૧. તિસ્સમેત્તેય્યત્થેરઅપદાનં

૧. ‘‘પબ્ભારકૂટં નિસ્સાય, સોભિતો નામ તાપસો;

પવત્તફલં ભુઞ્જિત્વા, વસતિ પબ્બતન્તરે.

૨. ‘‘અગ્ગિં દારું આહરિત્વા, ઉજ્જાલેસિં અહં તદા;

ઉત્તમત્થં ગવેસન્તો, બ્રહ્મલોકૂપપત્તિયા.

૩. ‘‘પદુમુત્તરો લોકવિદૂ, આહુતીનં પટિગ્ગહો;

મમુદ્ધરિતુકામો સો, આગચ્છિ મમ સન્તિકે.

૪. ‘‘કિં કરોસિ મહાપુઞ્ઞ, દેહિ મે અગ્ગિદારુકં;

અહમગ્ગિં પરિચરે, તતો મે સુદ્ધિ હોહિતિ [હેહિતિ (સી.)].

૫. ‘‘સુભદ્દકો ત્વં મનુજે, દેવતે ત્વં પજાનસિ;

તુવં અગ્ગિં પરિચર, હન્દ તે અગ્ગિદારુકં.

૬. ‘‘તતો કટ્ઠં ગહેત્વાન, અગ્ગિં ઉજ્જાલયી જિનો;

ન તત્થ કટ્ઠં પજ્ઝાયિ, પાટિહેરં મહેસિનો.

૭. ‘‘ન તે અગ્ગિ પજ્જલતિ, આહુતી તે ન વિજ્જતિ;

નિરત્થકં વતં તુય્હં, અગ્ગિં પરિચરસ્સુ મે.

૮. ‘‘કીદિસો સો [તે (સ્યા. ક.)] મહાવીર, અગ્ગિ તવ પવુચ્ચતિ;

મય્હમ્પિ કથયસ્સેતં, ઉભો પરિચરામસે.

૯. ‘‘હેતુધમ્મનિરોધાય, કિલેસસમણાય ચ;

ઇસ્સામચ્છરિયં હિત્વા, તયો એતે મમાહુતી.

૧૦. ‘‘કીદિસો ત્વં મહાવીર, કથં ગોત્તોસિ મારિસ;

આચારપટિપત્તિ તે, બાળ્હં ખો મમ રુચ્ચતિ.

૧૧. ‘‘ખત્તિયમ્હિ કુલે જાતો, અભિઞ્ઞાપારમિં ગતો;

સબ્બાસવપરિક્ખીણો, નત્થિ દાનિ પુનબ્ભવો.

૧૨. ‘‘યદિ બુદ્ધોસિ સબ્બઞ્ઞૂ, પભઙ્કર તમોનુદ;

નમસ્સિસ્સામિ તં દેવ, દુક્ખસ્સન્તકરો તુવં.

૧૩. ‘‘પત્થરિત્વાજિનચમ્મં, નિસીદનમદાસહં;

નિસીદ નાથ સબ્બઞ્ઞુ, ઉપટ્ઠિસ્સામહં તુવં.

૧૪. ‘‘નિસીદિ ભગવા તત્થ, અજિનમ્હિ સુવિત્થતે;

નિમન્તયિત્વા સમ્બુદ્ધં, પબ્બતં અગમાસહં.

૧૫. ‘‘ખારિભારઞ્ચ પૂરેત્વા, તિન્દુકફલમાહરિં;

મધુના યોજયિત્વાન, ફલં બુદ્ધસ્સદાસહં.

૧૬. ‘‘મમ નિજ્ઝાયમાનસ્સ, પરિભુઞ્જિ તદા જિનો;

તત્થ ચિત્તં પસાદેસિં, પેક્ખન્તો લોકનાયકં.

૧૭. ‘‘પદુમુત્તરો લોકવિદૂ, આહુતીનં પટિગ્ગહો;

મમસ્સમે નિસીદિત્વા, ઇમા ગાથા અભાસથ.

૧૮. ‘‘‘યો મં ફલેન તપ્પેસિ, પસન્નો સેહિ પાણિભિ;

તમહં કિત્તયિસ્સામિ, સુણાથ મમ ભાસતો.

૧૯. ‘‘‘પઞ્ચવીસતિક્ખત્તું સો, દેવરજ્જં કરિસ્સતિ;

સહસ્સક્ખત્તું રાજા ચ, ચક્કવત્તી ભવિસ્સતિ.

૨૦. ‘‘‘તસ્સ સઙ્કપ્પમઞ્ઞાય, પુબ્બકમ્મસમઙ્ગિનો;

અન્નં પાનઞ્ચ વત્થઞ્ચ, સયનઞ્ચ મહારહં.

૨૧. ‘‘‘પુઞ્ઞકમ્મેન સંયુત્તા, નિબ્બત્તિસ્સન્તિ તાવદે;

સદા પમુદિતો ચાયં, ભવિસ્સતિ અનામયો.

૨૨. ‘‘‘ઉપપજ્જતિ યં યોનિં, દેવત્તં અથ માનુસં;

સબ્બત્થ સુખિતો હુત્વા, મનુસ્સત્તં ગમિસ્સતિ.

૨૩. ‘‘‘અજ્ઝાયકો મન્તધરો, તિણ્ણં વેદાન પારગૂ;

સમ્બુદ્ધં ઉપગન્ત્વાન, અરહા સો ભવિસ્સતિ’.

૨૪. ‘‘યતો સરામિ અત્તાનં, યતો પત્તોસ્મિ વિઞ્ઞુતં;

ભોગે મે ઊનતા નત્થિ, ફલદાનસ્સિદં ફલં.

૨૫. ‘‘વરધમ્મમનુપ્પત્તો, રાગદોસે સમૂહનિં;

સબ્બાસવપરિક્ખીણો, નત્થિ દાનિ પુનબ્ભવો.

૨૬. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૨૭. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૨૮. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા તિસ્સમેત્તેય્યો થેરો ઇમા ગાથાયો અભાસિત્થાતિ.

તિસ્સમેત્તેય્યત્થેરસ્સાપદાનં પઠમં.