૮. પાટલિપુપ્ફિયત્થેરઅપદાનં

૩૬. ‘‘સુવણ્ણવણ્ણં સમ્બુદ્ધં, ગચ્છન્તં અન્તરાપણે;

કઞ્ચનગ્ઘિયસઙ્કાસં, બાત્તિંસવરલક્ખણં.

૩૭. ‘‘સેટ્ઠિપુત્તો તદા આસિં, સુખુમાલો સુખેધિતો;

ઉચ્છઙ્ગે પાટલિપુપ્ફં, કત્વાન [કત્વા તં (સી. સ્યા.)] અભિસંહરિં.

૩૮. ‘‘હટ્ઠો હટ્ઠેન ચિત્તેન, પુપ્ફેહિ અભિપૂજયિં;

તિસ્સં લોકવિદું નાથં, નરદેવં નમસ્સહં.

૩૯. ‘‘દ્વેનવુતે ઇતો કપ્પે, યં કમ્મમકરિં તદા;

દુગ્ગતિં નાભિજાનામિ, પુપ્ફપૂજાયિદં ફલં.

૪૦. ‘‘ઇતો તેસટ્ઠિકપ્પમ્હિ, અભિસમ્મતનામકો;

સત્તરતનસમ્પન્નો, ચક્કવત્તી મહબ્બલો.

૪૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પાટલિપુપ્ફિયો થેરો ઇમા ગાથાયો અભાસિત્થાતિ.

પાટલિપુપ્ફિયત્થેરસ્સાપદાનં અટ્ઠમં.