૪. કાળુદાયિત્થેરઅપદાનં

૪૮. ‘‘પદુમુત્તરબુદ્ધસ્સ, લોકજેટ્ઠસ્સ તાદિનો;

અદ્ધાનં પટિપન્નસ્સ, ચરતો ચારિકં તદા.

૪૯. ‘‘સુફુલ્લં પદુમં ગય્હ, ઉપ્પલં મલ્લિકઞ્ચહં;

પરમન્નં ગહેત્વાન, અદાસિં સત્થુનો અહં.

૫૦. ‘‘પરિભુઞ્જિ મહાવીરો, પરમન્નં સુભોજનં;

તઞ્ચ પુપ્ફં ગહેત્વાન, જનસ્સ સમ્પદસ્સયિ.

૫૧. ‘‘ઇટ્ઠં કન્તં [કન્તયિદં (સ્યા.)], પિયં લોકે, જલજં પુપ્ફમુત્તમં;

સુદુક્કરં કતં તેન, યો મે પુપ્ફં અદાસિદં.

૫૨. ‘‘યો પુપ્ફમભિરોપેસિ, પરમન્નઞ્ચદાસિ મે;

તમહં કિત્તયિસ્સામિ, સુણાથ મમ ભાસતો.

૫૩. ‘‘‘દસ અટ્ઠ ચક્ખત્તું [દસ ચટ્ઠક્ખત્તું (સી.), દસમટ્ઠક્ખત્તું (સ્યા.)] સો, દેવરજ્જં કરિસ્સતિ;

ઉપ્પલં પદુમઞ્ચાપિ, મલ્લિકઞ્ચ તદુત્તરિ.

૫૪. ‘‘‘અસ્સ પુઞ્ઞવિપાકેન, દિબ્બગન્ધસમાયુતં;

આકાસે છદનં કત્વા, ધારયિસ્સતિ તાવદે.

૫૫. ‘‘‘પઞ્ચવીસતિક્ખત્તુઞ્ચ, ચક્કવત્તી ભવિસ્સતિ;

પથબ્યા રજ્જં પઞ્ચસતં, વસુધં આવસિસ્સતિ.

૫૬. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન [નામેન (સી. સ્યા. ક.)], સત્થા લોકે ભવિસ્સતિ.

૫૭. ‘‘‘સકકમ્માભિરદ્ધો સો, સુક્કમૂલેન ચોદિતો;

સક્યાનં નન્દિજનનો, ઞાતિબન્ધુ ભવિસ્સતિ.

૫૮. ‘‘‘સો પચ્છા પબ્બજિત્વાન, સુક્કમૂલેન ચોદિતો;

સબ્બાસવે પરિઞ્ઞાય, નિબ્બાયિસ્સતિનાસવો.

૫૯. ‘‘‘પટિસમ્ભિદમનુપ્પત્તં, કતકિચ્ચમનાસવં;

ગોતમો લોકબન્ધુ તં [સો (સી.)], એતદગ્ગે ઠપેસ્સતિ.

૬૦. ‘‘‘પધાનપહિતત્તો સો, ઉપસન્તો નિરૂપધિ;

ઉદાયી નામ નામેન, હેસ્સતિ સત્થુ સાવકો’.

૬૧. ‘‘રાગો દોસો ચ મોહો ચ, માનો મક્ખો ચ ધંસિતો;

સબ્બાસવે પરિઞ્ઞાય, વિહરામિ અનાસવો.

૬૨. ‘‘તોસયિઞ્ચાપિ સમ્બુદ્ધં, આતાપી નિપકો અહં;

પસાદિતો [પમોદિતો (સી.)] ચ સમ્બુદ્ધો, એતદગ્ગે ઠપેસિ મં.

૬૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કાળુદાયી થેરો ઇમા ગાથાયો અભાસિત્થાતિ;

કાળુદાયીથેરસ્સાપદાનં ચતુત્થં.