૫. નન્દકત્થેરઅપદાનં

૧૪૩. ‘‘પદુમુત્તરો નામ જિનો, સબ્બધમ્મેસુ ચક્ખુમા;

ઇતો સતસહસ્સમ્હિ, કપ્પે ઉપ્પજ્જિ નાયકો.

૧૪૪. ‘‘હિતાય સબ્બસત્તાનં, સુખાય વદતં વરો;

અત્થાય પુરિસાજઞ્ઞો, પટિપન્નો સદેવકે.

૧૪૫. ‘‘યસગ્ગપત્તો સિરિમા, કિત્તિવણ્ણભતો [કિત્તિવણ્ણ ભટો (સ્યા. ક.)] જિનો;

પૂજિતો સબ્બલોકસ્સ, દિસા સબ્બાસુ વિસ્સુતો.

૧૪૬. ‘‘ઉત્તિણ્ણવિચિકિચ્છો સો, વીતિવત્તકથંકથો;

પરિપુણ્ણમનસઙ્કપ્પો, પત્તો સમ્બોધિમુત્તમં.

૧૪૭. ‘‘અનુપ્પન્નસ્સ મગ્ગસ્સ, ઉપ્પાદેતા નરુત્તમો;

અનક્ખાતઞ્ચ અક્ખાસિ, અસઞ્જાતઞ્ચ સઞ્જની.

૧૪૮. ‘‘મગ્ગઞ્ઞૂ મગ્ગવિદૂ [સો મગ્ગવિદૂ (સી. પી.)] ચ, મગ્ગક્ખાયી નરાસભો;

મગ્ગસ્સ કુસલો સત્થા, સારથીનં વરુત્તમો [નરુત્તમો (સ્યા.)].

૧૪૯. ‘‘તદા મહાકારુણિકો, ધમ્મં દેસેસિ નાયકો;

નિમુગ્ગે કામપઙ્કમ્હિ [મોહપઙ્કમ્હિ (સી. સ્યા.), મોહમગ્ગમ્હિ (પી.)], સમુદ્ધરતિ પાણિને.

૧૫૦. ‘‘ભિક્ખુનીનં ઓવદને, સાવકં સેટ્ઠસમ્મતં;

વણ્ણયં એતદગ્ગમ્હિ, પઞ્ઞપેસિ મહામુનિ.

૧૫૧. ‘‘તં સુત્વાહં પમુદિતો, નિમન્તેત્વા તથાગતં;

ભોજયિત્વા સસઙ્ઘં તં, પત્થયિં ઠાનમુત્તમં.

૧૫૨. ‘‘તદા પમુદિતો નાથો, મં અવોચ મહાઇસિ;

‘સુખી ભવસ્સુ દીઘાવુ [દીઘાયુ (સી. સ્યા.)], લચ્છસે તં મનોરથં.

૧૫૩. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૫૪. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

નન્દકો નામ નામેન, હેસ્સતિ સત્થુ સાવકો’.

૧૫૫. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસૂપગો અહં.

૧૫૬. ‘‘પચ્છિમે ચ ભવે દાનિ, જાતો સેટ્ઠિકુલે અહં;

સાવત્થિયં પુરે વરે, ઇદ્ધે ફીતે મહદ્ધને.

૧૫૭. ‘‘પુરપ્પવેસે સુગતં, દિસ્વા વિમ્હિતમાનસો;

જેતારામપટિગ્ગાહે, પબ્બજિં અનગારિયં.

૧૫૮. ‘‘નચિરેનેવ કાલેન, અરહત્તમપાપુણિં;

તતોહં તિણ્ણસંસારો, સાસિતો સબ્બદસ્સિના.

૧૫૯. ‘‘ભિક્ખુનીનં ધમ્મકથં, પટિપુચ્છાકરિં અહં;

સાસિતા તા મયા સબ્બા, અભવિંસુ અનાસવા.

૧૬૦. ‘‘સતાનિ પઞ્ચનૂનાનિ, તદા તુટ્ઠો મહાહિતો;

ભિક્ખુનીનં ઓવદતં, અગ્ગટ્ઠાને ઠપેસિ મં.

૧૬૧. ‘‘સતસહસ્સે કતં કમ્મં, ફલં દસ્સેસિ મે ઇધ;

સુમુત્તો સરવેગોવ, કિલેસે ઝાપયિં મમ.

૧૬૨. ‘‘કિલેસા ઝાપિતા મય્હં…પે… વિહરામિ અનાસવો.

૧૬૩. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૬૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા નન્દકો થેરો ઇમા ગાથાયો

અભાસિત્થાતિ.

નન્દકત્થેરસ્સાપદાનં પઞ્ચમં.