૯. અમ્બપિણ્ડિયત્થેરઅપદાનં

૭૨. ‘‘હત્થિરાજા તદા આસિં, ઈસાદન્તો ઉરુળ્હવા;

વિચરન્તો બ્રહારઞ્ઞે, અદ્દસં લોકનાયકં.

૭૩. ‘‘અમ્બપિણ્ડં ગહેત્વાન, અદાસિં સત્થુનો અહં;

પટિગ્ગણ્હિ મહાવીરો, સિદ્ધત્થો લોકનાયકો.

૭૪. ‘‘મમ નિજ્ઝાયમાનસ્સ, પરિભુઞ્જિ તદા જિનો;

તત્થ ચિત્તં પસાદેત્વા, તુસિતં ઉપપજ્જહં.

૭૫. ‘‘તતો અહં ચવિત્વાન, ચક્કવત્તી અહોસહં;

એતેનેવ ઉપાયેન, અનુભુત્વાન સમ્પદા.

૭૬. ‘‘પધાનપહિતત્તોહં, ઉપસન્તો નિરૂપધિ;

સબ્બાસવે પરિઞ્ઞાય, વિહરામિ અનાસવો.

૭૭. ‘‘ચતુન્નવુતિતો કપ્પે, યં ફલમદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૭૮. ‘‘કિલેસા ઝાપિતા મય્હં…પે… વિહરામિ અનાસવો.

૭૯. ‘‘સ્વાગતં વત મે આસિ…પે… કતં બુદ્ધસ્સ સાસનં.

૮૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અમ્બપિણ્ડિયો થેરો ઇમા ગાથાયો

અભાસિત્થાતિ.

અમ્બપિણ્ડિયત્થેરસ્સાપદાનં નવમં.