૨. મોરહત્થિયત્થેરઅપદાનં

૯. ‘‘મોરહત્થં ગહેત્વાન, ઉપેસિં લોકનાયકં;

પસન્નચિત્તો સુમનો, મોરહત્થમદાસહં.

૧૦. ‘‘ઇમિના મોરહત્થેન, ચેતનાપણિધીહિ ચ;

નિબ્બાયિંસુ તયો અગ્ગી, લભામિ વિપુલં સુખં.

૧૧. ‘‘અહો બુદ્ધો અહો ધમ્મો, અહો નો સત્થુસમ્પદા;

દત્વાનહં મોરહત્થં, લભામિ વિપુલં સુખં.

૧૨. ‘‘તિયગ્ગી [તિધગ્ગી (સ્યા. ક.), તિવગ્ગી (પી.)] નિબ્બુતા મય્હં, ભવા સબ્બે સમૂહતા;

સબ્બાસવા પરિક્ખીણા, નત્થિ દાનિ પુનબ્ભવો.

૧૩. ‘‘એકતિંસે ઇતો કપ્પે, યં દાનમદદિં તદા;

દુગ્ગતિં નાભિજાનામિ, મોરહત્થસ્સિદં ફલં.

૧૪. ‘‘કિલેસા ઝાપિતા મય્હં…પે… વિહરામિ અનાસવો.

૧૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મોરહત્થિયો થેરો ઇમા ગાથાયો

અભાસિત્થાતિ.

મોરહત્થિયત્થેરસ્સાપદાનં દુતિયં.