૧. લકુણ્ડભદ્દિયત્થેરઅપદાનં

૧. ‘‘પદુમુત્તરો નામ જિનો, સબ્બધમ્મેસુ ચક્ખુમા;

ઇતો સતસહસ્સમ્હિ, કપ્પે ઉપ્પજ્જિ નાયકો.

૨. ‘‘તદાહં હંસવતિયં, સેટ્ઠિપુત્તો મહદ્ધનો;

જઙ્ઘાવિહારં વિચરં, સઙ્ઘારામં અગચ્છહં.

૩. ‘‘તદા સો લોકપજ્જોતો, ધમ્મં દેસેસિ નાયકો;

મઞ્જુસ્સરાનં પવરં, સાવકં અભિકિત્તયિ.

૪. ‘‘તં સુત્વા મુદિતો હુત્વા, કારં કત્વા મહેસિનો;

વન્દિત્વા સત્થુનો પાદે, તં ઠાનમભિપત્થયિં.

૫. ‘‘તદા બુદ્ધો વિયાકાસિ, સઙ્ઘમજ્ઝે વિનાયકો;

‘અનાગતમ્હિ અદ્ધાને, લચ્છસે તં મનોરથં.

૬. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૭. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

ભદ્દિયો નામ નામેન, હેસ્સતિ સત્થુ સાવકો’.

૮. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૯. ‘‘દ્વેનવુતે ઇતો કપ્પે, ફુસ્સો ઉપ્પજ્જિ નાયકો;

દુરાસદો દુપ્પસહો, સબ્બલોકુત્તમો જિનો.

૧૦. ‘‘ચરણેન ચ સમ્પન્નો, બ્રહા ઉજુ પતાપવા;

હિતેસી સબ્બસત્તાનં [સબ્બપાણીનં (સી.)], બહું મોચેસિ બન્ધના.

૧૧. ‘‘નન્દારામવને તસ્સ, અહોસિં ફુસ્સકોકિલો [પુસ્સકોકિલો (સી. સ્યા.)];

ગન્ધકુટિસમાસન્ને, અમ્બરુક્ખે વસામહં.

૧૨. ‘‘તદા પિણ્ડાય ગચ્છન્તં, દક્ખિણેય્યં જિનુત્તમં;

દિસ્વા ચિત્તં પસાદેત્વા, મઞ્જુનાભિનિકૂજહં [મઞ્જુનાદેન કૂજહં (સી. પી.)].

૧૩. ‘‘રાજુય્યાનં તદા ગન્ત્વા, સુપક્કં કનકત્તચં;

અમ્બપિણ્ડં ગહેત્વાન, સમ્બુદ્ધસ્સોપનામયિં.

૧૪. ‘‘તદા મે ચિત્તમઞ્ઞાય, મહાકારુણિકો જિનો;

ઉપટ્ઠાકસ્સ હત્થતો, પત્તં પગ્ગણ્હિ નાયકો.

૧૫. ‘‘અદાસિં હટ્ઠચિત્તોહં [તુટ્ઠચિત્તોહં (સી.)], અમ્બપિણ્ડં મહામુને;

પત્તે પક્ખિપ્પ પક્ખેહિ, પઞ્જલિં [પક્ખેહઞ્જલિં (સી.)] કત્વાન મઞ્જુના.

૧૬. ‘‘સરેન રજનીયેન, સવનીયેન વગ્ગુના;

વસ્સન્તો બુદ્ધપૂજત્થં, નીળં [નિદ્દં (સ્યા. પી.)] ગન્ત્વા નિપજ્જહં.

૧૭. ‘‘તદા મુદિતચિત્તં મં, બુદ્ધપેમગતાસયં;

સકુણગ્ઘિ ઉપાગન્ત્વા, ઘાતયી દુટ્ઠમાનસો.

૧૮. ‘‘તતો ચુતોહં તુસિતે, અનુભોત્વા મહાસુખં;

મનુસ્સયોનિમાગચ્છિં, તસ્સ કમ્મસ્સ વાહસા.

૧૯. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૨૦. ‘‘સાસનં જોતયિત્વા સો, અભિભુય્ય કુતિત્થિયે;

વિનયિત્વાન વેનેય્યે, નિબ્બુતો સો સસાવકો.

૨૧. ‘‘નિબ્બુતે તમ્હિ લોકગ્ગે, પસન્ના જનતા બહૂ;

પૂજનત્થાય બુદ્ધસ્સ, થૂપં કુબ્બન્તિ સત્થુનો.

૨૨. ‘‘‘સત્તયોજનિકં થૂપં, સત્તરતનભૂસિતં;

કરિસ્સામ મહેસિસ્સ’, ઇચ્ચેવં મન્તયન્તિ તે.

૨૩. ‘‘કિકિનો કાસિરાજસ્સ, તદા સેનાય નાયકો;

હુત્વાહં અપ્પમાણસ્સ, પમાણં ચેતિયે વદિં.

૨૪. ‘‘તદા તે મમ વાક્યેન, ચેતિયં યોજનુગ્ગતં;

અકંસુ નરવીરસ્સ, નાનારતનભૂસિતં.

૨૫. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૨૬. ‘‘પચ્છિમે ચ ભવે દાનિ, જાતો સેટ્ઠિકુલે અહં;

સાવત્થિયં પુરવરે, ઇદ્ધે ફીતે મહદ્ધને.

૨૭. ‘‘પુરપ્પવેસે સુગતં, દિસ્વા વિમ્હિતમાનસો;

પબ્બજિત્વાન ન ચિરં, અરહત્તમપાપુણિં.

૨૮. ‘‘ચેતિયસ્સ પમાણં યં, અકરિં તેન કમ્મુના;

લકુણ્ડકસરીરોહં, જાતો પરિભવારહો.

૨૯. ‘‘સરેન મધુરેનાહં, પૂજિત્વા ઇસિસત્તમં;

મઞ્જુસ્સરાનં ભિક્ખૂનં, અગ્ગત્તમનુપાપુણિં.

૩૦. ‘‘ફલદાનેન બુદ્ધસ્સ, ગુણાનુસ્સરણેન ચ;

સામઞ્ઞફલસમ્પન્નો, વિહરામિ અનાસવો.

૩૧. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૩૨. ‘‘સ્વાગતં વત મે આસિ, બુદ્ધસેટ્ઠસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૩૩. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા લકુણ્ડભદ્દિયો થેરો ઇમા ગાથાયો

અભાસિત્થાતિ.

લકુણ્ડભદ્દિયત્થેરસ્સાપદાનં પઠમં.