૨. ગતસઞ્ઞકત્થેરઅપદાનં

૧૦. ‘‘જાતિયા સત્તવસ્સોહં, પબ્બજિં અનગારિયં;

અવન્દિં સત્થુનો પાદે, વિપ્પસન્નેન ચેતસા.

૧૧. ‘‘સત્તનઙ્ગલકીપુપ્ફે, આકાસે ઉક્ખિપિં અહં;

તિસ્સં બુદ્ધં સમુદ્દિસ્સ, અનન્તગુણસાગરં.

૧૨. ‘‘સુગતાનુગતં મગ્ગં, પૂજેત્વા હટ્ઠમાનસો;

અઞ્જલિઞ્ચ [અઞ્જલિસ્સ (ક.)] તદાકાસિં, પસન્નો સેહિ પાણિભિ.

૧૩. ‘‘દ્વેનવુતે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

૧૪. ‘‘ઇતો અટ્ઠમકે કપ્પે, તયો અગ્ગિસિખા અહુ;

સત્તરતનસમ્પન્ના, ચક્કવત્તી મહબ્બલા.

૧૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ગતસઞ્ઞકો થેરો ઇમા ગાથાયો અભાસિત્થાતિ.

ગતસઞ્ઞકત્થેરસ્સાપદાનં દુતિયં.