૮. આયાગદાયકત્થેરઅપદાનં

૯૪. ‘‘નિબ્બુતે લોકનાથમ્હિ, સિખિમ્હિ વદતં વરે;

હટ્ઠો હટ્ઠેન ચિત્તેન, અવન્દિં થૂપમુત્તમં.

૯૫. ‘‘વડ્ઢકીહિ કથાપેત્વા, મૂલં દત્વાનહં તદા;

હટ્ઠો હટ્ઠેન ચિત્તેન, આયાગં કારપેસહં.

૯૬. ‘‘અટ્ઠ કપ્પાનિ દેવેસુ, અબ્બોકિણ્ણં [અબ્બોચ્છિન્નં (સી.)] વસિં અહં;

અવસેસેસુ કપ્પેસુ, વોકિણ્ણં સંસરિં અહં.

૯૭. ‘‘કાયે વિસં ન કમતિ, સત્થાનિ ન ચ હન્તિ મે;

ઉદકેહં ન મિય્યામિ, આયાગસ્સ ઇદં ફલં.

૯૮. ‘‘યદિચ્છામિ અહં વસ્સં, મહામેઘો પવસ્સતિ;

દેવાપિ મે વસં એન્તિ, પુઞ્ઞકમ્મસ્સિદં ફલં.

૯૯. ‘‘સત્તરતનસમ્પન્નો, તિસક્ખત્તું અહોસહં;

ન મં કેચાવજાનન્તિ, પુઞ્ઞકમ્મસ્સિદં ફલં.

૧૦૦. ‘‘એકત્તિંસે ઇતો કપ્પે, આયાગં યમકારયિં;

દુગ્ગતિં નાભિજાનામિ, આયાગસ્સ ઇદં ફલં.

૧૦૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા આયાગદાયકો થેરો ઇમા ગાથાયો અભાસિત્થાતિ.

આયાગદાયકત્થેરસ્સાપદાનં અટ્ઠમં.