૮. લોમસકઙ્ગિયત્થેરઅપદાનં

૨૨૫. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૨૨૬. ‘‘તદાહં ચન્દનો ચેવ, પબ્બજિત્વાન સાસને;

આપાણકોટિકં ધમ્મં, પૂરયિત્વાન સાસને.

૨૨૭. ‘‘તતો ચુતા સન્તુસિતં, ઉપપન્ના ઉભો મયં;

તત્થ દિબ્બેહિ નચ્ચેહિ, ગીતેહિ વાદિતેહિ ચ.

૨૨૮. ‘‘રૂપાદિદસહઙ્ગેહિ, અભિભોત્વાન સેસકે;

યાવતાયું વસિત્વાન, અનુભોત્વા મહાસુખં.

૨૨૯. ‘‘તતો ચવિત્વા તિદસં, ચન્દનો ઉપપજ્જથ;

અહં કપિલવત્થુસ્મિં, અજાયિં સાકિયત્રજો.

૨૩૦. ‘‘યદા ઉદાયિત્થેરેન, અજ્ઝિટ્ઠો લોકનાયકો;

અનુકમ્પિય સક્યાનં, ઉપેસિ કપિલવ્હયં.

૨૩૧. ‘‘તદાતિમાનિનો સક્યા, ન બુદ્ધસ્સ ગુણઞ્ઞુનો;

પણમન્તિ ન સમ્બુદ્ધં, જાતિથદ્ધા અનાદરા.

૨૩૨. ‘‘તેસં સઙ્કપ્પમઞ્ઞાય, આકાસે ચઙ્કમી જિનો;

પજ્જુન્નો વિય વસ્સિત્થ, પજ્જલિત્થ યથા સિખી.

૨૩૩. ‘‘દસ્સેત્વા રૂપમતુલં, પુન અન્તરધાયથ;

એકોપિ હુત્વા બહુધા, અહોસિ પુનરેકકો.

૨૩૪. ‘‘અન્ધકારં પકાસઞ્ચ, દસ્સયિત્વા અનેકધા;

પાટિહેરં કરિત્વાન, વિનયી ઞાતકે મુનિ.

૨૩૫. ‘‘ચાતુદ્દીપો મહામેઘો, તાવદેવ પવસ્સથ;

તદા હિ જાતકં બુદ્ધો, વેસ્સન્તરમદેસયિ.

૨૩૬. ‘‘તદા તે ખત્તિયા સબ્બે, નિહન્ત્વા જાતિજં મદં;

ઉપેસું સરણં બુદ્ધં, આહ સુદ્ધોદનો તદા.

૨૩૭. ‘‘‘ઇદં તતિયં તવ ભૂરિપઞ્ઞ, પાદાનિ વન્દામિ સમન્તચક્ખુ;

યદાભિજાતો પથવી પકમ્પયી, યદા ચ તં નજ્જહિ જમ્બુછાયા’.

૨૩૮. ‘‘તદા બુદ્ધાનુભાવં તં, દિસ્વા વિમ્હિતમાનસો;

પબ્બજિત્વાન તત્થેવ, નિવસિં માતુપૂજકો.

૨૩૯. ‘‘ચન્દનો દેવપુત્તો મં, ઉપગન્ત્વાનુપુચ્છથ;

ભદ્દેકરત્તસ્સ તદા, સઙ્ખેપવિત્થારં નયં.

૨૪૦. ‘‘ચોદિતોહં તદા તેન, ઉપેચ્ચ નરનાયકં;

ભદ્દેકરત્તં સુત્વાન, સંવિગ્ગો વનમામકો.

૨૪૧. ‘‘તદા માતરમપુચ્છિં, વને વચ્છામિ એકકો;

સુખુમાલોતિ મે માતા, વારયી તં [તે (સ્યા. પી. ક.)] તદા વચં.

૨૪૨. ‘‘કાસં [દબ્બં (સી. સ્યા. પી.)] કુસં પોટકિલં, ઉસીરં મુઞ્જપબ્બજં [મુઞ્જબબ્બજં (સી. પી.)];

ઉરસા પનુદિસ્સામિ, વિવેકમનુબ્રૂહયં.

૨૪૩. ‘‘તદા વનં પવિટ્ઠોહં, સરિત્વા જિનસાસનં;

ભદ્દેકરત્તઓવાદં, અરહત્તમપાપુણિં.

૨૪૪. ‘‘‘અતીતં નાન્વાગમેય્ય, નપ્પટિકઙ્ખે અનાગતં;

યદતીતં પહીનં તં, અપ્પત્તઞ્ચ અનાગતં.

૨૪૫. ‘‘‘પચ્ચુપ્પન્નઞ્ચ યો ધમ્મં, તત્થ તત્થ વિપસ્સતિ;

અસંહીરં અસંકુપ્પં, તં વિદ્વા મનુબ્રૂહયે.

૨૪૬. ‘‘‘અજ્જેવ કિચ્ચમાતપ્પં, કો જઞ્ઞા મરણં સુવે;

ન હિ નો સઙ્ગરં [સઙ્કરં (ક.)] તેન, મહાસેનેન મચ્ચુના.

૨૪૭. ‘‘‘એવંવિહારિં આતાપિં, અહોરત્તમતન્દિતં;

તં વે ભદ્દેકરત્તોતિ, સન્તો આચિક્ખતે મુનિ’.

૨૪૮. ‘‘કિલેસા ઝાપિતા મય્હં…પે… વિહરામિ અનાસવો.

૨૪૯. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૫૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા લોમસકઙ્ગિયો [લોમસઙ્ખિયો (સ્યા. ક.)] થેરો ઇમા ગાથાયો

અભાસિત્થાતિ.

લોમસકઙ્ગિયત્થેરસ્સાપદાનં અટ્ઠમં.