૯. વનવચ્છત્થેરઅપદાનં

૨૫૧. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૨૫૨. ‘‘તદાહં પબ્બજિત્વાન, તસ્સ બુદ્ધસ્સ સાસને;

યાવજીવં ચરિત્વાન, બ્રહ્મચારં તતો ચુતો.

૨૫૩. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૨૫૪. ‘‘તતો ચુતો અરઞ્ઞમ્હિ, કપોતો આસહં તહિં;

વસતે ગુણસમ્પન્નો, ભિક્ખુ ઝાનરતો સદા.

૨૫૫. ‘‘મેત્તચિત્તો કારુણિકો, સદા પમુદિતાનનો;

ઉપેક્ખકો મહાવીરો, અપ્પમઞ્ઞાસુ કોવિદો.

૨૫૬. ‘‘વિનીવરણસઙ્કપ્પે, સબ્બસત્તહિતાસયે;

વિસટ્ઠો નચિરેનાસિં, તસ્મિં સુગતસાવકે.

૨૫૭. ‘‘ઉપેચ્ચ પાદમૂલમ્હિ, નિસિન્નસ્સ તદાસ્સમે;

કદાચિ સામિસં દેતિ, ધમ્મં દેસેસિ ચેકદા.

૨૫૮. ‘‘તદા વિપુલપેમેન, ઉપાસિત્વા જિનત્રજં;

તતો ચુતો ગતો સગ્ગં, પવાસો સઘરં યથા.

૨૫૯. ‘‘સગ્ગા ચુતો મનુસ્સેસુ, નિબ્બત્તો પુઞ્ઞકમ્મુના;

અગારં છડ્ડયિત્વાન, પબ્બજિં બહુસો અહં.

૨૬૦. ‘‘સમણો તાપસો વિપ્પો, પરિબ્બજો તથેવહં;

હુત્વા વસિં અરઞ્ઞમ્હિ, અનેકસતસો અહં.

૨૬૧. ‘‘પચ્છિમે ચ ભવે દાનિ, રમ્મે કપિલવત્થવે;

વચ્છગોત્તો દિજો તસ્સ, જાયાય અહમોક્કમિં.

૨૬૨. ‘‘માતુ મે દોહળો આસિ, તિરોકુચ્છિગતસ્સ મે;

જાયમાનસમીપમ્હિ, વનવાસાય નિચ્છયો.

૨૬૩. ‘‘તતો મે અજની માતા, રમણીયે વનન્તરે;

ગબ્ભતો નિક્ખમન્તં મં, કાસાયેન પટિગ્ગહું.

૨૬૪. ‘‘તતો કુમારો સિદ્ધત્થો, જાતો સક્યકુલદ્ધજો;

તસ્સ મિત્તો પિયો આસિં, સંવિસટ્ઠો સુમાનિયો.

૨૬૫. ‘‘સત્તસારેભિનિક્ખન્તે, ઓહાય વિપુલં યસં;

અહમ્પિ પબ્બજિત્વાન, હિમવન્તમુપાગમિં.

૨૬૬. ‘‘વનાલયં ભાવનીયં, કસ્સપં ધુતવાદિકં;

દિસ્વા સુત્વા જિનુપ્પાદં, ઉપેસિં નરસારથિં.

૨૬૭. ‘‘સો મે ધમ્મમદેસેસિ, સબ્બત્થં સમ્પકાસયં;

તતોહં પબ્બજિત્વાન, વનમેવ પુનાગમં [પુનાગમિં (સી. પી.), પુનોક્કમં (સ્યા.)].

૨૬૮. ‘‘તત્થાપ્પમત્તો વિહરં, છળભિઞ્ઞા અફસ્સયિં [અપસ્સયિં (સ્યા. ક.)];

અહો સુલદ્ધલાભોમ્હિ, સુમિત્તેનાનુકમ્પિતો.

૨૬૯. ‘‘કિલેસા ઝાપિતા મય્હં…પે… વિહરામિ અનાસવો.

૨૭૦. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૭૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા વનવચ્છો થેરો ઇમા ગાથાયો

અભાસિત્થાતિ.

વનવચ્છત્થેરસ્સાપદાનં નવમં.