૯. આમણ્ડફલદાયકત્થેરઅપદાનં

૭૪. ‘‘પદુમુત્તરો નામ જિનો, સબ્બધમ્માન પારગૂ;

વુટ્ઠહિત્વા સમાધિમ્હા, ચઙ્કમી લોકનાયકો.

૭૫. ‘‘ખારિભારં ગહેત્વાન, આહરન્તો ફલં તદા;

અદ્દસં વિરજં બુદ્ધં, ચઙ્કમન્તં મહામુનિં.

૭૬. ‘‘પસન્નચિત્તો સુમનો, સિરે કત્વાન અઞ્જલિં;

સમ્બુદ્ધં અભિવાદેત્વા, આમણ્ડમદદિં ફલં.

૭૭. ‘‘સતસહસ્સિતો કપ્પે, યં ફલં અદદિં તદા;

દુગ્ગતિં નાભિજાનામિ, આમણ્ડસ્સ ઇદં ફલં.

૭૮. ‘‘કિલેસા ઝાપિતા મય્હં…પે… વિહરામિ અનાસવો.

૭૯. ‘‘સ્વાગતં વત મે આસિ…પે… કતં બુદ્ધસ્સ સાસનં.

૮૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા આમણ્ડફલદાયકો થેરો ઇમા

ગાથાયો અભાસિત્થાતિ.

આમણ્ડફલદાયકત્થેરસ્સાપદાનં નવમં.