૧. તિમિરપુપ્ફિયત્થેરઅપદાનં

૧. ‘‘ચન્દભાગાનદીતીરે, અનુસોતં વજામહં;

નિસિન્નં સમણં દિસ્વા, વિપ્પસન્નમનાવિલં.

૨. ‘‘તત્થ ચિત્તં પસાદેત્વા [પસાદેસિં (સ્યા.)], એવં ચિન્તેસહં તદા;

તારયિસ્સતિ તિણ્ણોયં, દન્તોયં દમયિસ્સતિ.

૩. ‘‘અસ્સાસિસ્સતિ અસ્સત્થો, સન્તો ચ સમયિસ્સતિ;

મોચયિસ્સતિ મુત્તો ચ, નિબ્બાપેસ્સતિ નિબ્બુતો.

૪. ‘‘એવાહં ચિન્તયિત્વાન, સિદ્ધત્થસ્સ મહેસિનો;

ગહેત્વા તિમિરપુપ્ફં, મત્થકે ઓકિરિં અહં [તદા (સ્યા.)].

૫. ‘‘અઞ્જલિં પગ્ગહેત્વાન, કત્વા ચ નં પદક્ખિણં;

વન્દિત્વા સત્થુનો પાદે, પક્કામિં અપરં દિસં.

૬. ‘‘અચિરં ગતમત્તં મં, મિગરાજા વિહેઠયિ;

પપાતમનુગચ્છન્તો, તત્થેવ પપતિં અહં.

૭. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, પુપ્ફપૂજાયિદં [બુદ્ધપૂજાયિદં (સી. સ્યા.)] ફલં.

૮. ‘‘છપ્પઞ્ઞાસમ્હિ કપ્પમ્હિ, સત્તેવાસું મહાયસા [મહારહા (સ્યા. ક.)];

સત્તરતનસમ્પન્ના, ચક્કવત્તી મહબ્બલા.

૯. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા તિમિરપુપ્ફિયો થેરો ઇમા ગાથાયો અભાસિત્થાતિ.

તિમિરપુપ્ફિયત્થેરસ્સાપદાનં પઠમં.