ખં (સી. સ્યા. પી.)] જમ્બોનદસ્સેવ, કો તં નિન્દિતુમરહતિ;

દેવાપિ નં પસંસન્તિ, બ્રહ્મુનાપિ પસંસિતો.

૨૩૧. કાયપ્પકોપં રક્ખેય્ય, કાયેન સંવુતો સિયા;

કાયદુચ્ચરિતં હિત્વા, કાયેન સુચરિતં ચરે.

૨૩૨. વચીપકોપં રક્ખેય્ય, વાચાય સંવુતો સિયા;

વચીદુચ્ચરિતં હિત્વા, વાચાય સુચરિતં ચરે.

૨૩૩. મનોપકોપં રક્ખેય્ય, મનસા સંવુતો સિયા;

મનોદુચ્ચરિતં હિત્વા, મનસા સુચરિતં ચરે.

૨૩૪. કાયેન સંવુતા ધીરા, અથો વાચાય સંવુતા;

મનસા સંવુતા ધીરા, તે વે સુપરિસંવુતા.

કોધવગ્ગો સત્તરસમો નિટ્ઠિતો.