૨. મણિપૂજકત્થેરઅપદાનં

૮. ‘‘પદુમુત્તરો નામ જિનો, સબ્બધમ્માન પારગૂ;

વિવેકકામો સમ્બુદ્ધો, ગચ્છતે અનિલઞ્જસે.

૯. ‘‘અવિદૂરે હિમવન્તસ્સ, મહાજાતસ્સરો અહુ;

તત્થ મે ભવનં આસિ, પુઞ્ઞકમ્મેન સંયુતં.

૧૦. ‘‘ભવના અભિનિક્ખમ્મ, અદ્દસં લોકનાયકં;

ઇન્દીવરંવ જલિતં, આદિત્તંવ હુતાસનં.

૧૧. ‘‘વિચિનં નદ્દસં પુપ્ફં, પૂજયિસ્સન્તિ નાયકં;

સકં ચિત્તં પસાદેત્વા, અવન્દિં સત્થુનો અહં.

૧૨. ‘‘મમ સીસે મણિં ગય્હ, પૂજયિં લોકનાયકં;

ઇમાય મણિપૂજાય, વિપાકો હોતુ ભદ્દકો.

૧૩. ‘‘પદુમુત્તરો લોકવિદૂ, આહુતીનં પટિગ્ગહો;

અન્તલિક્ખે ઠિતો સત્થા, ઇમં ગાથં અભાસથ.

૧૪. ‘સો તે ઇજ્ઝતુ સઙ્કપ્પો, લભસ્સુ વિપુલં સુખં;

ઇમાય મણિપૂજાય, અનુભોહિ મહાયસં’.

૧૫. ‘‘ઇદં વત્વાન ભગવા, જલજુત્તમનામકો;

અગમાસિ બુદ્ધસેટ્ઠો, યત્થ ચિત્તં પણીહિતં.

૧૬. ‘‘સટ્ઠિકપ્પાનિ દેવિન્દો, દેવરજ્જમકારયિં;

અનેકસતક્ખત્તુઞ્ચ, ચક્કવત્તી અહોસહં.

૧૭. ‘‘પુબ્બકમ્મં સરન્તસ્સ, દેવભૂતસ્સ મે સતો;

મણિ નિબ્બત્તતે મય્હં, આલોકકરણો મમં.

૧૮. ‘‘છળસીતિસહસ્સાનિ, નારિયો મે પરિગ્ગહા;

વિચિત્તવત્થાભરણા, આમુક્કમણિકુણ્ડલા [આમુત્તમણિકુણ્ડલા (સી. સ્યા. પી.)].

૧૯. ‘‘અળારપમ્હા હસુલા, સુસઞ્ઞા તનુમજ્ઝિમા;

પરિવારેન્તિ મં નિચ્ચં, મણિપૂજાયિદં ફલં.

૨૦. ‘‘સોણ્ણમયા મણિમયા, લોહિતઙ્ગમયા તથા;

ભણ્ડા મે સુકતા હોન્તિ, યદિચ્છસિ [યદિચ્છાય (સી. પી.)] પિળન્ધના.

૨૧. ‘‘કૂટાગારા ગહારમ્મા, સયનઞ્ચ મહારહં;

મમ સઙ્કપ્પમઞ્ઞાય, નિબ્બત્તન્તિ યદિચ્છકં.

૨૨. ‘‘લાભા તેસં સુલદ્ધઞ્ચ, યે લભન્તિ ઉપસ્સુતિં;

પુઞ્ઞક્ખેત્તં મનુસ્સાનં, ઓસધં સબ્બપાણિનં.

૨૩. ‘‘મય્હમ્પિ સુકતં કમ્મં, યોહં અદક્ખિ નાયકં;

વિનિપાતા પમુત્તોમ્હિ, પત્તોમ્હિ અચલં પદં.

૨૪. ‘‘યં યં યોનુપપજ્જામિ, દેવત્તં અથ માનુસં;

દિવસઞ્ચેવ રત્તિઞ્ચ [સમન્તા સત્તરતના (સી. પી. ક.)], આલોકો હોતિ મે સદા.

૨૫. ‘‘તાયેવ મણિપૂજાય, અનુભોત્વાન સમ્પદા;

ઞાણાલોકો મયા દિટ્ઠો, પત્તોમ્હિ અચલં પદં.

૨૬. ‘‘સતસહસ્સિતો કપ્પે, યં મણિં અભિપૂજયિં;

દુગ્ગતિં નાભિજાનામિ, મણિપૂજાયિદં ફલં.

૨૭. ‘‘કિલેસા ઝાપિતા મય્હં…પે… વિહરામિ અનાસવો.

૨૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મણિપૂજકો થેરો ઇમા ગાથાયો

અભાસિત્થાતિ.

મણિપૂજકત્થેરસ્સાપદાનં દુતિયં.