૨. કઙ્ખારેવતત્થેરઅપદાનં

૩૪. ‘‘પદુમુત્તરો નામ જિનો, સબ્બધમ્મેસુ ચક્ખુમા;

ઇતો સતસહસ્સમ્હિ, કપ્પે ઉપ્પજ્જિ નાયકો.

૩૫. ‘‘સીહહનુ બ્રહ્મગિરો, હંસદુન્દુભિનિસ્સનો [હંસદુન્દુભિનિસ્સરો (સી.) … નિસ્સવનો (પી.) … સાવનો (સ્યા.)];

નાગવિક્કન્તગમનો, ચન્દસૂરાદિકપ્પભો.

૩૬. ‘‘મહામતી મહાવીરો, મહાઝાયી મહાબલો [મહાગતિ (સ્યા.), મહાહિતો (પી.)];

મહાકારુણિકો નાથો, મહાતમપનૂદનો [મહાતમવિધંસનો (સ્યા.), મહાતમનિસૂદનો (પી.)].

૩૭. ‘‘સ કદાચિ તિલોકગ્ગો, વેનેય્યં વિનયં બહું [વેનેય્યે વિનિયં બહૂ (સી.)];

ધમ્મં દેસેસિ સમ્બુદ્ધો, સત્તાસયવિદૂ મુનિ.

૩૮. ‘‘ઝાયિં ઝાનરતં વીરં, ઉપસન્તં અનાવિલં;

વણ્ણયન્તો પરિસતિં, તોસેસિ [તોસેતિ (સ્યા. પી. ક.)] જનતં જિનો.

૩૯. ‘‘તદાહં હંસવતિયં, બ્રાહ્મણો વેદપારગૂ;

ધમ્મં સુત્વાન મુદિતો, તં ઠાનમભિપત્થયિં.

૪૦. ‘‘તદા જિનો વિયાકાસિ, સઙ્ઘમજ્ઝે વિનાયકો;

‘મુદિતો હોહિ ત્વં બ્રહ્મે, લચ્છસે તં મનોરથં.

૪૧. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૪૨. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

રેવતો નામ નામેન, હેસ્સતિ સત્થુ સાવકો’.

૪૩. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૪૪. ‘‘પચ્છિમે ચ ભવે દાનિ, જાતોહં કોલિયે પુરે;

ખત્તિયે કુલસમ્પન્ને, ઇદ્ધે ફીતે મહદ્ધને.

૪૫. ‘‘યદા કપિલવત્થુસ્મિં, બુદ્ધો ધમ્મમદેસયિ;

તદા પસન્નો સુગતે, પબ્બજિં અનગારિયં.

૪૬. ‘‘કઙ્ખા મે બહુલા આસિ, કપ્પાકપ્પે તહિં તહિં;

સબ્બં તં વિનયી બુદ્ધો, દેસેત્વા ધમ્મમુત્તમં.

૪૭. ‘‘તતોહં તિણ્ણસંસારો, સદા ઝાનસુખે રતો;

વિહરામિ તદા બુદ્ધો, મં દિસ્વા એતદબ્રવિ.

૪૮. ‘‘‘યા કાચિ કઙ્ખા ઇધ વા હુરં વા, સકવેદિયા વા પરવેદિયા વા;

યે ઝાયિનો તા પજહન્તિ સબ્બા, આતાપિનો બ્રહ્મચરિયં ચરન્તા’.

૪૯. ‘‘સતસહસ્સે કતં કમ્મં, ફલં દસ્સેસિ મે ઇધ;

સુમુત્તો સરવેગોવ કિલેસે ઝાપયિં મમ.

૫૦. ‘‘તતો ઝાનરતં દિસ્વા, બુદ્ધો લોકન્તગૂ મુનિ;

ઝાયીનં ભિક્ખૂનં અગ્ગો, પઞ્ઞાપેતિ મહામતિ.

૫૧. ‘‘કિલેસા ઝાપિતા મય્હં…પે… વિહરામિ અનાસવો.

૫૨. ‘‘સ્વાગતં વત મે આસિ…પે… કતં બુદ્ધસ્સ સાસનં.

૫૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કઙ્ખારેવતો થેરો ઇમા ગાથાયો

અભાસિત્થાતિ.

કઙ્ખારેવતત્થેરસ્સાપદાનં દુતિયં.