૭. અભયત્થેરઅપદાનં

૧૯૫. ‘‘પદુમુત્તરો નામ જિનો, સબ્બધમ્મેસુ ચક્ખુમા;

ઇતો સતસહસ્સમ્હિ, કપ્પે ઉપ્પજ્જિ નાયકો.

૧૯૬. ‘‘સરણગમને કિઞ્ચિ, નિવેસેસિ તથાગતો;

કિઞ્ચિ સીલે નિવેસેસિ, દસકમ્મપથુત્તમે.

૧૯૭. ‘‘દેતિ કસ્સચિ સો વીરો, સામઞ્ઞફલમુત્તમં;

સમાપત્તી તથા અટ્ઠ, તિસ્સો વિજ્જા પવચ્છતિ.

૧૯૮. ‘‘છળભિઞ્ઞાસુ યોજેસિ, કિઞ્ચિ સત્તં નરુત્તમો;

દેતિ કસ્સચિ નાથો સો, ચતસ્સો પટિસમ્ભિદા.

૧૯૯. ‘‘બોધનેય્યં પજં દિસ્વા, અસઙ્ખેય્યમ્પિ યોજનં [અસઙ્ખેય્યેપિ યોજને સી. સ્યા. પી.)];

ખણેન ઉપગન્ત્વાન, વિનેતિ નરસારથિ.

૨૦૦. ‘‘તદાહં હંસવતિયં, અહોસિં બ્રાહ્મણત્રજો;

પારગૂ સબ્બવેદાનં, વેય્યાકરણસમ્મતો.

૨૦૧. ‘‘નિરુત્તિયા ચ કુસલો, નિઘણ્ડુમ્હિ વિસારદો;

પદકો કેટુભવિદૂ, છન્દોવિચિતિકોવિદો.

૨૦૨. ‘‘જઙ્ઘાવિહારં વિચરં, હંસારામમુપેચ્ચહં;

અદ્દસં વરદં [વદતં (સી. પી.), પવરં (સ્યા.)] સેટ્ઠં, મહાજનપુરક્ખતં.

૨૦૩. ‘‘દેસેન્તં વિરજં ધમ્મં, પચ્ચનીકમતી અહં;

ઉપેત્વા તસ્સ કલ્યાણં, સુત્વાન વિમલં અહં [વાક્યાનિ, સુત્વાન વિમલાનહં (સી. સ્યા. પી.)].

૨૦૪. ‘‘બ્યાહતં પુનરુત્તં વા, અપત્થં વા નિરત્થકં;

નાદ્દસં તસ્સ મુનિનો, તતો પબ્બજિતો અહં.

૨૦૫. ‘‘નચિરેનેવ કાલેન, સબ્બસત્તવિસારદો;

નિપુણો બુદ્ધવચને, અહોસિં ગુણિસમ્મતો.

૨૦૬. ‘‘તદા ચતસ્સો ગાથાયો, ગન્થયિત્વા સુબ્યઞ્જના;

સન્થવિત્વા તિલોકગ્ગં, દેસયિસ્સં દિને દિને.

૨૦૭. ‘‘વિરત્તોસિ મહાવીરો, સંસારે સભયે વસં;

કરુણાય ન નિબ્બાયિ, તતો કારુણિકો મુનિ.

૨૦૮. ‘‘પુથુજ્જનો વયો સન્તો, ન કિલેસવસો અહુ;

સમ્પજાનો સતિયુત્તો, તસ્મા એસો અચિન્તિયો.

૨૦૯. ‘‘દુબ્બલાનિ કિલેસાનિ, યસ્સાસયગતાનિ મે;

ઞાણગ્ગિપરિદડ્ઢાનિ, ન ખીયિંસુ તમબ્ભુતં.

૨૧૦. ‘‘યો સબ્બલોકસ્સ ગરુ, લોકો [લોકે (સ્યા. ક.)] યસ્સ તથા ગરુ;

તથાપિ લોકાચરિયો, લોકો તસ્સાનુવત્તકો.

૨૧૧. ‘‘એવમાદીહિ સમ્બુદ્ધં, કિત્તયં ધમ્મદેસનં;

યાવજીવં કરિત્વાન, ગતો સગ્ગં તતો ચુતો.

૨૧૨. ‘‘સતસહસ્સિતો કપ્પે, યં બુદ્ધમભિકિત્તયિં;

દુગ્ગતિં નાભિજાનામિ, કિત્તનાય ઇદં ફલં.

૨૧૩. ‘‘દેવલોકે મહારજ્જં, પાદેસિં કઞ્ચનગ્ઘિયં [દિબ્બાનુભોજહં તદા (સ્યા.), રજ્જં પાદેસિ કંચયં (સી.)];

ચક્કવત્તી મહારજ્જં, બહુસોનુભવિં અહં.

૨૧૪. ‘‘દુવે ભવે પજાયામિ, દેવત્તે અથ માનુસે;

અઞ્ઞં ગતિં ન જાનામિ, કિત્તનાય ઇદં ફલં.

૨૧૫. ‘‘દુવે કુલે પજાયામિ, ખત્તિયે અથ બ્રાહ્મણે;

નીચે કુલે ન જાયામિ, કિત્તનાય ઇદં ફલં.

૨૧૬. ‘‘પચ્છિમે ચ ભવે દાનિ, ગિરિબ્બજપુરુત્તમે;

રઞ્ઞોહં બિમ્બિસારસ્સ, પુત્તો નામેન ચાભયો.

૨૧૭. ‘‘પાપમિત્તવસં ગન્ત્વા, નિગણ્ઠેન વિમોહિતો;

પેસિતો નાટપુત્તેન, બુદ્ધસેટ્ઠમુપેચ્ચહં.

૨૧૮. ‘‘પુચ્છિત્વા નિપુણં પઞ્હં, સુત્વા બ્યાકરણુત્તમં;

પબ્બજિત્વાન નચિરં, અરહત્તમપાપુણિં.

૨૧૯. ‘‘કિત્તયિત્વા જિનવરં, કિત્તિતો હોમિ સબ્બદા;

સુગન્ધદેહવદનો, આસિં સુખસમપ્પિતો.

૨૨૦. ‘‘તિક્ખહાસલહુપઞ્ઞો, મહાપઞ્ઞો તથેવહં;

વિચિત્તપટિભાનો ચ, તસ્સ કમ્મસ્સ વાહસા.

૨૨૧. ‘‘અભિત્થવિત્વા પદુમુત્તરાહં, પસન્નચિત્તો અસમં સયમ્ભું;

ન ગચ્છિ કપ્પાનિ અપાયભૂમિં, સતં સહસ્સાનિ બલેન તસ્સ.

૨૨૨. ‘‘કિલેસા ઝાપિતા મય્હં…પે… વિહરામિ અનાસવો.

૨૨૩. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૨૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અભયો થેરો ઇમા ગાથાયો

અભાસિત્થાતિ.

અભયત્થેરસ્સાપદાનં સત્તમં.