૩. બિલ્લિયત્થેરઅપદાનં

૧૫. ‘‘ચન્દભાગાનદીતીરે, અસ્સમો સુકતો મમ;

બિલ્લરુક્ખેહિ [બેલુવરુક્ખેહિ (સ્યા.)] આકિણ્ણો, નાનાદુમનિસેવિતો.

૧૬. ‘‘સુગન્ધં બેલુવં દિસ્વા, બુદ્ધસેટ્ઠમનુસ્સરિં;

ખારિભારં પૂરયિત્વા, તુટ્ઠો સંવિગ્ગમાનસો.

૧૭. ‘‘કકુસન્ધં ઉપાગમ્મ, બિલ્લપક્કમદાસહં;

પુઞ્ઞક્ખેત્તસ્સ વીરસ્સ, વિપ્પસન્નેન ચેતસા.

૧૮. ‘‘ઇમસ્મિંયેવ કપ્પસ્મિં, યં ફલમદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૧૯. ‘‘કિલેસા ઝાપિતા મય્હં…પે… વિહરામિ અનાસવો.

૨૦. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા બિલ્લિયો થેરો ઇમા ગાથાયો

અભાસિત્થાતિ.

બિલ્લિયત્થેરસ્સાપદાનં તતિયં.