૧૬. પિયવગ્ગો

૨૦૯. અયોગે યુઞ્જમત્તાનં, યોગસ્મિઞ્ચ અયોજયં;

અત્થં હિત્વા પિયગ્ગાહી, પિહેતત્તાનુયોગિનં.

૨૧૦. મા પિયેહિ સમાગઞ્છિ, અપ્પિયેહિ કુદાચનં;

પિયાનં અદસ્સનં દુક્ખં, અપ્પિયાનઞ્ચ દસ્સનં.

૨૧૧. તસ્મા પિયં ન કયિરાથ, પિયાપાયો હિ પાપકો;

ગન્થા તેસં ન વિજ્જન્તિ, યેસં નત્થિ પિયાપ્પિયં.

૨૧૨. પિયતો જાયતી સોકો, પિયતો જાયતી [જાયતે (ક.)] ભયં;

પિયતો વિપ્પમુત્તસ્સ, નત્થિ સોકો કુતો ભયં.

૨૧૩. પેમતો જાયતી સોકો, પેમતો જાયતી ભયં;

પેમતો વિપ્પમુત્તસ્સ, નત્થિ સોકો કુતો ભયં.

૨૧૪. રતિયા જાયતી સોકો, રતિયા જાયતી ભયં;

રતિયા વિપ્પમુત્તસ્સ, નત્થિ સોકો કુતો ભયં.

૨૧૫. કામતો જાયતી સોકો, કામતો જાયતી ભયં;

કામતો વિપ્પમુત્તસ્સ, નત્થિ સોકો કુતો ભયં.

૨૧૬. તણ્હાય જાયતી [જાયતે (ક.)] સોકો, તણ્હાય જાયતી ભયં;

તણ્હાય વિપ્પમુત્તસ્સ, નત્થિ સોકો કુતો ભયં.

૨૧૭. સીલદસ્સનસમ્પન્નં, ધમ્મટ્ઠં સચ્ચવેદિનં;

અત્તનો કમ્મ કુબ્બાનં, તં જનો કુરુતે પિયં.

૨૧૮. છન્દજાતો અનક્ખાતે, મનસા ચ ફુટો સિયા;

કામેસુ ચ અપ્પટિબદ્ધચિત્તો [અપ્પટિબન્ધચિત્તો (ક.)], ઉદ્ધંસોતોતિ વુચ્ચતિ.

૨૧૯. ચિરપ્પવાસિં પુરિસં, દૂરતો સોત્થિમાગતં;

ઞાતિમિત્તા સુહજ્જા ચ, અભિનન્દન્તિ આગતં.

૨૨૦. તથેવ કતપુઞ્ઞમ્પિ, અસ્મા લોકા પરં ગતં;

પુઞ્ઞાનિ પટિગણ્હન્તિ, પિયં ઞાતીવ આગતં.

પિયવગ્ગો સોળસમો નિટ્ઠિતો.