૧૦. ચૂળસુગન્ધત્થેરઅપદાનં

૨૭૨. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૨૭૩. ‘‘અનુબ્યઞ્જનસમ્પન્નો, બાત્તિંસવરલક્ખણો;

બ્યામપ્પભાપરિવુતો, રંસિજાલસમોત્થટો.

૨૭૪. ‘‘અસ્સાસેતા યથા ચન્દો, સૂરિયોવ પભઙ્કરો;

નિબ્બાપેતા યથા મેઘો, સાગરોવ ગુણાકરો.

૨૭૫. ‘‘ધરણીરિવ સીલેન, હિમવાવ સમાધિના;

આકાસો વિય પઞ્ઞાય, અસઙ્ગો અનિલો યથા.

૨૭૬. ‘‘તદાહં બારાણસિયં, ઉપપન્નો મહાકુલે;

પહૂતધનધઞ્ઞસ્મિં, નાનારતનસઞ્ચયે.

૨૭૭. ‘‘મહતા પરિવારેન, નિસિન્નં લોકનાયકં;

ઉપેચ્ચ ધમ્મમસ્સોસિં, અમતંવ મનોહરં.

૨૭૮. ‘‘દ્વત્તિંસલક્ખણધરો, સનક્ખત્તોવ ચન્દિમા;

અનુબ્યઞ્જનસમ્પન્નો, સાલરાજાવ ફુલ્લિતો.

૨૭૯. ‘‘રંસિજાલપરિક્ખિત્તો, દિત્તોવ કનકાચલો;

બ્યામપ્પભાપરિવુતો, સતરંસી દિવાકરો.

૨૮૦. ‘‘સોણ્ણાનનો જિનવરો, સમણીવ [રમ્મણીવ (સ્યા.)] સિલુચ્ચયો;

કરુણાપુણ્ણહદયો, ગુણેન વિય સાગરો.

૨૮૧. ‘‘લોકવિસ્સુતકિત્તિ ચ, સિનેરૂવ નગુત્તમો;

યસસા વિત્થતો વીરો, આકાસસદિસો મુનિ.

૨૮૨. ‘‘અસઙ્ગચિત્તો સબ્બત્થ, અનિલો વિય નાયકો;

પતિટ્ઠા સબ્બભૂતાનં, મહીવ મુનિસત્તમો.

૨૮૩. ‘‘અનુપલિત્તો લોકેન, તોયેન પદુમં યથા;

કુવાદગચ્છદહનો, અગ્ગિખન્ધોવ સોભસિ [સોભતિ (સી.), સો વસિ (સ્યા. ક.)].

૨૮૪. ‘‘અગધો વિય સબ્બત્થ, કિલેસવિસનાસકો;

ગન્ધમાદનસેલોવ, ગુણગન્ધવિભૂસિતો.

૨૮૫. ‘‘ગુણાનં આકરો વીરો, રતનાનંવ સાગરો;

સિન્ધૂવ વનરાજીનં, કિલેસમલહારકો.

૨૮૬. ‘‘વિજયીવ મહાયોધો, મારસેનાવમદ્દનો;

ચક્કવત્તીવ સો રાજા, બોજ્ઝઙ્ગરતનિસ્સરો.

૨૮૭. ‘‘મહાભિસક્કસઙ્કાસો, દોસબ્યાધિતિકિચ્છકો;

સલ્લકત્તો યથા વેજ્જો, દિટ્ઠિગણ્ડવિફાલકો.

૨૮૮. ‘‘સો તદા લોકપજ્જોતો, સનરામરસક્કતો;

પરિસાસુ નરાદિચ્ચો, ધમ્મં દેસયતે જિનો.

૨૮૯. ‘‘દાનં દત્વા મહાભોગો, સીલેન સુગતૂપગો;

ભાવનાય ચ નિબ્બાતિ, ઇચ્ચેવમનુસાસથ.

૨૯૦. ‘‘દેસનં તં મહસ્સાદં, આદિમજ્ઝન્તસોભણં;

સુણન્તિ પરિસા સબ્બા, અમતંવ મહારસં.

૨૯૧. ‘‘સુત્વા સુમધુરં ધમ્મં, પસન્નો જિનસાસને;

સુગતં સરણં ગન્ત્વા, યાવજીવં નમસ્સહં.

૨૯૨. ‘‘મુનિનો ગન્ધકુટિયા, ઓપુઞ્જેસિં [ઉબ્બટ્ટેસિં (સ્યા.)] તદા મહિં;

ચતુજ્જાતેન ગન્ધેન, માસે અટ્ઠ દિનેસ્વહં.

૨૯૩. ‘‘પણિધાય સુગન્ધત્તં, સરીરવિસ્સગન્ધિનો [સરીરસ્સ વિગન્ધિનો (સી. સ્યા. પી.)];

તદા જિનો વિયાકાસિ, સુગન્ધતનુલાભિતં.

૨૯૪. ‘‘‘યો યં ગન્ધકુટિભૂમિં, ગન્ધેનોપુઞ્જતે સકિં;

તેન કમ્મવિપાકેન, ઉપપન્નો તહિં તહિં.

૨૯૫. ‘‘‘સુગન્ધદેહો સબ્બત્થ, ભવિસ્સતિ અયં નરો;

ગુણગન્ધયુત્તો હુત્વા, નિબ્બાયિસ્સતિનાસવો’.

૨૯૬. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૨૯૭. ‘‘પચ્છિમે ચ ભવે દાનિ, જાતો વિપ્પકુલે અહં;

ગબ્ભં મે વસતો માતા, દેહેનાસિ સુગન્ધિતા.

૨૯૮. ‘‘યદા ચ માતુકુચ્છિમ્હા, નિક્ખમામિ તદા પુરી [પુરં (સ્યા. ક.)];

સાવત્થિસબ્બગન્ધેહિ, વાસિતા વિય વાયથ.

૨૯૯. ‘‘પુપ્ફવસ્સઞ્ચ સુરભિ, દિબ્બગન્ધં મનોરમં;

ધૂપાનિ ચ મહગ્ઘાનિ, ઉપવાયિંસુ તાવદે.

૩૦૦. ‘‘દેવા ચ સબ્બગન્ધેહિ, ધૂપપુપ્ફેહિ તં ઘરં;

વાસયિંસુ સુગન્ધેન, યસ્મિં જાતો અહં ઘરે.

૩૦૧. ‘‘યદા ચ તરુણો ભદ્દો, પઠમે યોબ્બને ઠિતો;

તદા સેલં [સેસં (સ્યા.)] સપરિસં, વિનેત્વા નરસારથિ.

૩૦૨. ‘‘તેહિ સબ્બેહિ પરિવુતો [સહિતો (સી. સ્યા. પી.)], સાવત્થિપુરમાગતો;

તદા બુદ્ધાનુભાવં તં, દિસ્વા પબ્બજિતો અહં.

૩૦૩. ‘‘સીલં સમાધિપઞ્ઞઞ્ચ, વિમુત્તિઞ્ચ અનુત્તરં;

ભાવેત્વા ચતુરો ધમ્મે, પાપુણિં આસવક્ખયં.

૩૦૪. ‘‘યદા પબ્બજિતો ચાહં, યદા ચ અરહા અહું;

નિબ્બાયિસ્સં યદા ચાહં, ગન્ધવસ્સો તદા અહુ.

૩૦૫. ‘‘સરીરગન્ધો ચ સદાતિસેતિ [સદા વાસેતિ (ક.)] મે, મહારહં ચન્દનચમ્પકુપ્પલં;

તથેવ ગન્ધે ઇતરે ચ સબ્બસો, પસય્હ વાયામિ તતો તહિં [યહિં (સ્યા.)] તહિં.

૩૦૬. ‘‘કિલેસા ઝાપિતા મય્હં…પે… વિહરામિ અનાસવો.

૩૦૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૦૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ચૂળસુગન્ધો થેરો ઇમા ગાથાયો અભાસિત્થાતિ;

ચૂળસુગન્ધત્થેરસ્સાપદાનં દસમં.

ભદ્દિયવગ્ગો પઞ્ચપઞ્ઞાસમો.