૪. ભલ્લાતદાયકત્થેરઅપદાનં

૨૨. ‘‘સુવણ્ણવણ્ણં સમ્બુદ્ધં, દ્વત્તિંસવરલક્ખણં;

વિપિનગ્ગેન [પવનગ્ગેન (સી. સ્યા. પી.)] ગચ્છન્તં, સાલરાજંવ ફુલ્લિતં.

૨૩. ‘‘તિણત્થરં પઞ્ઞાપેત્વા, બુદ્ધસેટ્ઠં અયાચહં;

‘અનુકમ્પતુ મં બુદ્ધો, ભિક્ખં ઇચ્છામિ દાતવે’.

૨૪. ‘‘અનુકમ્પકો કારુણિકો, અત્થદસ્સી મહાયસો;

મમ સઙ્કપ્પમઞ્ઞાય, ઓરૂહિ મમ અસ્સમે.

૨૫. ‘‘ઓરોહિત્વાન સમ્બુદ્ધો, નિસીદિ પણ્ણસન્થરે;

ભલ્લાતકં ગહેત્વાન, બુદ્ધસેટ્ઠસ્સદાસહં.

૨૬. ‘‘મમ નિજ્ઝાયમાનસ્સ, પરિભુઞ્જિ તદા જિનો;

તત્થ ચિત્તં પસાદેત્વા, અભિવન્દિં તદા જિનં.

૨૭. ‘‘અટ્ઠારસે કપ્પસતે, યં ફલમદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૨૮. ‘‘કિલેસા ઝાપિતા મય્હં…પે… વિહરામિ અનાસવો.

૨૯. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ભલ્લાતદાયકો થેરો ઇમા ગાથાયો

અભાસિત્થાતિ.

ભલ્લાતદાયકત્થેરસ્સાપદાનં ચતુત્થં.