૪. વઙ્ગીસત્થેરઅપદાનં

૯૬. ‘‘પદુમુત્તરો નામ જિનો, સબ્બધમ્મેસુ ચક્ખુમા;

ઇતો સતસહસ્સમ્હિ, કપ્પે ઉપ્પજ્જિ નાયકો.

૯૭. ‘‘યથાપિ સાગરે ઊમિ, ગગને વિય તારકા;

એવં પાવચનં તસ્સ, અરહન્તેહિ ચિત્તિતં.

૯૮. ‘‘સદેવાસુરનાગેહિ, મનુજેહિ પુરક્ખતો;

સમણબ્રાહ્મણાકિણ્ણે, જનમજ્ઝે જિનુત્તમો.

૯૯. ‘‘પભાહિ અનુરઞ્જન્તો, લોકે [લોકં (સી.)] લોકન્તગૂ જિનો;

વચનેન વિબોધેન્તો, વેનેય્યપદુમાનિ સો.

૧૦૦. ‘‘વેસારજ્જેહિ સમ્પન્નો, ચતૂહિ પુરિસુત્તમો;

પહીનભયસારજ્જો, ખેમપ્પત્તો વિસારદો.

૧૦૧. ‘‘આસભં પવરં ઠાનં, બુદ્ધભૂમિઞ્ચ કેવલં;

પટિજાનાતિ લોકગ્ગો, નત્થિ સઞ્ચોદકો ક્વચિ.

૧૦૨. ‘‘સીહનાદમસમ્ભીતં, નદતો તસ્સ તાદિનો;

દેવો નરો વા બ્રહ્મા વા, પટિવત્તા ન વિજ્જતિ.

૧૦૩. ‘‘દેસેન્તો પવરં ધમ્મં, સન્તારેન્તો સદેવકં;

ધમ્મચક્કં પવત્તેતિ, પરિસાસુ વિસારદો.

૧૦૪. ‘‘પટિભાનવતં અગ્ગં, સાવકં સાધુસમ્મતં;

ગુણં બહું પકિત્તેત્વા, એતદગ્ગે ઠપેસિ તં.

૧૦૫. ‘‘તદાહં હંસવતિયં, બ્રાહ્મણો સાધુસમ્મતો;

સબ્બવેદવિદૂ જાતો, વાગીસો વાદિસૂદનો.

૧૦૬. ‘‘ઉપેચ્ચ તં મહાવીરં, સુત્વાહં ધમ્મદેસનં;

પીતિવરં પટિલભિં, સાવકસ્સ ગુણે રતો.

૧૦૭. ‘‘નિમન્તેત્વાવ સુગતં, સસઙ્ઘં લોકનન્દનં;

સત્તાહં ભોજયિત્વાહં, દુસ્સેહચ્છાદયિં તદા.

૧૦૮. ‘‘નિપચ્ચ સિરસા પાદે, કતોકાસો કતઞ્જલી;

એકમન્તં ઠિતો હટ્ઠો, સન્થવિં જિનમુત્તમં.

૧૦૯. ‘‘‘નમો તે વાદિમદ્દન [વાદિસદ્દુલ (સી. પી.), વાદિસૂદન (સ્યા.)], નમો તે ઇસિસત્તમ [પુરિસુત્તમ (સી. પી.)];

નમો તે સબ્બલોકગ્ગ, નમો તે અભયઙ્કર.

૧૧૦. ‘‘‘નમો તે મારમથન [મારમસન (અટ્ઠ.)], નમો તે દિટ્ઠિસૂદન;

નમો તે સન્તિસુખદ, નમો તે સરણઙ્કર.

૧૧૧. ‘‘‘અનાથાનં ભવં નાથો, ભીતાનં અભયપ્પદો;

વિસ્સામભૂમિ [વિસ્સાસં ભૂમિ (સ્યા.), વિસ્સાનભૂમિ (પી.)] સન્તાનં, સરણં સરણેસિનં’.

૧૧૨. ‘‘એવમાદીહિ સમ્બુદ્ધં, સન્થવિત્વા મહાગુણં;

અવોચં વાદિસૂદસ્સ [વાદિસૂરસ્સ (સી. સ્યા. પી.)], ગતિં પપ્પોમિ ભિક્ખુનો.

૧૧૩. ‘‘તદા અવોચ ભગવા, અનન્તપટિભાનવા;

‘યો સો બુદ્ધં અભોજેસિ, સત્તાહં સહસાવકં.

૧૧૪. ‘‘‘ગુણઞ્ચ મે પકિત્તેસિ, પસન્નો સેહિ પાણિભિ;

એસો પત્થયતે ઠાનં, વાદિસૂદસ્સ ભિક્ખુનો.

૧૧૫. ‘‘‘અનાગતમ્હિ અદ્ધાને, લચ્છસે તં મનોરથં;

દેવમાનુસસમ્પત્તિં, અનુભોત્વા અનપ્પકં.

૧૧૬. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૧૭. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

વઙ્ગીસો નામ નામેન, હેસ્સતિ સત્થુ સાવકો’.

૧૧૮. ‘‘તં સુત્વા મુદિતો હુત્વા, યાવજીવં તદા જિનં;

પચ્ચયેહિ ઉપટ્ઠાસિં, મેત્તચિત્તો તથાગતં.

૧૧૯. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તુસિતં [તાવતિંસં (સ્યા.)] અગમાસહં.

૧૨૦. ‘‘પચ્છિમે ચ ભવે દાનિ, જાતો વિપ્પકુલે [પરિબ્બાજકુલે (સી. સ્યા. પી.)] અહં;

પચ્ચાજાતો [સમ્પત્તો ચ (ક.)] યદા આસિં, જાતિયા સત્તવસ્સિકો.

૧૨૧. ‘‘સબ્બવેદવિદૂ જાતો, વાદસત્થવિસારદો;

વાદિસ્સરો [વગ્ગુસ્સરો (સ્યા. પી.)] ચિત્તકથી, પરવાદપ્પમદ્દનો.

૧૨૨. ‘‘વઙ્ગે જાતોતિ વઙ્ગીસો, વચને ઇસ્સરોતિ વા;

વઙ્ગીસો ઇતિ મે નામં, અભવી લોકસમ્મતં.

૧૨૩. ‘‘યદાહં વિઞ્ઞુતં પત્તો, ઠિતો પઠમયોબ્બને;

તદા રાજગહે રમ્મે, સારિપુત્તમહદ્દસં [મથદ્દસં (સી. પી.), ચ અદ્દસં (સ્યા.)].

પઞ્ચવીસતિમં ભાણવારં.

૧૨૪. ‘‘પિણ્ડાય વિચરન્તં તં, પત્તપાણિં સુસંવુતં;

અલોલક્ખિં મિતભાણિં, યુગમત્તં નિદક્ખિતં [નિરિક્ખતં (સી. પી.), ઉદિક્ખતં (સ્યા.)].

૧૨૫. ‘‘તં દિસ્વા વિમ્હિતો હુત્વા, અવોચં મમનુચ્છવં [મનનુચ્છવં (સી. સ્યા.)];

કણિકારંવ નિચિતં [કણિકારપરિચિતં (પી.), ખણિકં ઠાનરચિતં (સી.)], ચિત્તં ગાથાપદં અહં.

૧૨૬. ‘‘આચિક્ખિ સો મે સત્થારં, સમ્બુદ્ધં લોકનાયકં;

તદા સો પણ્ડિતો વીરો, ઉત્તરિં [ઉત્તરં (સી. પી.)] સમવોચ મે.

૧૨૭. ‘‘વિરાગસંહિતં વાક્યં, કત્વા દુદ્દસમુત્તમં;

વિચિત્તપટિભાનેહિ, તોસિતો તેન તાદિના.

૧૨૮. ‘‘નિપચ્ચ સિરસા પાદે, ‘પબ્બાજેહી’તિ મં બ્રવિ;

તતો મં સ મહાપઞ્ઞો, બુદ્ધસેટ્ઠમુપાનયિ.

૧૨૯. ‘‘નિપચ્ચ સિરસા પાદે, નિસીદિં સત્થુ સન્તિકે;

મમાહ વદતં સેટ્ઠો, કચ્ચિ વઙ્ગીસ જાનાસિ [સચ્ચં વઙ્ગીસ કચ્ચિ તે (સ્યા.)].

૧૩૦. ‘‘કિઞ્ચિ સિપ્પન્તિ તસ્સાહં, ‘જાનામી’તિ ચ અબ્રવિં;

મતસીસં વનચ્છુદ્ધં, અપિ બારસવસ્સિકં;

તવ વિજ્જાવિસેસેન, સચે સક્કોસિ વાચય [ભાસય (સી. પી.)].

૧૩૧. ‘‘આમોતિ મે પટિઞ્ઞાતે, તીણિ સીસાનિ દસ્સયિ;

નિરયનરદેવેસુ, ઉપપન્ને અવાચયિં.

૧૩૨. ‘‘તદા ખીણાસવસ્સેવ [પચ્ચેકબુદ્ધસ્સ (સી. પી.)], સીસં દસ્સેસિ નાયકો;

તતોહં વિહતારબ્ભો, પબ્બજ્જં સમયાચિસં.

૧૩૩. ‘‘પબ્બજિત્વાન સુગતં, સન્થવામિ તહિં તહિં;

તતો મં કબ્બવિત્તોસિ [કવિચિત્તોતિ (સ્યા. પી.)], ઉજ્ઝાયન્તિહ ભિક્ખવો.

૧૩૪. ‘‘તતો વીમંસનત્થં મે, આહ બુદ્ધો વિનાયકો;

તક્કિકા પનિમા ગાથા, ઠાનસો પટિભન્તિ તં.

૧૩૫. ‘‘ન કબ્બવિત્તોહં વીર, ઠાનસો પટિભન્તિ મં;

તેન હિ દાનિ વઙ્ગીસ, ઠાનસો સન્થવાહિ મં.

૧૩૬. ‘‘તદાહં સન્થવિં વીરં, ગાથાહિ ઇસિસત્તમં;

ઠાનસો મે તદા તુટ્ઠો, જિનો અગ્ગે ઠપેસિ મં.

૧૩૭. ‘‘પટિભાનેન ચિત્તેન, અઞ્ઞેસમતિમઞ્ઞહં;

પેસલે તેન સંવિગ્ગો, અરહત્તમપાપુણિં.

૧૩૮. ‘‘‘પટિભાનવતં અગ્ગો, અઞ્ઞો કોચિ ન વિજ્જતિ;

યથાયં ભિક્ખુ વઙ્ગીસો, એવં ધારેથ ભિક્ખવો’.

૧૩૯. ‘‘સતસહસ્સે કતં કમ્મં, ફલં દસ્સેસિ મે ઇધ;

સુમુત્તો સરવેગોવ કિલેસે ઝાપયિં મમ.

૧૪૦. ‘‘કિલેસા ઝાપિતા મય્હં…પે… વિહરામિ અનાસવો.

૧૪૧. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૪૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા વઙ્ગીસો થેરો ઇમા ગાથાયો

અભાસિત્થાતિ.

વઙ્ગીસત્થેરસ્સાપદાનં ચતુત્થં.