૫. મહિંસરાજચરિયા

૩૭. ‘‘પુનાપરં યદા હોમિ, મહિંસો પવનચારકો;

પવડ્ઢકાયો બલવા, મહન્તો ભીમદસ્સનો.

૩૮. ‘‘પબ્ભારે ગિરિદુગ્ગે [વનદુગ્ગે (સી.)] ચ, રુક્ખમૂલે દકાસયે;

હોતેત્થ ઠાનં મહિંસાનં, કોચિ કોચિ તહિં તહિં.

૩૯. ‘‘વિચરન્તો બ્રહારઞ્ઞે, ઠાનં અદ્દસ ભદ્દકં;

તં ઠાનં ઉપગન્ત્વાન, તિટ્ઠામિ ચ સયામિ ચ.

૪૦. ‘‘અથેત્થ કપિમાગન્ત્વા, પાપો અનરિયો લહુ;

ખન્ધે નલાટે ભમુકે, મુત્તેતિ ઓહનેતિતં.

૪૧. ‘‘સકિમ્પિ દિવસં દુતિયં, તતિયં ચતુત્થમ્પિ ચ;

દૂસેતિ મં સબ્બકાલં, તેન હોમિ ઉપદ્દુતો.

૪૨. ‘‘મમં ઉપદ્દુતં દિસ્વા, યક્ખો મં ઇદમબ્રવિ;

‘નાસેહેતં છવં પાપં, સિઙ્ગેહિ ચ ખુરેહિ ચ’.

૪૩. ‘‘એવં વુત્તે તદા યક્ખે, અહં તં ઇદમબ્રવિં;

‘કિં ત્વં મક્ખેસિ કુણપેન, પાપેન અનરિયેન મં.

૪૪. ‘‘‘યદિહં તસ્સ પકુપ્પેય્યં, તતો હીનતરો ભવે;

સીલઞ્ચ મે પભિજ્જેય્ય, વિઞ્ઞૂ ચ ગરહેય્યુ મં.

૪૫. ‘‘‘હીળિતા જીવિતા વાપિ, પરિસુદ્ધેન મતં વરં;

ક્યાહં જીવિતહેતૂપિ, કાહામિં પરહેઠનં’.

૪૬. ‘‘મમેવાયં મઞ્ઞમાનો, અઞ્ઞેપેવં કરિસ્સતિ;

તેવ તસ્સ વધિસ્સન્તિ, સા મે મુત્તિ ભવિસ્સતિ.

૪૭. ‘‘હીનમજ્ઝિમઉક્કટ્ઠે, સહન્તો અવમાનિતં;

એવં લભતિ સપ્પઞ્ઞો, મનસા યથા પત્થિત’’ન્તિ.

મહિંસરાજચરિયં પઞ્ચમં.