૮. ધમ્મદેવપુત્તચરિયા

૬૬. ‘‘પુનાપરં યદા હોમિ, મહાપક્ખો મહિદ્ધિકો;

ધમ્મો નામ મહાયક્ખો, સબ્બલોકાનુકમ્પકો.

૬૭. ‘‘દસકુસલકમ્મપથે, સમાદપેન્તો મહાજનં;

ચરામિ ગામનિગમં, સમિત્તો સપરિજ્જનો.

૬૮. ‘‘પાપો કદરિયો યક્ખો, દીપેન્તો દસ પાપકે;

સોપેત્થ મહિયા ચરતિ, સમિત્તો સપરિજ્જનો.

૬૯. ‘‘ધમ્મવાદી અધમ્મો ચ, ઉભો પચ્ચનિકા મયં;

ધુરે ધુરં ઘટ્ટયન્તા, સમિમ્હા પટિપથે ઉભો.

૭૦. ‘‘કલહો વત્તતી ભેસ્મા, કલ્યાણપાપકસ્સ ચ;

મગ્ગા ઓક્કમનત્થાય, મહાયુદ્ધો ઉપટ્ઠિતો.

૭૧. ‘‘યદિહં તસ્સ કુપ્પેય્યં, યદિ ભિન્દે તપોગુણં;

સહપરિજનં તસ્સ, રજભૂતં કરેય્યહં.

૭૨. ‘‘અપિચાહં સીલરક્ખાય, નિબ્બાપેત્વાન માનસં;

સહ જનેનોક્કમિત્વા, પથં પાપસ્સ દાસહં.

૭૩. ‘‘સહ પથતો ઓક્કન્તે, કત્વા ચિત્તસ્સ નિબ્બુતિં;

વિવરં અદાસિ પથવી, પાપયક્ખસ્સ તાવદે’’તિ.

ધમ્મદેવપુત્તચરિયં અટ્ઠમં.