૯. ધમ્મરુચિયત્થેરઅપદાનં

૧૬૪. ‘‘યદા દીપઙ્કરો બુદ્ધો, સુમેધં બ્યાકરી જિનો;

‘અપરિમેય્યે ઇતો કપ્પે, અયં બુદ્ધો ભવિસ્સતિ.

૧૬૫. ‘‘‘ઇમસ્સ જનિકા માતા, માયા નામ ભવિસ્સતિ;

પિતા સુદ્ધોદનો નામ, અયં હેસ્સતિ ગોતમો.

૧૬૬. ‘‘‘પધાનં પદહિત્વાન, કત્વા દુક્કરકારિકં;

અસ્સત્થમૂલે સમ્બુદ્ધો, બુજ્ઝિસ્સતિ મહાયસો.

૧૬૭. ‘‘‘ઉપતિસ્સો કોલિતો ચ, અગ્ગા હેસ્સન્તિ સાવકા;

આનન્દો નામ નામેન [આનન્દો નામુપટ્ઠાકો (સ્યા.)], ઉપટ્ઠિસ્સતિમં જિનં.

૧૬૮. ‘‘‘ખેમા ઉપ્પલવણ્ણા ચ, અગ્ગા હેસ્સન્તિ સાવિકા;

ચિત્તો આળવકો ચેવ, અગ્ગા હેસ્સન્તુપાસકા.

૧૬૯. ‘‘‘ખુજ્જુત્તરા નન્દમાતા, અગ્ગા હેસ્સન્તુપાસિકા;

બોધિ ઇમસ્સ વીરસ્સ, અસ્સત્થોતિ પવુચ્ચતિ’.

૧૭૦. ‘‘ઇદં સુત્વાન વચનં, અસમસ્સ મહેસિનો;

આમોદિતા નરમરૂ, નમસ્સન્તિ કતઞ્જલી.

૧૭૧. ‘‘તદાહં માણવો આસિં, મેઘો નામ સુસિક્ખિતો;

સુત્વા બ્યાકરણં સેટ્ઠં, સુમેધસ્સ મહામુને.

૧૭૨. ‘‘સંવિસટ્ઠો ભવિત્વાન, સુમેધે કરુણાસયે [કરુણાલયે (સ્યા.)];

પબ્બજન્તઞ્ચ તં વીરં, સહાવ અનુપબ્બજિં.

૧૭૩. ‘‘સંવુતો પાતિમોક્ખસ્મિં, ઇન્દ્રિયેસુ ચ પઞ્ચસુ;

સુદ્ધાજીવો સતો વીરો, જિનસાસનકારકો.

૧૭૪. ‘‘એવં વિહરમાનોહં, પાપમિત્તેન કેનચિ;

નિયોજિતો અનાચારે, સુમગ્ગા પરિધંસિતો.

૧૭૫. ‘‘વિતક્કવસિકો હુત્વા, સાસનતો અપક્કમિં;

પચ્છા તેન કુમિત્તેન, પયુત્તો માતુઘાતનં.

૧૭૬. ‘‘અકરિં આનન્તરિયં [અકરિં નન્તરિયઞ્ચ (સ્યા. ક.)], ઘાતયિં દુટ્ઠમાનસો;

તતો ચુતો મહાવીચિં, ઉપપન્નો સુદારુણં.

૧૭૭. ‘‘વિનિપાતગતો સન્તો, સંસરિં દુક્ખિતો ચિરં;

ન પુનો અદ્દસં વીરં, સુમેધં નરપુઙ્ગવં.

૧૭૮. ‘‘અસ્મિં કપ્પે સમુદ્દમ્હિ, મચ્છો આસિં તિમિઙ્ગલો;

દિસ્વાહં સાગરે નાવં, ગોચરત્થમુપાગમિં.

૧૭૯. ‘‘દિસ્વા મં વાણિજા ભીતા, બુદ્ધસેટ્ઠમનુસ્સરું;

ગોતમોતિ મહાઘોસં, સુત્વા તેહિ ઉદીરિતં.

૧૮૦. ‘‘પુબ્બસઞ્ઞં સરિત્વાન, તતો કાલઙ્કતો અહં;

સાવત્થિયં કુલે ઇદ્ધે, જાતો બ્રાહ્મણજાતિયં.

૧૮૧. ‘‘આસિં ધમ્મરુચિ નામ, સબ્બપાપજિગુચ્છકો;

દિસ્વાહં લોકપજ્જોતં, જાતિયા સત્તવસ્સિકો.

૧૮૨. ‘‘મહાજેતવનં ગન્ત્વા, પબ્બજિં અનગારિયં;

ઉપેમિ બુદ્ધં તિક્ખત્તું, રત્તિયા દિવસસ્સ ચ.

૧૮૩. ‘‘તદા દિસ્વા મુનિ આહ, ચિરં ધમ્મરુચીતિ મં;

તતોહં અવચં બુદ્ધં, પુબ્બકમ્મપભાવિતં.

૧૮૪. ‘‘સુચિરં સતપુઞ્ઞલક્ખણં, પતિપુબ્બેન વિસુદ્ધપચ્ચયં;

અહમજ્જસુપેક્ખનં વત, તવ પસ્સામિ નિરુપમં વિગ્ગહં [નિરૂપમગ્ગહં (સી.)].

૧૮૫. ‘‘સુચિરં વિહતત્તમો મયા, સુચિરક્ખેન નદી વિસોસિતા;

સુચિરં અમલં વિસોધિતં, નયનં ઞાણમયં મહામુને.

૧૮૬. ‘‘ચિરકાલસમઙ્ગિતો [ચિરકાલં સમાગતો (પી.)] તયા, અવિનટ્ઠો પુનરન્તરં ચિરં;

પુનરજ્જસમાગતો તયા, ન હિ નસ્સન્તિ કતાનિ ગોતમ.

૧૮૭. ‘‘કિલેસા ઝાપિતા મય્હં…પે… વિહરામિ અનાસવો.

૧૮૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૮૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ધમ્મરુચિયો થેરો ઇમા ગાથાયો

અભાસિત્થાતિ.

ધમ્મરુચિયત્થેરસ્સાપદાનં નવમં.