૧. પંસુકૂલસઞ્ઞકત્થેરઅપદાનં

૧. ‘‘તિસ્સો નામાસિ ભગવા, સયમ્ભૂ અગ્ગપુગ્ગલો;

પંસુકૂલં ઠપેત્વાન, વિહારં પાવિસી જિનો.

૨. ‘‘વિનતં [સજ્જિતં (સ્યા.), તિયન્તં (પી.)] ધનુમાદાય, ભક્ખત્થાય ચરિં અહં;

મણ્ડલગ્ગં ગહેત્વાન, કાનનં પાવિસિં અહં.

૩. ‘‘તત્થદ્દસં પંસુકૂલં, દુમગ્ગે લગ્ગિતં તદા;

ચાપં તત્થેવ નિક્ખિપ્પ, સિરે કત્વાન અઞ્જલિં.

૪. ‘‘પસન્નચિત્તો સુમનો, વિપુલાય ચ પીતિયા;

બુદ્ધસેટ્ઠં સરિત્વાન, પંસુકૂલં અવન્દહં.

૫. ‘‘દ્વેનવુતે ઇતો કપ્પે, પંસુકૂલમવન્દહં;

દુગ્ગતિં નાભિજાનામિ, વન્દનાય ઇદં ફલં.

૬. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૭. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૮. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા પંસુકૂલસઞ્ઞકો થેરો ઇમા ગાથાયો

અભાસિત્થાતિ.

પંસુકૂલસઞ્ઞકત્થેરસ્સાપદાનં પઠમં.