૪૬. જગતિદાયકવગ્ગો

૧. જગતિદાયકત્થેરઅપદાનં

૧. ‘‘ધમ્મદસ્સિસ્સ મુનિનો, બોધિયા પાદપુત્તમે;

પસન્નચિત્તો સુમનો, જગતિં કારયિં અહં.

૨. ‘‘દરિતો પબ્બતતો વા, રુક્ખતો પતિતો અહં;

ચુતો પતિટ્ઠં વિન્દામિ, જગતિયા ઇદં ફલં.

૩. ‘‘ન મે ચોરા વિહેસન્તિ, નાતિમઞ્ઞન્તિ ખત્તિયા [પસહન્તિ, નાતિમઞ્ઞતિ ખત્તિયો (સી. પી.)];

સબ્બામિત્તેતિક્કમામિ, જગતિયા ઇદં ફલં.

૪. ‘‘યં યં યોનુપપજ્જામિ, દેવત્તં અથ માનુસં;

સબ્બત્થ પૂજિતો હોમિ, જગતિયા ઇદં ફલં.

૫. ‘‘અટ્ઠારસે કપ્પસતે, જગતિં કારયિં અહં;

દુગ્ગતિં નાભિજાનામિ, જગતિદાનસ્સિદં ફલં.

૬. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૭. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૮. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા જગતિદાયકો થેરો ઇમા ગાથાયો

અભાસિત્થાતિ.

જગતિદાયકત્થેરસ્સાપદાનં પઠમં.

૨. મોરહત્થિયત્થેરઅપદાનં

૯. ‘‘મોરહત્થં ગહેત્વાન, ઉપેસિં લોકનાયકં;

પસન્નચિત્તો સુમનો, મોરહત્થમદાસહં.

૧૦. ‘‘ઇમિના મોરહત્થેન, ચેતનાપણિધીહિ ચ;

નિબ્બાયિંસુ તયો અગ્ગી, લભામિ વિપુલં સુખં.

૧૧. ‘‘અહો બુદ્ધો અહો ધમ્મો, અહો નો સત્થુસમ્પદા;

દત્વાનહં મોરહત્થં, લભામિ વિપુલં સુખં.

૧૨. ‘‘તિયગ્ગી [તિધગ્ગી (સ્યા. ક.), તિવગ્ગી (પી.)] નિબ્બુતા મય્હં, ભવા સબ્બે સમૂહતા;

સબ્બાસવા પરિક્ખીણા, નત્થિ દાનિ પુનબ્ભવો.

૧૩. ‘‘એકતિંસે ઇતો કપ્પે, યં દાનમદદિં તદા;

દુગ્ગતિં નાભિજાનામિ, મોરહત્થસ્સિદં ફલં.

૧૪. ‘‘કિલેસા ઝાપિતા મય્હં…પે… વિહરામિ અનાસવો.

૧૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મોરહત્થિયો થેરો ઇમા ગાથાયો

અભાસિત્થાતિ.

મોરહત્થિયત્થેરસ્સાપદાનં દુતિયં.

૩. સીહાસનબીજિયત્થેરઅપદાનં

૧૭. ‘‘તિસ્સસ્સાહં ભગવતો, બોધિરુક્ખમવન્દિયં;

પગ્ગય્હ બીજનિં તત્થ, સીહાસનમબીજહં [મબીજયિં (સી.), મવિજ્જહં (સ્યા.)].

૧૮. ‘‘દ્વેનવુતે ઇતો કપ્પે, સીહાસનમબીજહં;

દુગ્ગતિં નાભિજાનામિ, બીજનાય ઇદં ફલં.

૧૯. ‘‘કિલેસા ઝાપિતા મય્હં…પે… વિહરામિ અનાસવો.

૨૦. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સીહાસનબીજિયો થેરો ઇમા

ગાથાયો અભાસિત્થાતિ.

સીહાસનબીજિયત્થેરસ્સાપદાનં તતિયં.

૪. તિણુક્કધારિયત્થેરઅપદાનં

૨૨. ‘‘પદુમુત્તરબુદ્ધસ્સ, બોધિયા પાદપુત્તમે;

પસન્નચિત્તો સુમનો, તયો ઉક્કે અધારયિં.

૨૩. ‘‘સતસહસ્સિતો કપ્પે, સોહં ઉક્કમધારયિં;

દુગ્ગતિં નાભિજાનામિ, ઉક્કદાનસ્સિદં ફલં.

૨૪. ‘‘કિલેસા ઝાપિતા મય્હં…પે… વિહરામિ અનાસવો.

૨૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિણુક્કધારિયો થેરો ઇમા ગાથાયો

અભાસિત્થાતિ.

તિણુક્કધારિયત્થેરસ્સાપદાનં ચતુત્થં.

૫. અક્કમનદાયકત્થેરઅપદાનં

૨૭. ‘‘કકુસન્ધસ્સ મુનિનો, બ્રાહ્મણસ્સ વુસીમતો;

દિવાવિહારં વજતો, અક્કમનમદાસહં.

૨૮. ‘‘ઇમસ્મિંયેવ કપ્પમ્હિ, યં દાનમદદિં તદા;

દુગ્ગતિં નાભિજાનામિ, અક્કમનસ્સિદં ફલં.

૨૯. ‘‘કિલેસા ઝાપિતા મય્હં…પે… વિહરામિ અનાસવો.

૩૦. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અક્કમનદાયકો થેરો ઇમા ગાથાયો

અભાસિત્થાતિ.

અક્કમનદાયકત્થેરસ્સાપદાનં પઞ્ચમં.

૬. વનકોરણ્ડિયત્થેરઅપદાનં

૩૨. ‘‘સિદ્ધત્થસ્સ ભગવતો, લોકજેટ્ઠસ્સ તાદિનો;

વનકોરણ્ડમાદાય, બુદ્ધસ્સ અભિરોપયિં.

૩૩. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૩૪. ‘‘કિલેસા ઝાપિતા મય્હં…પે… વિહરામિ અનાસવો.

૩૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા વનકોરણ્ડિયો થેરો ઇમા ગાથાયો

અભાસિત્થાતિ.

વનકોરણ્ડિયત્થેરસ્સાપદાનં છટ્ઠં.

વીસતિમં ભાણવારં.

૭. એકછત્તિયત્થેરઅપદાનં

૩૭. ‘‘અઙ્ગારજાતા પથવી, કુક્કુળાનુગતા મહી;

પદુમુત્તરો ભગવા, અબ્ભોકાસમ્હિ ચઙ્કમિ.

૩૮. ‘‘પણ્ડરં છત્તમાદાય, અદ્ધાનં પટિપજ્જહં;

તત્થ દિસ્વાન સમ્બુદ્ધં, વિત્તિ મે ઉપપજ્જથ.

૩૯. ‘‘મરીચિયોત્થટા [મરિચિમોફુના (સ્યા.), મરીચિવોફુટા (પી.)] ભૂમિ, અઙ્ગારાવ મહી અયં;

ઉપહન્તિ [ઉપવાયન્તિ (સી. પી.)] મહાવાતા, સરીરસ્સાસુખેપના [સરીરકાયુખેપના (સ્યા.)].

૪૦. ‘‘સીતં ઉણ્હં વિહનન્તં [વિહનતિ (સ્યા. ક.)], વાતાતપનિવારણં;

પટિગ્ગણ્હ ઇમં છત્તં, ફસ્સયિસ્સામિ [પસ્સયિસ્સામિ (ક.)] નિબ્બુતિં.

૪૧. ‘‘અનુકમ્પકો કારુણિકો, પદુમુત્તરો મહાયસો;

મમ સઙ્કપ્પમઞ્ઞાય, પટિગ્ગણ્હિ તદા જિનો.

૪૨. ‘‘તિંસકપ્પાનિ દેવિન્દો, દેવરજ્જમકારયિં;

સતાનં પઞ્ચક્ખત્તુઞ્ચ, ચક્કવત્તી અહોસહં.

૪૩. ‘‘પદેસરજ્જં વિપુલં, ગણનાતો અસઙ્ખિયં;

અનુભોમિ સકં કમ્મં, પુબ્બે સુકતમત્તનો.

૪૪. ‘‘અયં મે પચ્છિમા જાતિ, ચરિમો વત્તતે ભવો;

અજ્જાપિ સેતચ્છત્તં મે, સબ્બકાલં ધરીયતિ.

૪૫. ‘‘સતસહસ્સિતો કપ્પે, યં છત્તમદદિં તદા;

દુગ્ગતિં નાભિજાનામિ, છત્તદાનસ્સિદં ફલં.

૪૬. ‘‘કિલેસા ઝાપિતા મય્હં…પે… વિહરામિ અનાસવો.

૪૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૪૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા એકછત્તિયો થેરો ઇમા ગાથાયો

અભાસિત્થાતિ.

એકછત્તિયત્થેરસ્સાપદાનં સત્તમં.

૮. જાતિપુપ્ફિયત્થેરઅપદાનં

૪૯. ‘‘પરિનિબ્બુતે ભગવતિ, પદુમુત્તરે મહાયસે;

પુપ્ફવટંસકે કત્વા [પુપ્ફચઙ્કોટકે ગહેત્વા (સ્યા.)], સરીરમભિરોપયિં.

૫૦. ‘‘તત્થ ચિત્તં પસાદેત્વા, નિમ્માનં અગમાસહં;

દેવલોકગતો સન્તો, પુઞ્ઞકમ્મં સરામહં.

૫૧. ‘‘અમ્બરા પુપ્ફવસ્સો મે, સબ્બકાલં પવસ્સતિ;

સંસરામિ મનુસ્સે ચે [વે (સ્યા.)], રાજા હોમિ મહાયસો.

૫૨. ‘‘તહિં કુસુમવસ્સો મે, અભિવસ્સતિ સબ્બદા;

તસ્સેવ [કાયેસુ (સ્યા.), કાયેવ (પી.)] પુપ્ફપૂજાય, વાહસા સબ્બદસ્સિનો.

૫૩. ‘‘અયં પચ્છિમકો મય્હં, ચરિમો વત્તતે ભવો;

અજ્જાપિ પુપ્ફવસ્સો મે, અભિવસ્સતિ સબ્બદા.

૫૪. ‘‘સતસહસ્સિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, દેહપૂજાયિદં ફલં.

૫૫. ‘‘કિલેસા ઝાપિતા મય્હં…પે… વિહરામિ અનાસવો.

૫૬. ‘‘સ્વાગતં વત મે આસિ…પે… કતં બુદ્ધસ્સ સાસનં.

૫૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા જાતિપુપ્ફિયો થેરો ઇમા ગાથાયો

અભાસિત્થાતિ.

જાતિપુપ્ફિયત્થેરસ્સાપદાનં અટ્ઠમં.

૯. પટ્ટિપુપ્ફિયત્થેરઅપદાનં

૫૮. ‘‘નીહરન્તે સરીરમ્હિ, વજ્જમાનાસુ ભેરિસુ;

પસન્નચિત્તો સુમનો, પટ્ટિપુપ્ફમપૂજયિં [સત્તિ… (સ્યા. પી.)].

૫૯. ‘‘સતસહસ્સિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, દેહપૂજાયિદં ફલં.

૬૦. ‘‘કિલેસા ઝાપિતા મય્હં…પે… વિહરામિ અનાસવો.

૬૧. ‘‘સ્વાગતં વત મે આસિ…પે… કતં બુદ્ધસ્સ સાસનં.

૬૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પટ્ટિપુપ્ફિયો [સત્તિપણ્ણિયો (સ્યા. પી.)] થેરો ઇમા ગાથાયો

અભાસિત્થાતિ.

પટ્ટિપુપ્ફિયત્થેરસ્સાપદાનં નવમં.

૧૦. ગન્ધપૂજકત્થેરઅપદાનં

૬૩. ‘‘ચિતાસુ કુરુમાનાસુ [ચિત્તેસુ કયિરમાનેસુ (સી.)], નાનાગન્ધે સમાહટે;

પસન્નચિત્તો સુમનો, ગન્ધમુટ્ઠિમપૂજયિં.

૬૪. ‘‘સતસહસ્સિતો કપ્પે, ચિતકં યમપૂજયિં;

દુગ્ગતિં નાભિજાનામિ, ચિતપૂજાયિદં ફલં.

૬૫. ‘‘કિલેસા ઝાપિતા મય્હં…પે… વિહરામિ અનાસવો.

૬૬. ‘‘સ્વાગતં વત મે આસિ…પે… કતં બુદ્ધસ્સ સાસનં.

૬૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ગન્ધપૂજકો થેરો ઇમા ગાથાયો

અભાસિત્થાતિ.

ગન્ધપૂજકત્થેરસ્સાપદાનં દસમં.

જગતિદાયકવગ્ગો છચત્તાલીસમો.