૬. એકદીપિયત્થેરઅપદાનં

૧૨૪. ‘‘પરિનિબ્બુતે સુગતે, સિદ્ધત્થે લોકનાયકે;

સદેવમાનુસા સબ્બે, પૂજેન્તિ દ્વિપદુત્તમં.

૧૨૫. ‘‘આરોપિતે ચ ચિતકે, સિદ્ધત્થે લોકનાયકે;

યથાસકેન થામેન, ચિતં પૂજેન્તિ સત્થુનો.

૧૨૬. ‘‘અવિદૂરે ચિતકસ્સ, દીપં ઉજ્જાલયિં અહં;

યાવ ઉદેતિ સૂરિયો, દીપં મે તાવ ઉજ્જલિ.

૧૨૭. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૧૨૮. ‘‘તત્થ મે સુકતં બ્યમ્હં, એકદીપીતિ ઞાયતિ;

દીપસતસહસ્સાનિ, બ્યમ્હે પજ્જલરે મમ.

૧૨૯. ‘‘ઉદયન્તોવ સૂરિયો, દેહો મે જોતતે સદા;

સપ્પભાહિ સરીરસ્સ, આલોકો હોતિ મે સદા.

૧૩૦. ‘‘તિરોકુટ્ટં [તિરોકુડ્ડં (સી. સ્યા. ક.)] તિરોસેલં, સમતિગ્ગય્હ [સબ્બત્થપિ એવમેવ દિસ્સતિ] પબ્બતં;

સમન્તા યોજનસતં, પસ્સામિ ચક્ખુના અહં.

૧૩૧. ‘‘સત્તસત્તતિક્ખત્તુઞ્ચ, દેવલોકે રમિં અહં;

એકતિંસતિક્ખત્તુઞ્ચ, દેવરજ્જમકારયિં.

૧૩૨. ‘‘અટ્ઠવીસતિક્ખત્તુઞ્ચ, ચક્કવત્તી અહોસહં;

પદેસરજ્જં વિપુલં, ગણનાતો અસઙ્ખિયં.

૧૩૩. ‘‘દેવલોકા ચવિત્વાન, નિબ્બત્તિં માતુકુચ્છિયં;

માતુકુચ્છિગતસ્સાપિ, અક્ખિ મે ન નિમીલતિ.

૧૩૪. ‘‘જાતિયા ચતુવસ્સોહં, પબ્બજિં અનગારિયં;

અડ્ઢમાસે અસમ્પત્તે, અરહત્તમપાપુણિં.

૧૩૫. ‘‘દિબ્બચક્ખું વિસોધેસિં, ભવા સબ્બે સમૂહતા;

સબ્બે કિલેસા સઞ્છિન્ના, એકદીપસ્સિદં ફલં.

૧૩૬. ‘‘તિરોકુટ્ટં તિરોસેલં, પબ્બતઞ્ચાપિ કેવલં;

સમતિક્કમ્મ [સબ્બત્થપી એવમેવ દિસ્સતિ] પસ્સામિ, એકદીપસ્સિદં ફલં.

૧૩૭. ‘‘વિસમા મે સમા હોન્તિ, અન્ધકારો ન વિજ્જતિ;

નાહં પસ્સામિ તિમિરં, એકદીપસ્સિદં ફલં.

૧૩૮. ‘‘ચતુન્નવુતિતો કપ્પે, યં દીપમદદિં તદા;

દુગ્ગતિં નાભિજાનામિ, એકદીપસ્સિદં ફલં.

૧૩૯. ‘‘કિલેસા ઝાપિતા મય્હં…પે… વિહરામિ અનાસવો.

૧૪૦. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૪૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા એકદીપિયો થેરો ઇમા ગાથાયો અભાસિત્થાતિ.

એકદીપિયત્થેરસ્સાપદાનં છટ્ઠં.