૭. એકછત્તિયત્થેરઅપદાનં

૩૭. ‘‘અઙ્ગારજાતા પથવી, કુક્કુળાનુગતા મહી;

પદુમુત્તરો ભગવા, અબ્ભોકાસમ્હિ ચઙ્કમિ.

૩૮. ‘‘પણ્ડરં છત્તમાદાય, અદ્ધાનં પટિપજ્જહં;

તત્થ દિસ્વાન સમ્બુદ્ધં, વિત્તિ મે ઉપપજ્જથ.

૩૯. ‘‘મરીચિયોત્થટા [મરિચિમોફુના (સ્યા.), મરીચિવોફુટા (પી.)] ભૂમિ, અઙ્ગારાવ મહી અયં;

ઉપહન્તિ [ઉપવાયન્તિ (સી. પી.)] મહાવાતા, સરીરસ્સાસુખેપના [સરીરકાયુખેપના (સ્યા.)].

૪૦. ‘‘સીતં ઉણ્હં વિહનન્તં [વિહનતિ (સ્યા. ક.)], વાતાતપનિવારણં;

પટિગ્ગણ્હ ઇમં છત્તં, ફસ્સયિસ્સામિ [પસ્સયિસ્સામિ (ક.)] નિબ્બુતિં.

૪૧. ‘‘અનુકમ્પકો કારુણિકો, પદુમુત્તરો મહાયસો;

મમ સઙ્કપ્પમઞ્ઞાય, પટિગ્ગણ્હિ તદા જિનો.

૪૨. ‘‘તિંસકપ્પાનિ દેવિન્દો, દેવરજ્જમકારયિં;

સતાનં પઞ્ચક્ખત્તુઞ્ચ, ચક્કવત્તી અહોસહં.

૪૩. ‘‘પદેસરજ્જં વિપુલં, ગણનાતો અસઙ્ખિયં;

અનુભોમિ સકં કમ્મં, પુબ્બે સુકતમત્તનો.

૪૪. ‘‘અયં મે પચ્છિમા જાતિ, ચરિમો વત્તતે ભવો;

અજ્જાપિ સેતચ્છત્તં મે, સબ્બકાલં ધરીયતિ.

૪૫. ‘‘સતસહસ્સિતો કપ્પે, યં છત્તમદદિં તદા;

દુગ્ગતિં નાભિજાનામિ, છત્તદાનસ્સિદં ફલં.

૪૬. ‘‘કિલેસા ઝાપિતા મય્હં…પે… વિહરામિ અનાસવો.

૪૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૪૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા એકછત્તિયો થેરો ઇમા ગાથાયો

અભાસિત્થાતિ.

એકછત્તિયત્થેરસ્સાપદાનં સત્તમં.