૩. સીવલિત્થેરઅપદાનં

૫૪. ‘‘પદુમુત્તરો નામ જિનો, સબ્બધમ્મેસુ ચક્ખુમા;

ઇતો સતસહસ્સમ્હિ, કપ્પે ઉપ્પજ્જિ નાયકો.

૫૫. ‘‘સીલં તસ્સ અસઙ્ખેય્યં, સમાધિ વજિરૂપમો;

અસઙ્ખેય્યં ઞાણવરં, વિમુત્તિ ચ અનોપમા.

૫૬. ‘‘મનુજામરનાગાનં, બ્રહ્માનઞ્ચ સમાગમે;

સમણબ્રાહ્મણાકિણ્ણે, ધમ્મં દેસેસિ નાયકો.

૫૭. ‘‘સસાવકં મહાલાભિં, પુઞ્ઞવન્તં જુતિન્ધરં;

ઠપેસિ એતદગ્ગમ્હિ, પરિસાસુ વિસારદો.

૫૮. ‘‘તદાહં ખત્તિયો આસિં, નગરે હંસસવ્હયે;

સુત્વા જિનસ્સ તં વાક્યં, સાવકસ્સ ગુણં બહું.

૫૯. ‘‘નિમન્તયિત્વા સત્તાહં, ભોજયિત્વા સસાવકં;

મહાદાનં દદિત્વાન, તં ઠાનમભિપત્થયિં.

૬૦. ‘‘તદા મં વિનતં પાદે, દિસ્વાન પુરિસાસભો;

સરેન મહતા વીરો [સુસ્સરેન મહાવીરો (સી. પી.)], ઇદં વચનમબ્રવિ.

૬૧. ‘‘‘તતો જિનસ્સ વચનં, સોતુકામા મહાજના;

દેવદાનવગન્ધબ્બા, બ્રહ્માનો ચ મહિદ્ધિકા’.

૬૨. ‘‘સમણબ્રાહ્મણા ચેવ, નમસ્સિંસુ કતઞ્જલી;

‘નમો તે પુરિસાજઞ્ઞ, નમો તે પુરિસુત્તમ.

૬૩. ‘‘‘ખત્તિયેન મહાદાનં, દિન્નં સત્તાહિકમ્પિ વો [સત્તહિકં મિ વો (સી.), સત્તહિકાધિકં (સ્યા.), સત્તહિકં વિભો (પી.)];

સોતુકામા ફલં તસ્સ, બ્યાકરોહિ મહામુને’.

૬૪. ‘‘તતો અવોચ ભગવા, ‘સુણાથ મમ ભાસિતં;

અપ્પમેય્યમ્હિ બુદ્ધમ્હિ, સસઙ્ઘમ્હિ પતિટ્ઠિતા [સંઘમ્હિ સુપ્પતિટ્ઠિતા (સી. પી.)].

૬૫. ‘‘‘દક્ખિણા તાય [દક્ખિણાદાય (સ્યા. પી.)] કો વત્તા, અપ્પમેય્યફલા હિ સા;

અપિ ચે સ મહાભોગો, ઠાનં પત્થેતિ ઉત્તમં.

૬૬. ‘‘‘લાભી વિપુલલાભાનં, યથા ભિક્ખુ સુદસ્સનો;

તથાહમ્પિ ભવેય્યન્તિ, લચ્છસે તં અનાગતે.

૬૭. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૬૮. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સીવલિ નામ નામેન, હેસ્સતિ સત્થુ સાવકો’.

૬૯. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસૂપગો અહં.

૭૦. ‘‘એકનવુતિતો કપ્પે, વિપસ્સી લોકનાયકો;

ઉપ્પજ્જિ ચારુદસ્સનો, સબ્બધમ્મવિપસ્સકો.

૭૧. ‘‘તદાહં બન્ધુમતિયં, કુલસ્સઞ્ઞતરસ્સ ચ;

દયિતો પસ્સિતો ચેવ, આસિં કમ્મન્તવાવટો [કમ્મન્તબ્યાવટો (સી. સ્યા. ક.)].

૭૨. ‘‘તદા અઞ્ઞતરો પૂગો, વિપસ્સિસ્સ મહેસિનો;

પરિવેસં અકારયિ, મહન્તમતિવિસ્સુતં.

૭૩. ‘‘નિટ્ઠિતે ચ મહાદાને, દદું ખજ્જકસઞ્હિતં;

નવં દધિં મધુઞ્ચેવ, વિચિનં નેવ અદ્દસું.

૭૪. ‘‘તદાહં તં ગહેત્વાન, નવં દધિં મધુમ્પિ ચ;

કમ્મસ્સામિઘરં ગચ્છિં, તમેસન્તા મમદ્દસું.

૭૫. ‘‘સહસ્સમપિ દત્વાન, નાલભિંસુ ચ તં દ્વયં;

તતોહં એવં ચિન્તેસિં, ‘નેતં હેસ્સતિ ઓરકં.

૭૬. ‘‘‘યથા ઇમે જના સબ્બે, સક્કરોન્તિ તથાગતં;

અહમ્પિ કારં કસ્સામિ, સસઙ્ઘે લોકનાયકે’.

૭૭. ‘‘તદાહમેવં ચિન્તેત્વા, દધિં મધુઞ્ચ એકતો;

મદ્દિત્વા લોકનાથસ્સ, સસઙ્ઘસ્સ અદાસહં.

૭૮. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૭૯. ‘‘પુનાહં બારાણસિયં, રાજા હુત્વા મહાયસો;

સત્તુકસ્સ તદા દુટ્ઠો, દ્વારરોધમકારયિં.

૮૦. ‘‘તદા તપસ્સિનો રુદ્ધા, એકાહં રક્ખિતા અહું;

તતો તસ્સ વિપાકેન, પાપતિં [પાપિટ્ઠં (સ્યા.) પાપત્તં (ક.)] નિરયં ભુસં.

૮૧. ‘‘પચ્છિમે ચ ભવે દાનિ, જાતોહં કોલિયે પુરે;

સુપ્પવાસા ચ મે માતા, મહાલિ લિચ્છવી પિતા.

૮૨. ‘‘ખત્તિયે પુઞ્ઞકમ્મેન, દ્વારરોધસ્સ વાહસા;

સત્ત વસ્સાનિ નિવસિં, માતુકુચ્છિમ્હિ દુક્ખિતો.

૮૩. ‘‘સત્તાહં દ્વારમૂળ્હોહં, મહાદુક્ખસમપ્પિતો;

માતા મે છન્દદાનેન, એવં આસિ સુદુક્ખિતા.

૮૪. ‘‘સુવત્થિતોહં નિક્ખન્તો, બુદ્ધેન અનુકમ્પિતો;

નિક્ખન્તદિવસેયેવ, પબ્બજિં અનગારિયં.

૮૫. ‘‘ઉપજ્ઝા સારિપુત્તો મે, મોગ્ગલ્લાનો મહિદ્ધિકો;

કેસે ઓરોપયન્તો મે, અનુસાસિ મહામતિ.

૮૬. ‘‘કેસેસુ છિજ્જમાનેસુ, અરહત્તમપાપુણિં;

દેવા નાગા મનુસ્સા ચ, પચ્ચયે ઉપનેન્તિ મે.

૮૭. ‘‘પદુમુત્તરનાથઞ્ચ, વિપસ્સિઞ્ચ વિનાયકં;

યં પૂજયિં પમુદિતો, પચ્ચયેહિ વિસેસતો.

૮૮. ‘‘તતો તેસં વિસેસેન, કમ્માનં વિપુલુત્તમં;

લાભં લભામિ સબ્બત્થ, વને ગામે જલે થલે.

૮૯. ‘‘રેવતં દસ્સનત્થાય, યદા યાતિ વિનાયકો;

તિંસભિક્ખુસહસ્સેહિ, સહ લોકગ્ગનાયકો.

૯૦. ‘‘તદા દેવોપણીતેહિ, મમત્થાય મહામતિ;

પચ્ચયેહિ મહાવીરો, સસઙ્ઘો લોકનાયકો.

૯૧. ‘‘ઉપટ્ઠિતો મયા બુદ્ધો, ગન્ત્વા રેવતમદ્દસ;

તતો જેતવનં ગન્ત્વા, એતદગ્ગે ઠપેસિ મં.

૯૨. ‘‘‘લાભીનં સીવલિ અગ્ગો, મમ સિસ્સેસુ ભિક્ખવો’;

સબ્બલોકહિતો સત્થા, કિત્તયી પરિસાસુ મં.

૯૩. ‘‘કિલેસા ઝાપિતા મય્હં…પે… વિહરામિ અનાસવો.

૯૪. ‘‘સ્વાગતં વત મે આસિ…પે… કતં બુદ્ધસ્સ સાસનં.

૯૫. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સીવલિથેરો ઇમા ગાથાયો

અભાસિત્થાતિ.

સીવલિત્થેરસ્સાપદાનં તતિયં.