૧૦. ઉપવાનત્થેરઅપદાનં

૧૨૨. ‘‘પદુમુત્તરો નામ જિનો, સબ્બધમ્માન પારગૂ;

જલિત્વા અગ્ગિક્ખન્ધોવ, સમ્બુદ્ધો પરિનિબ્બુતો.

૧૨૩. ‘‘મહાજના સમાગમ્મ, પૂજયિત્વા તથાગતં;

ચિતં કત્વાન સુગતં, સરીરં અભિરોપયું.

૧૨૪. ‘‘સરીરકિચ્ચં કત્વાન, ધાતું તત્થ સમાનયું;

સદેવમનુસ્સા સબ્બે, બુદ્ધથૂપં અકંસુ તે.

૧૨૫. ‘‘પઠમા કઞ્ચનમયા, દુતિયા ચ મણિમયા;

તતિયા રૂપિયમયા, ચતુત્થી ફલિકામયા.

૧૨૬. ‘‘તત્થ પઞ્ચમિકા ચેવ [તત્થ પઞ્ચમિકા ચેતિ (સી.)], લોહિતઙ્કમયા અહુ;

છટ્ઠા મસારગલ્લસ્સ, સબ્બં રતનમયૂપરિ.

૧૨૭. ‘‘જઙ્ઘા મણિમયા આસિ, વેદિકા રતનામયા;

સબ્બસોણ્ણમયો થૂપો, ઉદ્ધં યોજનમુગ્ગતો.

૧૨૮. ‘‘દેવા તત્થ સમાગન્ત્વા, એકતો મન્તયું તદા;

‘મયમ્પિ થૂપં કસ્સામ, લોકનાથસ્સ તાદિનો.

૧૨૯. ‘‘‘ધાતુ આવેણિકા નત્થિ, સરીરં એકપિણ્ડિતં;

ઇમમ્હિ બુદ્ધથૂપમ્હિ, કસ્સામ કઞ્ચુકં મયં’.

૧૩૦. ‘‘દેવા સત્તહિ રત્નેહિ, અઞ્ઞં વડ્ઢેસું યોજનં;

થૂપો દ્વિયોજનુબ્બેધો, તિમિરં બ્યપહન્તિ સો.

૧૩૧. ‘‘નાગા તત્થ સમાગન્ત્વા, એકતો મન્તયું તદા;

‘મનુસ્સા ચેવ દેવા ચ, બુદ્ધથૂપં અકંસુ તે.

૧૩૨. ‘‘‘મા નો પમત્તા અસ્સુમ્હ, અપ્પમત્તા સદેવકા;

મયમ્પિ થૂપં કસ્સામ, લોકનાથસ્સ તાદિનો’.

૧૩૩. ‘‘ઇન્દનીલં મહાનીલં, અથો જોતિરસં મણિં;

એકતો સન્નિપાતેત્વા, બુદ્ધથૂપં અછાદયું.

૧૩૪. ‘‘સબ્બં મણિમયં આસિ, યાવતા [તાવતા (ક.)] બુદ્ધચેતિયં;

તિયોજનસમુબ્બેધં, આલોકકરણં તદા.

૧૩૫. ‘‘ગરુળા ચ સમાગન્ત્વા, એકતો મન્તયું તદા;

‘મનુસ્સા દેવનાગા ચ, બુદ્ધપૂજં અકંસુ તે.

૧૩૬. ‘‘‘મા નો પમત્તા અસ્સુમ્હ, અપ્પમત્તા સદેવકા;

મયમ્પિ થૂપં કસ્સામ, લોકનાથસ્સ તાદિનો’.

૧૩૭. ‘‘સબ્બં મણિમયં થૂપં, અકરું તે ચ કઞ્ચુકં;

યોજનં તેપિ વડ્ઢેસું, આયતં બુદ્ધચેતિયં.

૧૩૮. ‘‘ચતુયોજનમુબ્બેધો, બુદ્ધથૂપો વિરોચતિ;

ઓભાસેતિ દિસા સબ્બા, સતરંસીવ ઉગ્ગતો.

૧૩૯. ‘‘કુમ્ભણ્ડા ચ સમાગન્ત્વા, એકતો મન્તયું તદા;

‘મનુસ્સા ચેવ દેવા ચ, નાગા ચ ગરુળા તથા.

૧૪૦. ‘‘‘પચ્ચેકં બુદ્ધસેટ્ઠસ્સ, અકંસુ થૂપમુત્તમં;

મા નો પમત્તા અસ્સુમ્હ, અપ્પમત્તા સદેવકા.

૧૪૧. ‘‘‘મયમ્પિ થૂપં કસ્સામ, લોકનાથસ્સ તાદિનો;

રતનેહિ છાદેસ્સામ, આયતં બુદ્ધચેતિયં’.

૧૪૨. ‘‘યોજનં તેપિ વડ્ઢેસું, આયતં બુદ્ધચેતિયં;

પઞ્ચયોજનમુબ્બેધો, થૂપો ઓભાસતે તદા.

૧૪૩. ‘‘યક્ખા તત્થ સમાગન્ત્વા, એકતો મન્તયું તદા;

‘મનુસ્સા દેવનાગા ચ, ગરુળા ચ કુમ્ભણ્ડકા.

૧૪૪. ‘‘‘પચ્ચેકં બુદ્ધસેટ્ઠસ્સ, અકંસુ થૂપમુત્તમં;

મા નો પમત્તા અસ્સુમ્હ, અપ્પમત્તા સદેવકા.

૧૪૫. ‘‘‘મયમ્પિ થૂપં કસ્સામ, લોકનાથસ્સ તાદિનો;

ફલિકા છાદયિસ્સામ, આયતં બુદ્ધચેતિયં’.

૧૪૬. ‘‘યોજનં તેપિ વડ્ઢેસું, આયતં બુદ્ધચેતિયં;

છયોજનિકમુબ્બેધો, થૂપો ઓભાસતે તદા.

૧૪૭. ‘‘ગન્ધબ્બા ચ સમાગન્ત્વા, એકતો મન્તયું તદા;

‘મનુજા દેવતા નાગા, કુમ્ભણ્ડા ગરુળા તથા [કુમ્ભણ્ડા ચ યક્ખા તથા (સી.)].

૧૪૮. ‘‘‘સબ્બે અકંસુ બુદ્ધથૂપં, મયમેત્થ અકારકા;

મયમ્પિ થૂપં કસ્સામ, લોકનાથસ્સ તાદિનો’.

૧૪૯. ‘‘વેદિયો સત્ત કત્વાન, ધજં છત્તં અકંસુ તે;

સબ્બસોણ્ણમયં થૂપં, ગન્ધબ્બા કારયું તદા.

૧૫૦. ‘‘સત્તયોજનમુબ્બેધો, થૂપો ઓભાસતે તદા;

રત્તિન્દિવા ન ઞાયન્તિ, આલોકો હોતિ સબ્બદા.

૧૫૧. ‘‘અભિભોન્તિ ન તસ્સાભા, ચન્દસૂરા સતારકા;

સમન્તા યોજનસતે, પદીપોપિ ન પજ્જલિ.

૧૫૨. ‘‘તેન કાલેન યે કેચિ, થૂપં પૂજેન્તિ માનુસા;

ન તે થૂપં આરુહન્તિ, અમ્બરે ઉક્ખિપન્તિ તે.

૧૫૩. ‘‘દેવેહિ ઠપિતો યક્ખો, અભિસમ્મતનામકો;

ધજં વા પુપ્ફદામં વા, અભિરોપેતિ ઉત્તરિં.

૧૫૪. ‘‘ન તે પસ્સન્તિ તં યક્ખં, દામં પસ્સન્તિ ગચ્છતો;

એવં પસ્સિત્વા ગચ્છન્તા, સબ્બે ગચ્છન્તિ સુગ્ગતિં.

૧૫૫. ‘‘વિરુદ્ધા યે પાવચને, પસન્ના યે ચ સાસને;

પાટિહીરં દટ્ઠુકામા, થૂપં પૂજેન્તિ માનુસા.

૧૫૬. ‘‘નગરે હંસવતિયા, અહોસિં ભતકો તદા;

આમોદિતં જનં દિસ્વા, એવં ચિન્તેસહં તદા.

૧૫૭. ‘‘‘ઉળારો ભગવા નેસો, યસ્સ ધાતુઘરે દિસં;

ઇમા ચ જનતા તુટ્ઠા, કારં કુબ્બં ન તપ્પરે.

૧૫૮. ‘‘‘અહમ્પિ કારં કસ્સામિ, લોકનાથસ્સ તાદિનો;

તસ્સ ધમ્મેસુ દાયાદો, ભવિસ્સામિ અનાગતે’.

૧૫૯. ‘‘સુધોતં રજકેનાહં, ઉત્તરેય્યં પટં મમ;

વેળગ્ગે આલગ્ગેત્વાન, ધજં ઉક્ખિપિમમ્બરે.

૧૬૦. ‘‘અભિસમ્મતકો ગય્હ, અમ્બરે હાસિ મે ધજં;

વાતેરિતં ધજં દિસ્વા, ભિય્યો હાસં જનેસહં.

૧૬૧. ‘‘તત્થ ચિત્તં પસાદેત્વા, સમણં ઉપસઙ્કમિં;

તં ભિક્ખું અભિવાદેત્વા, વિપાકં પુચ્છહં ધજે.

૧૬૨. ‘‘સો મે કથેસિ આનન્દી, પીતિસઞ્જનનં મમ;

‘તસ્સ ધજસ્સ વિપાકં, અનુભોસ્સસિ સબ્બદા.

૧૬૩. ‘‘‘હત્થિઅસ્સરથાપત્તી, સેના ચ ચતુરઙ્ગિની;

પરિવારેસ્સન્તિ તં નિચ્ચં, ધજદાનસ્સિદં ફલં.

૧૬૪. ‘‘‘સટ્ઠિતુરિયસહસ્સાનિ, ભેરિયો સમલઙ્કતા;

પરિવારેસ્સન્તિ તં નિચ્ચં, ધજદાનસ્સિદં ફલં.

૧૬૫. ‘‘‘છળસીતિસહસ્સાનિ, નારિયો સમલઙ્કતા;

વિચિત્તવત્થાભરણા, આમુક્કમણિકુણ્ડલા.

૧૬૬. ‘‘‘આળારપમ્હા હસુલા, સુસઞ્ઞા [સુત્થના (સી.) અપ. થેર ૨.૪૮.૧૯ મણિપૂજકત્થેરાપદાનેપિ] તનુમજ્ઝિમા;

પરિવારેસ્સન્તિ તં નિચ્ચં, ધજદાનસ્સિદં ફલં.

૧૬૭. ‘‘‘તિંસકપ્પસહસ્સાનિ, દેવલોકે રમિસ્સસિ;

અસીતિક્ખત્તું દેવિન્દો, દેવરજ્જં કરિસ્સસિ.

૧૬૮. ‘‘‘સહસ્સક્ખત્તું રાજા ચ, ચક્કવત્તી ભવિસ્સતિ;

પદેસરજ્જં વિપુલં, ગણનાતો અસઙ્ખિયં.

૧૬૯. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૭૦. ‘‘‘દેવલોકા ચવિત્વાન, સુક્કમૂલેન ચોદિતો;

પુઞ્ઞકમ્મેન સઞ્ઞુત્તો, બ્રહ્મબન્ધુ ભવિસ્સસિ.

૧૭૧. ‘‘‘અસીતિકોટિં છડ્ડેત્વા, દાસે કમ્મકરે બહૂ;

ગોતમસ્સ ભગવતો, સાસને પબ્બજિસ્સસિ.

૧૭૨. ‘‘‘આરાધયિત્વા સમ્બુદ્ધં, ગોતમં સક્યપુઙ્ગવં;

ઉપવાનોતિ નામેન, હેસ્સસિ સત્થુ સાવકો’.

૧૭૩. ‘‘સતસહસ્સે કતં કમ્મં, ફલં દસ્સેસિ મે ઇધ;

સુમુત્તો સરવેગોવ, કિલેસે ઝાપયિં [કિલેસા ઝાપિતા (સી.)] મમ.

૧૭૪. ‘‘ચક્કવત્તિસ્સ સન્તસ્સ, ચાતુદ્દીપિસ્સરસ્સ મે;

તીણિ યોજનાનિ સામન્તા, ઉસ્સીયન્તિ ધજા સદા.

૧૭૫. ‘‘સતસહસ્સિતો કપ્પે, યં કમ્મમકરિં તદા;

દુગ્ગતિં નાભિજાનામિ, ધજદાનસ્સિદં ફલં.

૧૭૬. ‘‘કિલેસા ઝાપિતા મય્હં…પે… વિહરામિ અનાસવો.

૧૭૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૭૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉપવાનત્થેરો ઇમા ગાથાયો

અભાસિત્થાતિ.

ઉપવાનત્થેરસ્સાપદાનં દસમં.