૯. સબ્બદાયકત્થેરઅપદાનં

૪૫૬. ‘‘મહાસમુદ્દં ઓગય્હ, ભવનં મે સુનિમ્મિતં;

સુનિમ્મિતા પોક્ખરણી, ચક્કવાકપકૂજિતા.

૪૫૭. ‘‘મન્દાલકેહિ સઞ્છન્ના, પદુમુપ્પલકેહિ ચ;

નદી ચ સન્દતે તત્થ, સુપતિત્થા મનોરમા.

૪૫૮. ‘‘મચ્છકચ્છપસઞ્છન્ના, નાનાદિજસમોત્થતા;

મયૂરકોઞ્ચાભિરુદા, કોકિલાદીહિ વગ્ગુહિ.

૪૫૯. ‘‘પારેવતા રવિહંસા ચ, ચક્કવાકા નદીચરા;

દિન્દિભા સાળિકા ચેત્થ, પમ્મકા [પમ્પકા (સી.), ચપ્પકા (સ્યા.)] જીવજીવકા.

૪૬૦. ‘‘હંસા કોઞ્ચાપિ નદિતા [કોઞ્ચાભિનદિતા (સી. સ્યા.)], કોસિયા પિઙ્ગલા બહૂ;

સત્તરતનસમ્પન્ના, મણિમુત્તિકવાલુકા.

૪૬૧. ‘‘સબ્બસોણ્ણમયા રુક્ખા, નાનાગન્ધસમેરિતા;

ઉજ્જોતેન્તિ દિવારત્તિં, ભવનં સબ્બકાલિકં.

૪૬૨. ‘‘સટ્ઠિ તૂરિયસહસ્સાનિ, સાયં પાતો પવજ્જરે;

સોળસિત્થિસહસ્સાનિ, પરિવારેન્તિ મં સદા.

૪૬૩. ‘‘અભિનિક્ખમ્મ ભવના, સુમેધં લોકનાયકં;

પસન્નચિત્તો સુમનો, વન્દયિં તં મહાયસં.

૪૬૪. ‘‘સમ્બુદ્ધં અભિવાદેત્વા, સસઙ્ઘં તં નિમન્તયિં;

અધિવાસેસિ સો ધીરો, સુમેધો લોકનાયકો.

૪૬૫. ‘‘મમ ધમ્મકથં કત્વા, ઉય્યોજેસિ મહામુનિ;

સમ્બુદ્ધં અભિવાદેત્વા, ભવનં મે ઉપાગમિં.

૪૬૬. ‘‘આમન્તયિં પરિજનં, સબ્બે સન્નિપતાથ [સન્નિપતત્થ (ક.)] વો;

પુબ્બણ્હસમયં બુદ્ધો, ભવનં આગમિસ્સતિ.

૪૬૭. ‘‘લાભા અમ્હં સુલદ્ધં નો, યે વસામ તવન્તિકે;

મયમ્પિ બુદ્ધસેટ્ઠસ્સ, પૂજં કસ્સામ સત્થુનો.

૪૬૮. ‘‘અન્નપનં પટ્ઠપેત્વા, કાલં આરોચયિં અહં;

વસીસતસહસ્સેહિ, ઉપેસિ લોકનાયકો.

૪૬૯. ‘‘પઞ્ચઙ્ગિકેહિ તૂરિયેહિ, પચ્ચુગ્ગમનમકાસહં;

સબ્બસોણ્ણમયે પીઠે, નિસીદિ પુરિસુત્તમો.

૪૭૦. ‘‘ઉપરિચ્છદનં આસિ, સબ્બસોણ્ણમયં તદા;

બીજનિયો પવાયન્તિ, ભિક્ખુસઙ્ઘસ્સ અન્તરે.

૪૭૧. ‘‘પહૂતેનન્નપાનેન, ભિક્ખુસઙ્ઘમતપ્પયિં;

પચ્ચેકદુસ્સયુગળે, ભિક્ખુસઙ્ઘસ્સદાસહં.

૪૭૨. ‘‘યં વદન્તિ સુમેધોતિ, લોકાહુતિપટિગ્ગહં;

ભિક્ખુસઙ્ઘે નિસીદિત્વા, ઇમા ગાથા અભાસથ.

૪૭૩. ‘‘યો મે અન્નેન પાનેન, સબ્બે ઇમે ચ તપ્પયિં;

તમહં કિત્તયિસ્સામિ, સુણાથ મમ ભાસતો.

૪૭૪. ‘‘અટ્ઠારસે કપ્પસતે, દેવલોકે રમિસ્સતિ;

સહસ્સક્ખત્તું રાજા ચ, ચક્કવત્તી ભવિસ્સતિ.

૪૭૫. ‘‘ઉપ્પજ્જતિ [ઉપગચ્છતિ (સી.)] યં યોનિં, દેવત્તં અથ માનુસં;

સબ્બદા સબ્બસોવણ્ણં, છદનં ધારયિસ્સતિ.

૪૭૬. ‘‘તિંસકપ્પસહસ્સમ્હિ, ઓક્કાકકુસલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૪૭૭. ‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

સબ્બાસવે પરિઞ્ઞાય, નિબ્બાયિસ્સતિનાસવો.

૪૭૮. ‘‘‘ભિક્ખુસઙ્ઘે નિસીદિત્વા, સીહનાદં નદિસ્સતિ;

ચિતકે છત્તં ધારેન્તિ, હેટ્ઠા છત્તમ્હિ ડય્હથ’.

૪૭૯. ‘‘સામઞ્ઞં મે અનુપ્પત્તં, કિલેસા ઝાપિતા મયા;

મણ્ડપે રુક્ખમૂલે વા, સન્તાપો મે ન વિજ્જતિ.

૪૮૦. ‘‘તિંસકપ્પસહસ્સમ્હિ, યં દાનમદદિં તદા;

દુગ્ગતિં નાભિજાનામિ, સબ્બદાનસ્સિદં ફલં.

૪૮૧. ‘‘કિલેસા ઝાપિતા મય્હં…પે… વિહરામિ અનાસવો.

૪૮૨. ‘‘સ્વાગતં વત મે આસિ…પે… કતં બુદ્ધસ્સ સાસનં.

૪૮૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સબ્બદાયકો થેરો ઇમા ગાથાયો અભાસિત્થાતિ.

સબ્બદાયકત્થેરસ્સાપદાનં નવમં.