૧૦. સસપણ્ડિતચરિયા

૧૨૫. ‘‘પુનાપરં યદા હોમિ, સસકો પવનચારકો;

તિણપણ્ણસાકફલભક્ખો, પરહેઠનવિવજ્જિતો.

૧૨૬. ‘‘મક્કટો ચ સિઙ્ગાલો ચ, સુત્તપોતો ચહં તદા;

વસામ એકસામન્તા, સાયં પાતો ચ દિસ્સરે [સાયં પાતો પદિસ્સરે (ક.)].

૧૨૭. ‘‘અહં તે અનુસાસામિ, કિરિયે કલ્યાણપાપકે;

‘પાપાનિ પરિવજ્જેથ, કલ્યાણે અભિનિવિસ્સથ’.

૧૨૮. ‘‘ઉપોસથમ્હિ દિવસે, ચન્દં દિસ્વાન પૂરિતં;

એતેસં તત્થ આચિક્ખિં, દિવસો અજ્જુપોસથો.

૧૨૯. ‘‘દાનાનિ પટિયાદેથ, દક્ખિણેય્યસ્સ દાતવે;

દત્વા દાનં દક્ખિણેય્યે, ઉપવસ્સથુપોસથં.

૧૩૦. ‘‘તે મે સાધૂતિ વત્વાન, યથાસત્તિ યથાબલં;

દાનાનિ પટિયાદેત્વા, દક્ખિણેય્યં ગવેસિસું [ગવેસય્યું (ક.)].

૧૩૧. ‘‘અહં નિસજ્જ ચિન્તેસિં, દાનં દક્ખિણનુચ્છવં;

‘યદિહં લભે દક્ખિણેય્યં, કિં મે દાનં ભવિસ્સતિ.

૧૩૨. ‘‘‘ન મે અત્થિ તિલા મુગ્ગા, માસા વા તણ્ડુલા ઘતં;

અહં તિણેન યાપેમિ, ન સક્કા તિણ દાતવે.

૧૩૩. ‘‘‘યદિ કોચિ એતિ દક્ખિણેય્યો, ભિક્ખાય મમ સન્તિકે;

દજ્જાહં સકમત્તાનં, ન સો તુચ્છો ગમિસ્સતિ’.

૧૩૪. ‘‘મમ સઙ્કપ્પમઞ્ઞાય, સક્કો બ્રાહ્મણવણ્ણિના;

આસયં મે ઉપાગચ્છિ, દાનવીમંસનાય મે.

૧૩૫. ‘‘તમહં દિસ્વાન સન્તુટ્ઠો, ઇદં વચનમબ્રવિં;

‘સાધુ ખોસિ અનુપ્પત્તો, ઘાસહેતુ મમન્તિકે.

૧૩૬. ‘‘‘અદિન્નપુબ્બં દાનવરં, અજ્જ દસ્સામિ તે અહં;

તુવં સીલગુણૂપેતો, અયુત્તં તે પરહેઠનં.

૧૩૭. ‘‘‘એહિ અગ્ગિં પદીપેહિ, નાનાકટ્ઠે સમાનય;

અહં પચિસ્સમત્તાનં, પક્કં ત્વં ભક્ખયિસ્સસિ’.

૧૩૮. ‘‘‘સાધૂ’તિ સો હટ્ઠમનો, નાનાકટ્ઠે સમાનયિ;

મહન્તં અકાસિ ચિતકં, કત્વા અઙ્ગારગબ્ભકં.

૧૩૯. ‘‘અગ્ગિં તત્થ પદીપેસિ, યથા સો ખિપ્પં મહા ભવે;

ફોટેત્વા રજગતે ગત્તે, એકમન્તં ઉપાવિસિં.

૧૪૦. ‘‘યદા મહાકટ્ઠપુઞ્જો, આદિત્તો ધમધમાયતિ [ધુમધુમાયતિ (સી.), ધમમાયતિ (ક.)];

તદુપ્પતિત્વા પપતિં, મજ્ઝે જાલસિખન્તરે.

૧૪૧. ‘‘યથા સીતોદકં નામ, પવિટ્ઠં યસ્સ કસ્સચિ;

સમેતિ દરથપરિળાહં, અસ્સાદં દેતિ પીતિ ચ.

૧૪૨. ‘‘તથેવ જલિતં અગ્ગિં, પવિટ્ઠસ્સ મમં તદા;

સબ્બં સમેતિ દરથં, યથા સીતોદકં વિય.

૧૪૩. ‘‘છવિં ચમ્મં મંસં ન્હારું, અટ્ઠિં હદયબન્ધનં;

કેવલં સકલં કાયં, બ્રાહ્મણસ્સ અદાસહ’’ન્તિ.

સસપણ્ડિતચરિયં દસમં.

અકિત્તિવગ્ગો પઠમો.

તસ્સુદ્દાનં –

અકિત્તિબ્રાહ્મણો સઙ્ખો, કુરુરાજા ધનઞ્ચયો;

મહાસુદસ્સનો રાજા, મહાગોવિન્દબ્રાહ્મણો.

નિમિ ચન્દકુમારો ચ, સિવિ વેસ્સન્તરો સસો;

અહમેવ તદા આસિં, યો તે દાનવરે અદા.

એતે દાનપરિક્ખારા, એતે દાનસ્સ પારમી;

જીવિતં યાચકે દત્વા, ઇમં પારમિ પૂરયિં.

ભિક્ખાય ઉપગતં દિસ્વા, સકત્તાનં પરિચ્ચજિં;

દાનેન મે સમો નત્થિ, એસા મે દાનપારમીતિ.

દાનપારમિનિદ્દેસો નિટ્ઠિતો.