૧. કુણ્ડધાનત્થેરઅપદાનં

૧. ‘‘સત્તાહં પટિસલ્લીનં, સયમ્ભું અગ્ગપુગ્ગલં;

પસન્નચિત્તો સુમનો, બુદ્ધસેટ્ઠં ઉપટ્ઠહિં.

૨. ‘‘વુટ્ઠિતં કાલમઞ્ઞાય, પદુમુત્તરં મહામુનિં;

મહન્તિં કદલીકણ્ણિં, ગહેત્વા ઉપગચ્છહં.

૩. ‘‘પટિગ્ગહેત્વા [પટિગ્ગહેસિ (સ્યા. ક.)] ભગવા, સબ્બઞ્ઞૂ [તં ફલં (સી.)] લોકનાયકો;

મમ ચિત્તં પસાદેન્તો, પરિભુઞ્જિ મહામુનિ.

૪. ‘‘પરિભુઞ્જિત્વા સમ્બુદ્ધો, સત્થવાહો અનુત્તરો;

સકાસને નિસીદિત્વા, ઇમા ગાથા અભાસથ.

૫. ‘‘‘યે ચ સન્તિ સમિતારો [યે વસન્તિ સમેતારો (સી.)], યક્ખા ઇમમ્હિ પબ્બતે;

અરઞ્ઞે ભૂતભબ્યાનિ [ભૂતગણા સબ્બે (સ્યા.)], સુણન્તુ વચનં મમ’.

૬. ‘‘યો સો બુદ્ધં ઉપટ્ઠાસિ, મિગરાજંવ કેસરિં [મિગરાજાવ કેસરી (સી.)];

તમહં કિત્તયિસ્સામિ, સુણાથ મમ ભાસતો.

૭. ‘‘‘એકાદસઞ્ચક્ખત્તું, સો [સોયમેકાદસક્ખત્તું (સી.)] દેવરાજા ભવિસ્સતિ;

ચતુતિંસતિક્ખત્તુઞ્ચ, ચક્કવત્તી ભવિસ્સતિ.

૮. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૯. ‘‘‘અક્કોસિત્વાન સમણે, સીલવન્તે અનાસવે;

પાપકમ્મવિપાકેન, નામધેય્યં લભિસ્સતિ [ભવિસ્સતિ (ક.)].

૧૦. ‘‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

કુણ્ડધાનોતિ નામેન, સાવકો સો ભવિસ્સતિ’.

૧૧. ‘‘પવિવેકમનુયુત્તો, ઝાયી ઝાનરતો અહં;

તોસયિત્વાન સત્થારં, વિહરામિ અનાસવો.

૧૨. ‘‘સાવકેહિ [સાવકગ્ગેહિ (સી.)] પરિવુતો, ભિક્ખુસઙ્ઘપુરક્ખતો;

ભિક્ખુસઙ્ઘે નિસીદિત્વા, સલાકં ગાહયી જિનો.

૧૩. ‘‘એકંસં ચીવરં કત્વા, વન્દિત્વા લોકનાયકં;

વદતં વરસ્સ પુરતો, પઠમં અગ્ગહેસહં.

૧૪. ‘‘તેન કમ્મેન ભગવા, દસસહસ્સીકમ્પકો;

ભિક્ખુસઙ્ઘે નિસીદિત્વા, અગ્ગટ્ઠાને ઠપેસિ મં.

૧૫. ‘‘વીરિયં મે ધુરધોરય્હં, યોગક્ખેમાધિવાહનં;

ધારેમિ અન્તિમં દેહં, સમ્માસમ્બુદ્ધસાસને.

૧૬. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા કુણ્ડધાનો થેરો ઇમા ગાથાયો અભાસિત્થાતિ.

કુણ્ડધાનત્થેરસ્સાપદાનં પઠમં.