૧૦. સુગન્ધત્થેરઅપદાનં

૮૧. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન [નામેન (સબ્બત્થ)], ઉપ્પજ્જિ વદતં વરો.

૮૨. ‘‘અનુબ્યઞ્જનસમ્પન્નો, બાત્તિંસવરલક્ખણો;

બ્યામપ્પભાપરિવુતો, રંસિજાલસમોત્થટો [રંસિજાલસમોસટો (સી. પી.)].

૮૩. ‘‘અસ્સાસેતા યથા ચન્દો, સૂરિયોવ પભઙ્કરો;

નિબ્બાપેતા યથા મેઘો, સાગરોવ ગુણાકરો.

૮૪. ‘‘ધરણીરિવ સીલેન, હિમવાવ સમાધિના;

આકાસો વિય પઞ્ઞાય, અસઙ્ગો અનિલો યથા.

૮૫. ‘‘સ કદાચિ મહાવીરો, પરિસાસુ વિસારદો;

સચ્ચાનિ સમ્પકાસેતિ, ઉદ્ધરન્તો મહાજનં.

૮૬. ‘‘તદા હિ બારાણસિયં, સેટ્ઠિપુત્તો મહાયસો;

આસહં ધનધઞ્ઞસ્સ [અનન્તધનધઞ્ઞસ્સ (ક.)], પહૂતસ્સ બહૂ તદા.

૮૭. ‘‘જઙ્ઘાવિહારં વિચરં, મિગદાયમુપેચ્ચહં [મુપેસહં (ક.)];

અદ્દસં વિરજં બુદ્ધં, દેસેન્તં અમતં પદં.

૮૮. ‘‘વિસટ્ઠકન્તવચનં, કરવીકસમસ્સરં;

હંસરુતેહિ [હંસદુન્દુભિ (સ્યા. પી.)] નિગ્ઘોસં, વિઞ્ઞાપેન્તં મહાજનં.

૮૯. ‘‘દિસ્વા દેવાતિદેવં તં, સુત્વાવ મધુરં ગિરં;

પહાયનપ્પકે ભોગે, પબ્બજિં અનગારિયં.

૯૦. ‘‘એવં પબ્બજિતો ચાહં, ન ચિરેન બહુસ્સુતો;

અહોસિં ધમ્મકથિકો, વિચિત્તપટિભાણવા.

૯૧. ‘‘મહાપરિસમજ્ઝેહં, હટ્ઠચિત્તો પુનપ્પુનં;

વણ્ણયિં હેમવણ્ણસ્સ, વણ્ણં વણ્ણવિસારદો.

૯૨. ‘‘એસ ખીણાસવો બુદ્ધો, અનીઘો છિન્નસંસયો;

સબ્બકમ્મક્ખયં પત્તો, વિમુત્તોપધિસઙ્ખયે.

૯૩. ‘‘એસ સો ભગવા બુદ્ધો, એસ સીહો અનુત્તરો;

સદેવકસ્સ લોકસ્સ, બ્રહ્મચક્કપ્પવત્તકો.

૯૪. ‘‘દન્તો દમેતા સન્તો ચ, સમેતા નિબ્બુતો ઇસિ;

નિબ્બાપેતા ચ અસ્સત્થો, અસ્સાસેતા મહાજનં.

૯૫. ‘‘વીરો સૂરો ચ વિક્કન્તો [ધીરો ચ (સી. પી.)], પઞ્ઞો કારુણિકો વસી;

વિજિતાવી ચ સ જિનો, અપ્પગબ્બો અનાલયો.

૯૬. ‘‘અનેઞ્જો અચલો ધીમા, અમોહો અસમો મુનિ;

ધોરય્હો ઉસભો નાગો, સીહો સક્કો ગરૂસુપિ.

૯૭. ‘‘વિરાગો વિમલો બ્રહ્મા, વાદી સૂરો રણઞ્જહો;

અખિલો ચ વિસલ્લો ચ, અસમો સંયતો [વુસભો (સ્યા.), પયતો (પી.)] સુચિ.

૯૮. ‘‘બ્રાહ્મણો સમણો નાથો, ભિસક્કો સલ્લકત્તકો;

યોધો બુદ્ધો સુતાસુતો [સુતો સુતો (સી. પી.)], અચલો મુદિતો સિતો [દિતો (સી.)].

૯૯. ‘‘ધાતા ધતા ચ સન્તિ ચ, કત્તા નેતા પકાસિતા;

સમ્પહંસિતા ભેત્તા ચ, છેત્તા સોતા પસંસિતા.

૧૦૦. ‘‘અખિલો ચ વિસલ્લો ચ, અનીઘો અકથંકથી;

અનેજો વિરજો કત્તા, ગન્ધા વત્તા પસંસિતા.

૧૦૧. ‘‘તારેતા અત્થકારેતા, કારેતા સમ્પદારિતા;

પાપેતા સહિતા કન્તા, હન્તા આતાપી તાપસો [હન્તા, તાપિતા ચ વિસોસિતા (સ્યા.)].

૧૦૨. ‘‘સમચિત્તો [સચ્ચટ્ઠિતો (સ્યા.)] સમસમો, અસહાયો દયાલયો [દયાસયો (સી.)];

અચ્છેરસત્તો [અચ્છેરમન્તો (સ્યા.)] અકુહો, કતાવી ઇસિસત્તમો.

૧૦૩. ‘‘નિત્તિણ્ણકઙ્ખો નિમ્માનો, અપ્પમેય્યો અનૂપમો;

સબ્બવાક્યપથાતીતો, સચ્ચ નેય્યન્તગૂ [સબ્બનેય્યન્તિકો (સ્યા.)] જિનો.

૧૦૪. ‘‘સત્તસારવરે [સતરંસીવરે (સ્યા.)] તસ્મિં, પસાદો અમતાવહો;

તસ્મા બુદ્ધે ચ ધમ્મે ચ, સઙ્ઘે સદ્ધા મહત્થિકા [મહિદ્ધિકા (સી. ક.)].

૧૦૫. ‘‘ગુણેહિ એવમાદીહિ, તિલોકસરણુત્તમં;

વણ્ણેન્તો પરિસામજ્ઝે, અકં [કથિં (સ્યા.)] ધમ્મકથં અહં.

૧૦૬. ‘‘તતો ચુતાહં તુસિતે, અનુભોત્વા મહાસુખં;

તતો ચુતો મનુસ્સેસુ, જાતો હોમિ સુગન્ધિકો.

૧૦૭. ‘‘નિસ્સાસો મુખગન્ધો ચ, દેહગન્ધો તથેવ મે;

સેદગન્ધો ચ સતતં, સબ્બગન્ધોવ હોતિ મે [સબ્બગન્ધોતિસેતિ મે (સી. પી.)].

૧૦૮. ‘‘મુખગન્ધો સદા મય્હં, પદુમુપ્પલચમ્પકો;

પરિસન્તો [આદિસન્તો (સી.), અતિકન્તો (સ્યા.), અતિસન્તો (પી.)] સદા વાતિ, સરીરો ચ તથેવ મે.

૧૦૯. ‘‘ગુણત્થવસ્સ સબ્બન્તં, ફલં તુ [ફલન્તં (સ્યા.)] પરમબ્ભુતં;

એકગ્ગમનસા સબ્બે, વણ્ણયિસ્સં [ભાસિતસ્સ (સ્યા.)] સુણાથ મે.

૧૧૦. ‘‘ગુણં બુદ્ધસ્સ વત્વાન, હિતાય ચ ન સદિસં [હિતાય જનસન્ધિસુ (સી. પી.), હિતાય નં સુખાવહં (સ્યા.)];

સુખિતો [સુચિત્તો (સ્યા.)] હોમિ સબ્બત્થ, સઙ્ઘો વીરસમાયુતો [સરદ્ધનિસમાયુતો (સી.)].

૧૧૧. ‘‘યસસ્સી સુખિતો કન્તો, જુતિમા પિયદસ્સનો;

વત્તા અપરિભૂતો ચ, નિદ્દોસો પઞ્ઞવા તથા.

૧૧૨. ‘‘ખીણે આયુસિ [પાસુસિ (સ્યા.)] નિબ્બાનં, સુલભં બુદ્ધભત્તિનો;

તેસં હેતું પવક્ખામિ, તં સુણાથ યથાતથં.

૧૧૩. ‘‘સન્તં યસં ભગવતો, વિધિના અભિવાદયં;

તત્થ તત્થૂપપન્નોપિ [યત્થ તત્થૂપપન્નોપિ (સી. પી.)], યસસ્સી તેન હોમહં.

૧૧૪. ‘‘દુક્ખસ્સન્તકરં બુદ્ધં, ધમ્મં સન્તમસઙ્ખતં;

વણ્ણયં સુખદો આસિં, સત્તાનં સુખિતો તતો.

૧૧૫. ‘‘ગુણં વદન્તો બુદ્ધસ્સ, બુદ્ધપીતિસમાયુતો;

સકન્તિં પરકન્તિઞ્ચ, જનયિં તેન કન્તિમા.

૧૧૬. ‘‘જિનો તે તિત્થિકાકિણ્ણે [જનોઘે તિત્થકાકિણ્ણે (સી. પી.), જિનો યો તિત્થિકાતિણ્ણો (સ્યા.)], અભિભુય્ય કુતિત્થિયે;

ગુણં વદન્તો જોતેસિં [થોમેસિં (સ્યા.)], નાયકં જુતિમા તતો.

૧૧૭. ‘‘પિયકારી જનસ્સાપિ, સમ્બુદ્ધસ્સ ગુણં વદં;

સરદોવ સસઙ્કોહં, તેનાસિં પિયદસ્સનો.

૧૧૮. ‘‘યથાસત્તિવસેનાહં, સબ્બવાચાહિ સન્થવિં;

સુગતં તેન વાગિસો, વિચિત્તપટિભાનવા.

૧૧૯. ‘‘યે બાલા વિમતિં પત્તા, પરિભોન્તિ મહામુનિં;

નિગ્ગહિં તે સદ્ધમ્મેન, પરિભૂતો ન તેનહં [પરિભૂતેન તેનહં (સ્યા.)].

૧૨૦. ‘‘બુદ્ધવણ્ણેન સત્તાનં, કિલેસે અપનેસહં;

નિક્કિલેસમનો હોમિ, તસ્સ કમ્મસ્સ વાહસા.

૧૨૧. ‘‘સોતૂનં વુદ્ધિમજનિં [બુદ્ધિમજનિં (સી. પી.)], બુદ્ધાનુસ્સતિદેસકો;

તેનાહમાસિં [તેનાપિ ચાસિં (સ્યા.)] સપ્પઞ્ઞો, નિપુણત્થવિપસ્સકો.

૧૨૨. ‘‘સબ્બાસવપરિક્ખીણો, તિણ્ણસંસારસાગરો;

સિખીવ અનુપાદાનો, પાપુણિસ્સામિ નિબ્બુતિં.

૧૨૩. ‘‘ઇમસ્મિંયેવ કપ્પસ્મિં, યમહં સન્થવિં જિનં;

દુગ્ગતિં નાભિજાનામિ, બુદ્ધવણ્ણસ્સિદં ફલં.

૧૨૪. ‘‘કિલેસા ઝાપિતા મય્હં…પે… વિહરામિ અનાસવો.

૧૨૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૨૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સુગન્ધો થેરો ઇમા ગાથાયો

અભાસિત્થાતિ.

સુગન્ધત્થેરસ્સાપદાનં દસમં.

તિણદાયકવગ્ગો તેપઞ્ઞાસમો.