૫. મોઘરાજત્થેરઅપદાનં

૬૪. ‘‘અત્થદસ્સી તુ ભગવા, સયમ્ભૂ અપરાજિતો;

ભિક્ખુસઙ્ઘપરિબ્યૂળ્હો, રથિયં પટિપજ્જથ.

૬૫. ‘‘સિસ્સેહિ સમ્પરિવુતો, ઘરમ્હા અભિનિક્ખમિં;

નિક્ખમિત્વાનહં તત્થ, અદ્દસં લોકનાયકં.

૬૬. ‘‘અભિવાદિય સમ્બુદ્ધં, સિરે કત્વાન અઞ્જલિં;

સકં ચિત્તં પસાદેત્વા, સન્થવિં લોકનાયકં.

૬૭. ‘‘યાવતા રૂપિનો સત્તા, અરૂપી વા અસઞ્ઞિનો;

સબ્બે તે તવ ઞાણમ્હિ, અન્તો હોન્તિ સમોગધા.

૬૮. ‘‘સુખુમચ્છિકજાલેન, ઉદકં યો પરિક્ખિપે;

યે કેચિ ઉદકે પાણા, અન્તોજાલે ભવન્તિ તે.

૬૯. ‘‘યેસઞ્ચ ચેતના અત્થિ, રૂપિનો ચ અરૂપિનો;

સબ્બે તે તવ ઞાણમ્હિ, અન્તો હોન્તિ સમોગધા.

૭૦. ‘‘સમુદ્ધરસિમં લોકં, અન્ધકારસમાકુલં;

તવ ધમ્મં સુણિત્વાન, કઙ્ખાસોતં તરન્તિ તે.

૭૧. ‘‘અવિજ્જાનિવુતે લોકે, અન્ધકારેન ઓત્થટે;

તવ ઞાણમ્હિ જોતન્તે, અન્ધકારા પધંસિતા.

૭૨. ‘‘તુવં ચક્ખૂસિ સબ્બેસં, મહાતમપનૂદનો;

તવ ધમ્મં સુણિત્વાન, નિબ્બાયતિ બહુજ્જનો.

૭૩. ‘‘પુટકં પૂરયિત્વાન [પીઠરં (સી.), પુતરં (સ્યા.)], મધુખુદ્દમનેળકં;

ઉભો હત્થેહિ પગ્ગય્હ, ઉપનેસિં મહેસિનો.

૭૪. ‘‘પટિગ્ગણ્હિ મહાવીરો, સહત્થેન મહા ઇસી;

ભુઞ્જિત્વા તઞ્ચ સબ્બઞ્ઞૂ, વેહાસં નભમુગ્ગમિ.

૭૫. ‘‘અન્તલિક્ખે ઠિતો સત્થા, અત્થદસ્સી નરાસભો;

મમ ચિત્તં પસાદેન્તો, ઇમા ગાથા અભાસથ.

૭૬. ‘‘‘યેનિદં થવિતં ઞાણં, બુદ્ધસેટ્ઠો ચ થોમિતો;

તેન ચિત્તપ્પસાદેન, દુગ્ગતિં સો ન ગચ્છતિ.

૭૭. ‘‘‘ચતુદ્દસઞ્ચક્ખત્તું [ચતુસટ્ઠિઞ્ચ (સ્યા.)] સો, દેવરજ્જં કરિસ્સતિ;

પથબ્યા રજ્જં અટ્ઠસતં, વસુધં આવસિસ્સતિ.

૭૮. ‘‘‘પઞ્ચેવ સતક્ખત્તુઞ્ચ [અથ પઞ્ચસતક્ખત્તું (સી.)], ચક્કવત્તી ભવિસ્સતિ;

પદેસરજ્જં અસઙ્ખેય્યં, મહિયા કારયિસ્સતિ.

૭૯. ‘‘‘અજ્ઝાયકો મન્તધરો, તિણ્ણં વેદાન પારગૂ;

ગોતમસ્સ ભગવતો, સાસને પબ્બજિસ્સતિ.

૮૦. ‘‘‘ગમ્ભીરં નિપુણં અત્થં, ઞાણેન વિચિનિસ્સતિ;

મોઘરાજાતિ નામેન, હેસ્સતિ સત્થુ સાવકો.

૮૧. ‘‘‘તીહિ વિજ્જાહિ સમ્પન્નં, કતકિચ્ચમનાસવં;

ગોતમો સત્થવાહગ્ગો, એતદગ્ગે ઠપેસ્સતિ’.

૮૨. ‘‘હિત્વા માનુસકં યોગં, છેત્વાન ભવબન્ધનં;

સબ્બાસવે પરિઞ્ઞાય, વિહરામિ અનાસવો.

૮૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા મોઘરાજો થેરો ઇમા ગાથાયો અભાસિત્થાતિ;

મોઘરાજત્થેરસ્સાપદાનં પઞ્ચમં.