૨. કોલદાયકત્થેરઅપદાનં

૮. ‘‘અજિનેન નિવત્થોહં, વાકચીરધરો તદા;

ખારિયા પૂરયિત્વાન, કોલંહાસિં મમસ્સમં [ખારિભારં હરિત્વાન, કોલમાહરિમસ્સમં (સી. પી.)].

૯. ‘‘તમ્હિ કાલે સિખી બુદ્ધો, એકો અદુતિયો અહુ;

મમસ્સમં ઉપાગચ્છિ, જાનન્તો સબ્બકાલિકં.

૧૦. ‘‘સકં ચિત્તં પસાદેત્વા, વન્દિત્વાન ચ સુબ્બતં;

ઉભો હત્થેહિ પગ્ગય્હ, કોલં બુદ્ધસ્સદાસહં.

૧૧. ‘‘એકતિંસે ઇતો કપ્પે, યં ફલમદદિં તદા;

દુગ્ગતિં નાભિજાનામિ, કોલદાનસ્સિદં ફલં.

૧૨. ‘‘કિલેસા ઝાપિતા મય્હં…પે… વિહરામિ અનાસવો.

૧૩. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કોલદાયકો થેરો ઇમા ગાથાયો

અભાસિત્થાતિ.

કોલદાયકત્થેરસ્સાપદાનં દુતિયં.