૮. બોધિસમ્મજ્જકત્થેરઅપદાનં

૪૮. ‘‘અહં પુરે બોધિપત્તં, ઉજ્ઝિતં ચેતિયઙ્ગણે;

તં ગહેત્વાન છડ્ડેસિં, અલભિં વીસતીગુણે.

૪૯. ‘‘તસ્સ કમ્મસ્સ તેજેન, સંસરન્તો ભવાભવે;

દુવે ભવે સંસરામિ, દેવત્તે ચાપિ માનુસે.

૫૦. ‘‘દેવલોકા ચવિત્વાન, આગન્ત્વા માનુસં ભવં;

દુવે કુલે પજાયામિ, ખત્તિયે ચાપિ બ્રાહ્મણે.

૫૧. ‘‘અઙ્ગપચ્ચઙ્ગસમ્પન્નો, આરોહપરિણાહવા;

અભિરૂપો સુચિ હોમિ, સમ્પુણ્ણઙ્ગો અનૂનકો.

૫૨. ‘‘દેવલોકે મનુસ્સે વા, જાતો વા યત્થ કત્થચિ;

ભવે સુવણ્ણવણ્ણો ચ, ઉત્તત્તકનકૂપમો.

૫૩. ‘‘મુદુકા મદ્દવા સ્નિદ્ધા [મુદુ મદ્દવા સિનિદ્ધા (સ્યા.)], સુખુમા સુકુમારિકા;

છવિ મે સબ્બદા હોતિ, બોધિપત્તે સુછડ્ડિતે [સુછડ્ડિને (સી.)].

૫૪. ‘‘યતો કુતોચિ ગતીસુ, સરીરે સમુદાગતે;

ન લિમ્પતિ રજોજલ્લં, વિપાકો પત્તછડ્ડિતે.

૫૫. ‘‘ઉણ્હે વાતાતપે તસ્સ, અગ્ગિતાપેન વા પન;

ગત્તે સેદા ન મુચ્ચન્તિ, વિપાકો પત્તછડ્ડિતે.

૫૬. ‘‘કુટ્ઠં ગણ્ડો કિલાસો ચ, તિલકા પિળકા તથા;

ન હોન્તિ કાયે દદ્દુ ચ, વિપાકો પત્તછડ્ડિતે.

૫૭. ‘‘અપરમ્પિ ગુણં તસ્સ, નિબ્બત્તતિ ભવાભવે;

રોગા ન હોન્તિ કાયસ્મિં, વિપાકો પત્તછડ્ડિતે.

૫૮. ‘‘અપરમ્પિ ગુણં તસ્સ, નિબ્બત્તતિ ભવાભવે;

ન હોતિ ચિત્તજા પીળા, વિપાકો પત્તછડ્ડિતે.

૫૯. ‘‘અપરમ્પિ ગુણં તસ્સ, નિબ્બત્તતિ ભવાભવે;

અમિત્તા ન ભવન્તસ્સ, વિપાકો પત્તછડ્ડિતે.

૬૦. ‘‘અપરમ્પિ ગુણં તસ્સ, નિબ્બત્તતિ ભવાભવે;

અનૂનભોગો ભવતિ, વિપાકો પત્તછડ્ડિતે.

૬૧. ‘‘અપરમ્પિ ગુણં તસ્સ, નિબ્બત્તતિ ભવાભવે;

અગ્ગિરાજૂહિ ચોરેહિ, ન હોતિ ઉદકે ભયં.

૬૨. ‘‘અપરમ્પિ ગુણં તસ્સ, નિબ્બત્તતિ ભવાભવે;

દાસિદાસા અનુચરા, હોન્તિ ચિત્તાનુવત્તકા.

૬૩. ‘‘યમ્હિ આયુપ્પમાણમ્હિ, જાયતે માનુસે ભવે;

તતો ન હાયતે આયુ, તિટ્ઠતે યાવતાયુકં.

૬૪. ‘‘અબ્ભન્તરા ચ બાહિરા [બહિચરા (સી. પી. ક.)], નેગમા ચ સરટ્ઠકા;

નુયુત્તા હોન્તિ સબ્બેપિ, વુદ્ધિકામા સુખિચ્છકા.

૬૫. ‘‘ભોગવા યસવા હોમિ, સિરિમા ઞાતિપક્ખવા;

અપેતભયસન્તાસો, ભવેહં સબ્બતો ભવે.

૬૬. ‘‘દેવા મનુસ્સા અસુરા, ગન્ધબ્બા યક્ખરક્ખસા;

સબ્બે તે પરિરક્ખન્તિ, ભવે સંસરતો સદા.

૬૭. ‘‘દેવલોકે મનુસ્સે ચ, અનુભોત્વા ઉભો યસે;

અવસાને ચ નિબ્બાનં, સિવં પત્તો અનુત્તરં.

૬૮. ‘‘સમ્બુદ્ધમુદ્દિસિત્વાન, બોધિં વા તસ્સ સત્થુનો;

યો પુઞ્ઞં પસવે પોસો, તસ્સ કિં નામ દુલ્લભં.

૬૯. ‘‘મગ્ગે ફલે આગમે ચ, ઝાનાભિઞ્ઞાગુણેસુ ચ;

અઞ્ઞેસં અધિકો હુત્વા, નિબ્બાયામિ અનાસવો.

૭૦. ‘‘પુરેહં બોધિયા પત્તં, છડ્ડેત્વા હટ્ઠમાનસો;

ઇમેહિ વીસતઙ્ગેહિ, સમઙ્ગી હોમિ સબ્બદા.

૭૧. ‘‘કિલેસા ઝાપિતા મય્હં…પે… વિહરામિ અનાસવો.

૭૨. ‘‘સ્વાગતં વત મે આસિ…પે… કતં બુદ્ધસ્સ સાસનં.

૭૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા બોધિસમ્મજ્જકો થેરો ઇમા ગાથાયો

અભાસિત્થાતિ.

બોધિસમ્મજ્જકત્થેરસ્સાપદાનં અટ્ઠમં.