૭. પુલિનુપ્પાદકત્થેરઅપદાનં

૧૧૧. ‘‘પબ્બતે હિમવન્તમ્હિ, દેવલો નામ તાપસો;

તત્થ મે ચઙ્કમો આસિ, અમનુસ્સેહિ માપિતો.

૧૧૨. ‘‘જટાભારેન [જટાભારસ્સ (સ્યા. ક.)] ભરિતો, કમણ્ડલુધરો સદા;

ઉત્તમત્થં ગવેસન્તો, વિપિના નિક્ખમિં તદા.

૧૧૩. ‘‘ચુલ્લાસીતિસહસ્સાનિ, સિસ્સા મય્હં ઉપટ્ઠહું;

સકકમ્માભિપસુતા, વસન્તિ વિપિને તદા.

૧૧૪. ‘‘અસ્સમા અભિનિક્ખમ્મ, અકં પુલિનચેતિયં;

નાનાપુપ્ફં સમાનેત્વા, તં ચેતિયમપૂજયિં.

૧૧૫. ‘‘તત્થ ચિત્તં પસાદેત્વા, અસ્સમં પવિસામહં;

સબ્બે સિસ્સા સમાગન્ત્વા, એતમત્થં પુચ્છિંસુ મં [એતમત્થમપુચ્છુ મં (સી.), એતમત્તં અપુચ્છિંસુ (સ્યા. ક.)].

૧૧૬. ‘‘‘પુલિનેન કતો થૂપો [કતો થૂપે (સી.)], યં ત્વં દેવ [દેવં (સી. પી.)] મસ્સતિ;

મયમ્પિ ઞાતુમિચ્છામ, પુટ્ઠો આચિક્ખ નો તુવં’.

૧૧૭. ‘‘‘નિદ્દિટ્ઠા નુ [નિદ્દિટ્ઠા નો (સી. પી.), દિટ્ઠાનો વો (સ્યા.)] મન્તપદે, ચક્ખુમન્તો મહાયસા;

તે ખો અહં નમસ્સામિ, બુદ્ધસેટ્ઠે મહાયસે’.

૧૧૮. ‘‘‘કીદિસા તે મહાવીરા, સબ્બઞ્ઞૂ લોકનાયકા;

કથંવણ્ણા કથંસીલા, કીદિસા તે મહાયસા’.

૧૧૯. ‘‘‘બાત્તિંસલક્ખણા બુદ્ધા, ચત્તાલીસદિજાપિ ચ;

નેત્તા ગોપખુમા તેસં, જિઞ્જુકા ફલસન્નિભા.

૧૨૦. ‘‘‘ગચ્છમાના ચ તે બુદ્ધા, યુગમત્તઞ્ચ પેક્ખરે;

ન તેસં જાણુ નદતિ, સન્ધિસદ્દો ન સુય્યતિ.

૧૨૧. ‘‘‘ગચ્છમાના ચ સુગતા, ઉદ્ધરન્તાવ ગચ્છરે;

પઠમં દક્ખિણં પાદં, બુદ્ધાનં એસ ધમ્મતા.

૧૨૨. ‘‘‘અસમ્ભીતા ચ તે બુદ્ધા, મિગરાજાવ કેસરી;

નેવુક્કંસેન્તિ અત્તાનં, નો ચ વમ્ભેન્તિ પાણિનં.

૧૨૩. ‘‘‘માનાવમાનતો મુત્તા, સમા સબ્બેસુ પાણિસુ;

અનત્તુક્કંસકા બુદ્ધા, બુદ્ધાનં એસ ધમ્મતા.

૧૨૪. ‘‘‘ઉપ્પજ્જન્તા ચ સમ્બુદ્ધા, આલોકં દસ્સયન્તિ તે;

છપ્પકારં પકમ્પેન્તિ, કેવલં વસુધં ઇમં.

૧૨૫. ‘‘‘પસ્સન્તિ નિરયઞ્ચેતે, નિબ્બાતિ નિરયો તદા;

પવસ્સતિ મહામેઘો, બુદ્ધાનં એસ ધમ્મતા.

૧૨૬. ‘‘‘ઈદિસા તે મહાનાગા, અતુલા ચ [તે (સ્યા. ક.)] મહાયસા;

વણ્ણતો અનતિક્કન્તા, અપ્પમેય્યા તથાગતા’.

૧૨૭. ‘‘‘અનુમોદિંસુ મે વાક્યં, સબ્બે સિસ્સા સગારવા;

તથા ચ પટિપજ્જિંસુ, યથાસત્તિ યથાબલં’.

૧૨૮. ‘‘પટિપૂજેન્તિ પુલિનં, સકકમ્માભિલાસિનો;

સદ્દહન્તા મમ વાક્યં, બુદ્ધસક્કતમાનસા [બુદ્ધત્તગતમાનસા (સી. સ્યા. પી.)].

૧૨૯. ‘‘તદા ચવિત્વા તુસિતા, દેવપુત્તો મહાયસો;

ઉપ્પજ્જિ માતુકુચ્છિમ્હિ, દસસહસ્સિ કમ્પથ.

૧૩૦. ‘‘અસ્સમસ્સાવિદૂરમ્હિ, ચઙ્કમમ્હિ ઠિતો અહં;

સબ્બે સિસ્સા સમાગન્ત્વા, આગચ્છું મમ સન્તિકે.

૧૩૧. ‘‘ઉસભોવ મહી નદતિ, મિગરાજાવ કૂજતિ;

સુસુમારોવ [સુંસુમારોવ (સી. સ્યા. પી.)] સળતિ, કિં વિપાકો ભવિસ્સતિ.

૧૩૨. ‘‘યં પકિત્તેમિ સમ્બુદ્ધં, સિકતાથૂપસન્તિકે;

સો દાનિ ભગવા સત્થા, માતુકુચ્છિમુપાગમિ.

૧૩૩. ‘‘તેસં ધમ્મકથં વત્વા, કિત્તયિત્વા મહામુનિં;

ઉય્યોજેત્વા સકે સિસ્સે, પલ્લઙ્કમાભુજિં અહં.

૧૩૪. ‘‘બલઞ્ચ વત મે ખીણં, બ્યાધિના [બ્યાધિતો (સી. સ્યા. પી. ક.)] પરમેન તં;

બુદ્ધસેટ્ઠં સરિત્વાન, તત્થ કાલઙ્કતો [કાલકતો (સી. પી.)] અહં.

૧૩૫. ‘‘સબ્બે સિસ્સા સમાગન્ત્વા, અકંસુ ચિતકં તદા;

કળેવરઞ્ચ મે ગય્હ, ચિતકં અભિરોપયું.

૧૩૬. ‘‘ચિતકં પરિવારેત્વા, સીસે કત્વાન અઞ્જલિં;

સોકસલ્લપરેતા તે, વિક્કન્દિંસુ સમાગતા.

૧૩૭. ‘‘તેસં લાલપ્પમાનાનં, અગમં ચિતકં તદા;

‘અહં આચરિયો તુમ્હં, મા સોચિત્થ સુમેધસા.

૧૩૮. ‘‘‘સદત્થે વાયમેય્યાથ, રત્તિન્દિવમતન્દિતા;

મા વો પમત્તા અહુત્થ [અહુવત્થ (સી.)], ખણો વો પટિપાદિતો’.

૧૩૯. ‘‘સકે સિસ્સેનુસાસિત્વા, દેવલોકં પુનાગમિં;

અટ્ઠારસ ચ કપ્પાનિ, દેવલોકે રમામહં.

૧૪૦. ‘‘સતાનં પઞ્ચક્ખત્તુઞ્ચ, ચક્કવત્તી અહોસહં;

અનેકસતક્ખત્તુઞ્ચ, દેવરજ્જમકારયિં.

૧૪૧. ‘‘અવસેસેસુ કપ્પેસુ, વોકિણ્ણો [વોકિણ્ણં (સી. સ્યા. ક.)] સંસરિં અહં;

દુગ્ગતિં નાભિજાનામિ, ઉપ્પાદસ્સ ઇદં ફલં [પુલિનપૂજાયિદં ફલં (સી.)].

૧૪૨. ‘‘યથા કોમુદિકે માસે, બહૂ પુપ્ફન્તિ પાદપા;

તથેવાહમ્પિ સમયે, પુપ્ફિતોમ્હિ મહેસિના.

૧૪૩. ‘‘વીરિયં મે ધુરધોરય્હં, યોગક્ખેમાધિવાહનં;

નાગોવ બન્ધનં છેત્વા, વિહરામિ અનાસવો.

૧૪૪. ‘‘સતસહસ્સિતો કપ્પે, યં બુદ્ધમભિકિત્તયિં;

દુગ્ગતિં નાભિજાનામિ, કિત્તનાય ઇદં ફલં.

૧૪૫. ‘‘કિલેસા ઝાપિતા મય્હં…પે… વિહરામિ અનાસવો.

૧૪૬. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૪૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પુલિનુપ્પાદકો થેરો ઇમા ગાથાયો

અભાસિત્થાતિ.

પુલિનુપ્પાદકત્થેરસ્સાપદાનં સત્તમં.