૧. નળમાલિયત્થેરઅપદાનં

૧. ‘‘સુવણ્ણવણ્ણં સમ્બુદ્ધં, આહુતીનં પટિગ્ગહં;

વિપિનગ્ગેન ગચ્છન્તં, અદ્દસં લોકનાયકં.

૨. ‘‘નળમાલં ગહેત્વાન, નિક્ખમન્તો ચ તાવદે;

તત્થદ્દસાસિં સમ્બુદ્ધં, ઓઘતિણ્ણમનાસવં.

૩. ‘‘પસન્નચિત્તો સુમનો, નળમાલમપૂજયિં;

દક્ખિણેય્યં મહાવીરં, સબ્બલોકાનુકમ્પકં.

૪. ‘‘એકતિંસે ઇતો કપ્પે, યં માલમભિરોપયિં [પુપ્ફમભિરોપયિં (સી. સ્યા. પી.)];

દુગ્ગતિં નાભિજાનામિ, બુદ્ધપૂજાયિદં ફલં.

૫. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૬. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૭. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા નળમાલિયો થેરો ઇમા ગાથાયો

અભાસિત્થાતિ.

નળમાલિયત્થેરસ્સાપદાનં પઠમં.